冇打錯, 我的確覺得戰鎚係最難上手嘅Total war
其他全戰系列, 常見各個派系之間共用一個較大較複雜內政/成長系統, 所以玩得掂一個派系, 再玩其他派系其實都係大同小異
反而戰鎚好似你咁講真係簡化咗好多內政, 但保證咗每個種族都有自己簡單獨特嘅戰役系統, 呢樣亦都係點解戰鎚比起歷史系襟玩好多嘅主因, 因為每個種族都有唔同嘅體驗
但戰鎚難上手嘅主要係戰鬥部分而唔係戰役
歷史系列即使未接觸過全戰都有一啲基本知識用得上, 例如騎剋弓, 矛剋騎之類, 齋靠睇樣已經可以大致上分辨各個兵種嘅角色, 所以戰鬥嚟講可以好快上手
但戰鎚唔同, 種族之間嘅兵種好多元化, 而且好多古古怪怪嘅兵種唔認真研究過好難得知有咩作用
戰鎚嘅戰鬥系統同傳統歷史系最大嘅分別我諗有三樣: 空軍, 魔法同單體單位
空軍唔需要多講, 改變咗陸戰嘅模式
魔法直情完全改變晒成個全戰嘅生態, 當你可以用一個魔法技能同時摧毀幾隊步兵嘅時候, 陣形配合相對上就變得好次要
最後單體單位嘅加入我覺得係戰鎚最大, 亦都係最難理解嘅特色
一人開無雙單挑成支軍隊嘅玩法係戰鎚系列首創, 雖然設定上同戰鎚個世界觀吻合, 但已經脫離咗傳統全戰嘅玩法, 單位嘅損傷唔再以模組損失衡量, 而係改用生命值,
即係無論承受幾多傷害, 只要未被擊潰一樣可以喺戰場上作出相同嘅傷害輸出, 再加上單體單位本身受擊打範圍細同補血之類嘅機制令到單體單位成為最OP嘅兵種
呢幾樣分別我諗亦都係新手覺得最難理解嘅幾樣嘢, 要完全摸熟需要唔少時間
題外話, 單體單位之後亦都有喺三國同Troy出現, 依然OP, 據我所知其實好多歷史系死忠都唔鍾意呢樣嘢, 認為破壞咗全戰嘅特色