香港同英國一樣，一路以來都冇國慶，最接近嗰個日子叫做事頭婆生日。當然香港人同事頭婆咁熟，繼續慶祝都冇所謂，但始終唔係100%香港。六九六一二呢啲以革命起義做主題嘅日子，又好似少咗份典雅少咗份歷史；雙十節又略嫌太大中華、七一十一就提都無謂，查實我哋有冇一個真真正正屬於香港嘅日子呢？
答案係有嘅！就係一月廿六號！ 一八四一年嘅呢日，正正就係皇家海軍喺水坑口上岸並升起米字旗嗰一日！雖然英國喺一八四二年先同淸國簽署南京條約正式擁有香港，但實際上四一年一月廿六號開始，香港已經開埠成爲皇家地。開埠日象徵現代香港歷史開始嘅意義，同國慶亦相差無幾！
南半球嘅另一個英國殖民地 - 澳洲，同香港啱啱好一樣都係一月廿六號開埠（洲）（不過係一七八八年）。澳洲冇忌諱呢一日，反而將呢日當成國慶日嚟，冇話慶祝歌頌殖民主義帝國主義，只係知道今日我哋對澳洲呢個地方、呢個身份嘅認識，如果唔係呢一日，根本就唔會存在。
返返嚟香港，同樣嘅慶祝理據，一樣可以安放喺我哋身上。冇一八四一年一月廿六號，今日香港呢個身份，或者只係廣州某條村名。當一個當年只係俾英國用嚟流放犯人嘅地方都慶祝呢個日子嘅時候，今日都重咬緊英國留低嘅老本嘅我哋，又有咩藉口唔去咁做？
當然今年有武漢肺炎、有国安法，亦都唔期望有咩活動可以慶祝。只係希望各位香港人，可以知道呢一日嘅存在，默默記住，延續傳承。同我一樣喺外國嘅朋友仔當然可以做多少少，細佬自己當日就會掛返起枝香港旗（唔係叫港英旗，左仔先叫港英），亦會好自豪咁講聲「今日係香港生日！」，畀外國朋友仔對我哋香港又多少少認識！
另外細佬整咗張圖，用簡單易明嘅方法表達共產黨想埋沒嘅香港歷史到底有幾多，可以隨便拎去用。
有追蹤你
好似太早出post 啲人未瞓醒掛
睇彩數～