[愛情][奇幻] 麥東冬

105 回覆
8 Like 2 Dislike
2020-10-15 11:54:50
東冬真係好毒
2020-10-15 14:07:04
毒L都有市場嘅
2020-10-15 23:28:14
pish一下
2020-10-16 16:19:59
2020-10-16 19:08:14
出故未?
2020-10-17 11:48:57
今日會出
2020-10-17 23:48:49
(七)斷了的線

今晚我喺戲院睇一套講情緒嘅卡通片。
坐我前面嘅情侶不斷悄悄低語。
即使個男仔已經攬住個女仔,個女仔依然嗌住「好凍好凍」。

散場時我留到最後,感受一下套戲帶畀我嘅餘韻。
行出戲院我伸一伸懶腰,眼尾見到遠處有個熟悉嘅身影。

又係依個男仔。

佢依舊拎住杯飲品,笑瞇瞇咁行緊去商場出口。
我行喺佢後面,想做個實驗,於是加快腳步跟上去。
「喂!」
呯!
佢嚇到成杯嘢跌咗落地,杯蓋鬆開咗,但只有幾粒珍珠跌咗出嚟。

「哇乜你行路無聲㗎?!」佢激動講。
「啊…對唔住啊係咪嚇親你…?」我變得難為情。
佢彎腰執返起個杯,對我講:「係啊差啲被你嚇死喇...你咁夜喺度做咩啊?」
我將睇戲嘅事話畀佢知,期待住佢都會講返畀我知點解佢咁夜。
但佢只係講佢今晚去咗買嘢飲,覺得好開心。
「我行依邊返屋企啊,你呢?」佢問我。
「嗯我都係依邊啊。」
佢繼續向出口行,我亦好自然咁跟住佢。

佢的確同其他人唔一樣,會願意同我講嘢。
我哋一路並肩而行,行返去太古公園。

好似已經好耐無同人散步,有種好溫暖嘅感覺喺我全身蔓延。
我故意放慢步伐,希望可以令依段路感覺變得長一啲。

「前面就係我屋企喇。係喎你整返好斷咗嗰條手鍊未?」踏入公園後佢問。
佢咁樣一問我先忽然醒起,我係整斷咗屋企人畀我嘅嘢。心情變得沉重。
我搖搖頭回應。
「哦...不如我試吓幫你整吖。」
佢突如其來嘅好意令我唔識反應,只好不斷點頭以表示樂意。
「聽晚十點喺公園等你?我可以嚟幫你整啊。」
目光呆滯嘅我再次點頭,隨意回應聲「好」。
佢喺大廈前停低,面有難色講:「我覺得今晚條街好凍,凍到我開始有啲肚痛…你介唔介意我走先?」
我微笑搖頭,同佢講聲再見。
依然拎住個杯嘅佢,急急腳入咗大廈。

面對難關就搵辦法解決,係我自幼就保留嘅優點。
即使十有八九不可行,但積極樂觀似乎係我嘅天性。
只係最近好似患上深度失憶症,連性格都就快失掉。

到底我屋企喺邊?
無家可歸嘅我,又喺太古公園度過多一個晚上。
2020-10-18 13:17:14
pish
2020-10-19 21:56:57
(八)菜和山

「你好快啲講畀我聽,點解個台妹會突然撩你講嘢㗎?!」梓軒一邊行,一邊搭住東冬膊頭問。
東冬沾沾自喜答:「係咁嘅,佢無啦啦問我係咪住附近喎…咁我咪點頭囉。佢問我係咪照平時一樣飲珍珠奶茶,我咪點頭囉。佢整完嘢飲返嚟又問我係咪就係東冬,話睇到之前訪問條片喎,跟住我咪點頭囉。最後佢話下次再見啦,我揮揮手就走咗。」
「哇……原來你啞㗎?」梓軒一臉無奈。

東冬都覺得好無奈,不過佢一早接受自己係一個又內向,又無急才嘅人。

「咁我國語唔好講唔到咁多嘢嘛!但今次我好清楚見到佢個名牌寫住『SHAN』!終於知道佢個名喇!」東冬雀躍起嚟。
「嗯...既然知佢個名,不如試吓起佢底。」梓軒摸吓摸吓個下巴。
東冬一時都諗唔明梓軒嘅意思,只係望住佢拎部電話出嚟。
「我估佢IG應該會follow自己間公司啩。」梓軒㩒住電話繼續講:「嗱,你喺度search『SHAN』睇吓見唔見到佢。」

東冬接過電話,唞一唞氣,好快咁打咗個英文字出嚟。
篩剩幾十人,佢哋兩個全神貫注慢慢逐一細睇。

「依個樣有啲似佢喎!」梓軒搭住東冬,指住螢幕。
東冬興奮又半信半疑㩒入去:「好似真係佢……『tsaiheshan』,唔係好識拼添…」
「你唔係啊嘛,國語咁差學咩人追台妹啊!照拼應該係『菜』『和』『山』?佢一定好中意食菜同行山,係個好健康嘅女仔!」無哩頭嘅梓軒開始亂講嘢。

突然知道佢IG嘅東冬顯然有啲唔自在,有種偷窺時會有嘅興奮但又帶點內疚。
佢望住個螢幕唔敢再有進一步嘅行動,以減低覺得自己好變態嘅感覺。

「你下次見到佢咪問佢個名囉。反正佢知你叫咩名,你問返佢都好正路。」
東冬點頭同意,然後梓軒繼續講:「不過當務之急係你要補一補你啲國語先,唔係都好難溝……通。」

於是東冬就去書店買咗一堆國語教材,開始咗佢嘅『國語之路』。
2020-10-19 23:32:41
係咪啞㗎
2020-10-20 18:57:12
pish
2020-10-21 00:52:27
(九)男孩教室

今晚,我喺公園等個男仔出現。
坐喺長凳,望住路人喺公園緩緩散步,有啲仲拖住狗仔,好可愛啊。
我拎住條斷咗嘅水晶鍊,再次嘗試憶起佢嘅來歷。
可惜依然不明。

佢嚟喇,攞住幾本書由公園入口跑過嚟。
「唔好意思嚟遲咗!」佢有少少喘氣地講,然後坐喺我右邊。
「唔緊要...你啱啱去書店?」
佢望一望手上嘅書:「呃係啊最近想學吓國語。你畀條鍊我幫你整吖。」

我看似專心咁望住嗰條被佢慢慢串起嘅手鍊,但其實雙眼不斷忍唔住偷望佢。
今次係我第一次咁近距離望到佢個樣。
喺頭頂嘅街燈照射下,好清楚睇到佢皮膚白白,面形瘦削。雖然佢戴住副圓圓嘅黑色眼鏡,但都可以見到佢對眼大大,眼睫毛好長,頭髮黑黑,有種小男孩嘅感覺。

「搞掂!你試吓戴睇吓啱唔啱?」佢將條鍊套落我右手。
我回過神嚟:「唔該哂你啊,其實你叫咩名?一直都唔知點稱呼你。」
佢摸一摸自己個頭,靦腆怕醜咁答:「我叫東冬,東南西北個東,春夏秋冬個冬。」
「你個名咁得意嘅!我叫周永晴啊,叫我永晴就得。」

我開始對佢有種親切感,思路亦逐漸變得清晰。
望住佢啲書我問:「點解你會想學國語嘅?」
「因為...我想識一個台灣女仔,所以想啲國語好少少。」佢尷尷尬尬咁解釋。

台灣...?我忽然醒起一啲嘢,如夢初醒。

「我爸爸係台灣人嚟,我都算係半個台灣人啊,如果你有需要幫手可以搵我啊。」
「好啊!咁你識唔識台語?如果我連台語都識埋就更加好!」
「台語我唔算好熟,但基本嘅都可以幫到你嘅。」我微笑答佢。
「哇太好喇!有人教一定好快學識!」

由原本獨自喺公園渾渾噩噩徘佪,我開始每晚都教東冬國語,之前嘅寂寞感亦慢慢淡去。
2020-10-21 19:58:20
自推
2020-10-22 19:55:25
(十)不容有失

「過咗成個星期喇喎,你啲國語學成點啊?」梓軒食住飯,問坐喺對面嘅東冬。
「好過之前好多喇,搵咗個朋友教我。啱啱幾次去書店見到佢嗰時,我都係點吓頭微笑吓,我諗我依家準備好同佢講嘢喇!」
「咁你諗住同佢講啲咩?不如唱返首『我愛台妹』先啦,佢一定即刻搭糖。」梓軒眉戚戚,奸笑住講。
「可唔可以畀啲有建設性嘅建議啊...我打算聽晚去喇。」
「根據我多次嘅失敗經驗,佢之前撩你講嘢喎,點都有啲好感啩?抄咗牌先囉。」

返到太古,東冬去咗公園坐。諗嘢諗得入神,發現原來永晴坐咗喺隔離。
「諗緊聽晚啲嘢?」永晴問。
「你又知嘅?」東冬十分好奇。
「唔知點解,就係知道囉。我哋練習吓啦,廢事你到時對住佢口疾疾咁。」

永晴同東冬喺公園練習咗成晚,佢哋都希望聽晚一切順利。
2020-10-23 18:15:15
pish
2020-10-25 15:56:09
貼前自推一下希望有人睇
2020-10-25 19:13:36
(十一)巧巧天

東冬今晚就去書店搵個女仔喇,我暗地跟住佢,想睇吓佢會唔會成功識到。
我企咗喺啲廣告牌後,希望佢唔會發現我。
佢應該專登揀差唔多閂門先嚟,客人只係得返一兩個。
佢企咗喺等候區後排嘅位置,應該係想等其他客人走哂先埋去?

個女仔好靚啊,黑直嘅頭髮,眉毛修長,眼大鼻尖,身型好標準,帶有啲成熟韻味。
雖然唔笑嘅時候有種冷艷嘅感覺,但一開聲就好溫柔同好好笑容。依種反差感令人心郁郁,好想認識。

唔怪得東冬咁中意佢。

好快其他客人都走哂,剩返東冬同個女仔喺度。
快啲埋去啦!加油啊!
望住佢慢慢行去收銀處,我豎起隻耳仔希望聽到佢哋嘅每一句。

「一杯珍珠奶茶。」東冬好有自信咁用港式國語講。
「好的謝謝,請等一下。」

我偷望,見到個女仔轉身開始整飲品。
東冬似乎有啲緊張,搓著雙手左望右望。
怕被佢見到嘅我亦即刻匿返埋。

飲品整完後,個女仔轉身對住東冬。
「欸...你叫甚麼名字?」係東冬主動問!
「你可以叫我禾姍啊。」
「禾姍...巧巧天喔。」

我聽到東冬啲唔咸唔淡嘅口音都忍唔住笑咗。

「哈哈哈,你們香港人講國語都好可愛!」個女仔笑得好開心地講。
「是嗎...嗯...那可以給我你的IG嗎?」
「不可以...!」

竟然咁決絕...?!

「除非...你先給我你的手機號碼吧!」個女仔繼續講。
「姣啊姣啊...沒問題啊!」東冬似笑非笑嘅聲音,應該又興奮又緊張。

見到佢哋交換埋電話,一切都比想像中順利!

「我來香港以後都好想多認識一些朋友,多多關照了啦。」
「嗯!有甚麼需要幫忙都可以找我啊!」東冬回應。

突然,書店有廣播話夠鐘閂門喇。我靜靜跟住準備離開嘅東冬。
佢一行出書店,我就從後拍佢,「喂!」
「又嚟嚇我...」佢尷尬又無奈地講。
「我睇到哂啊,恭喜你喎!」
佢㩒住個心口對我講:「我頭先個心跳快到就跌出嚟咁啊!」

雖然我當時都為佢感到緊張,但我一啲都感覺唔到自己嘅心跳有快得咁誇張。

「證明你真係好中意佢喎~」我笑住回應。

目送佢返屋企後,我喺公園獨自散步。
見到今晚咁順利,好戥東冬開心啊。
行過水池,行過長凳,行落樓梯,我又經過個小草叢。
望住個草叢,聽到啲不知明嘅跌撞聲,由本來好滿足嘅感覺,瞬間變成不安。
2020-10-25 23:08:03
(十二)神化伊琳

「吓開始咗傾偈喇?!你有無問『小姐,我可以“加你的line”嗎?』」梓軒撲埋東冬度,雙手大力揸落東冬心口。
「你估我係你啊!?咁猴擒!」東冬一手推開梓軒。
「天啊!!點解東冬咁毒都溝到女!我咁靚仔就溝唔到女!」梓軒舉起雙手,對天吶喊。
東冬揮一揮手叫回梓軒,一臉正經講:「你唔好痴線住先,有正經嘢要講。伊琳前幾日返咗嚟,問我哋食唔食餐飯。」
「佢終於working holiday完?我都唔明點解你哋分咗手都仲傾到偈。」
「咁你去唔去㗎?」東冬開始有啲唔耐煩。
「咪搞我喇,個組合咁尷尬...況且我最怕佢成日講埋啲神神化化嘢,又無啦啦拎啲咩靈擺出嚟Fing嚟Fing去。嗰時如果唔係因為同你熟,我都廢事睬佢。」

伊琳係東冬讀緊大學二年級時候嘅女朋友。佢哋一齊咗無耐後,伊琳就決定要去外國working holiday。

雖然佢哋最後因為分隔兩地而選擇分開,但仍然一直保持聯絡。
東冬抱持住見舊朋友嘅心態,約咗伊琳單獨食飯。
2020-10-26 12:19:25
2020-10-27 21:26:38
(十三)陰氣重?

「Sorry啊我遲到,你到咗好耐?」伊琳一邊放低佢啲袋一邊對東冬講。
「唔耐啊你慢慢嚟。搞咩一袋二袋咁多嘢嘅?」東冬急急幫伊琳手放好啲袋。
「啱啱去咗個朋友搞嘅聚會,同佢哋交換水晶啊嗰啲。你最近點啊?」

佢哋雖然已經兩年無見,但都可以一如既往,暢所欲言。
伊琳依然活力充沛,對所有事物都保持開放態度。
東冬仍然係個溫柔,但唔識表達自己嘅男仔。

食完飯後,佢哋去咗附近海濱散步。
海濱不乏夜跑嘅人,東冬同伊琳企喺海邊嘅欄桿後,伊琳神色沉重望住東冬。

「做咩事?」東冬碌大對眼對伊琳問。
伊琳呼一呼氣:「其實今晚一見到你嗰陣,我已經覺得你陰氣好重。開頭我懷疑只係間餐廳令我有依種錯覺,但出咗嚟之後我都仍然有依種感覺。」
「陰氣重....?即係咩意思?」東冬一臉茫然。
「你最近有無去過邊度?或者有無咩唔舒服?」
「無特別去邊度喎...成日都係留喺太古咋。唔舒服就淨係肚痛咯,但你知我不嬲玻璃肚㗎啦。」

伊琳喺佢其中一個袋攞咗條水晶頸鍊出嚟:「你戴住佢吖。」然後慢慢將條頸鍊套落東冬條頸,東冬亦好配合咁垂低頭。
「咩嚟㗎?」東冬拎住條頸鍊問。
「我個朋友畀我㗎,好有用。你就咁戴住佢就得,希望你會精神返啲啦。」

東冬送完伊琳返屋企後就返太古。
經過樓下公園,東冬坐低喺長凳,想睇吓會唔會撞到永晴。
當晚沒有月光,佢亦覺得天氣好悶熱,所以坐咗一陣都唔見永晴,就決定返屋企。
2020-10-28 19:34:22
(十四)意外驚喜

東冬自覺最近飲奶茶無咁易肚痛,所以好放心日日都去書店買嚟飲。
佢依舊夜晚去到,今晚幸運地只係得禾姍一人當值。

「嘿你來囉,你最近好像每晚都來耶。」禾姍好熱情咁對東冬講。
雖然佢哋每次都只係閒聊幾句,但東冬已經開始熟習用國語溝通,所以說話越嚟越放鬆同有信心。

閒談間,佢哋發現大家都係住太古公園嗰邊。

「原來我們住這麼近!」禾姍高興講。
「你公司對你很好啊,都安排附近的。」
「是喔。不過...不久以前有人在我住的那座跳樓自殺,最可怕的是還壓到了人呢...你知道這個嗎?」
「吓...我沒記住啊。」東冬對於屋企附近發生過件咁嘅事都嚇咗一嚇。
禾姍繼續講:「我蠻怕這些的,特別是有時候很晚才下班回家的時候...欸我先幫你沖飲料吧。」禾姍轉身。

「辛苦你了,經常要加班。」東冬對住禾姍背面講。
禾姍整完飲品擰返轉,對住東冬笑瞇瞇講:「不會啦,只是工作而已嘛不辛苦啊。」
依回眸一笑令東冬全身發熱,頓時怕醜起嚟。為咗唔被禾姍見到自己面都紅哂,東冬即刻低頭搵銀包準備畀錢,慌手忙腳。

「不用付啦!我請你喝吧!」
「吓...?真的嗎?」東冬抬起頭愕然問。
「對啊,沒問題的不用擔心。欸我發現你的國語越來越好勒,是有在學嗎?」
「是啊有朋友教我,所以學得蠻快。」
「哇你朋友很好勒!有時間也可以學一下台語啊,我也在學。」

突然,有對情侶企喺東冬後面排隊。
東冬隨即讓開個位,同禾姍互相揮手道別。
2020-10-29 22:10:45
(十六)看見了嗎

東冬琴晚成晚都輾轉反側,訓得唔好,所以今日訓到好晏先起身。
訓醒後仍然不斷諗住永晴嘅事,於是打畀梓軒傾吓。

「喂!做咩打嚟,掛住我啊?」梓軒一接到電話就講。
「唔係...想搵你傾啲嘢。」
「又講台妹?識得問人『多少錢?』未啊?」
「無問喎...佢主動話唔收錢。」
「吓!!!連『How much』唔使問?!天啊!!!依個乜鬼嘢世界嚟!公平咩?!」

東冬只係嘆一口氣,無奈回應一句:「咁你信唔信依個世界有鬼吖...?」
「我見唔到佢嘅話,有無鬼又關我鬼事咩。」
「咁如果見到呢?你會唔會驚?」
「睇吓佢係咪靚女鬼囉~如果樣衰嘅話佢係人係鬼都得人驚啦吓嘛!」
「我可唔可以cut你線?」
「唔可......」
嘟。

東冬實在無辦法繼續段對話。

佢醒起應該問依方面嘅專家先啱,於是打開Whatsapp,㩒入伊琳個對話。


「伊琳,其實依個世界係咪真係有鬼?」


「做咩無啦啦咁問?」

「我懷疑自己見到」


「原來真係...我畀咗條頸鍊你戴你都仲見到?」

「吓原來有關㗎??!」


「梗係啦...嗰晚見到你啲能量咁弱
條頸鍊可以幫你辟邪同保平安㗎
你戴咗都仲見到???」

「哦哦~唔係啊依家無見到喇
唔該哂你 咁關心我」


「你有咩唔妥要同我講喎...唔好又收收埋埋咁」

「我唔會啊 放心」


「下星期搵你食飯吖」

「好啊」




東冬彷彿明白點解最近唔再見到永晴。


雖然起初佢不禁有心寒嘅感覺,但慢慢回想起永晴晚晚教佢國語同幫佢識禾姍,東冬其實已經當咗永晴係好朋友。
或者梓軒都有佢嘅道理,如果隻「鬼」同人無咩分別嘅話,咁有咩好驚?

東冬拎住條頸鍊,喺自己間房裡坐立不安。
佢諗咗好耐到底仲應唔應該戴條頸鍊。
佢甚至有諗,會唔會其實唔戴都唔會再見到永晴。

但依一切諗法都只係流於猜想。
唯一可以證明嘅方法,就係試一試。
佢將條頸鍊放入櫃桶,換衫落樓下公園。

今晚公園嘅人唔多,東冬一路行一路左右望。

『見到喇。』

『真係佢。』

東冬緩緩行埋去長凳,坐低。
佢哋兩個並肩而坐,望住前方沉默。

直到東冬「喂」一聲。
永晴即刻擰轉頭望住仍然望住前方嘅東冬,愕然。
2020-10-29 22:11:05
已正評
2020-10-29 22:55:14
多謝蕉熊巴
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞