[愛情][奇幻] 麥東冬

大家好依個係樓豬第一次寫嘅愛情奇幻故
成個故嘅內容基本上已經定好哂，所以一定會定期更新，絕不走數

樓豬亦開咗個penana方便追故
https://www.penana.com/user/85538
希望大家中意同多多支持！

事不宜遲，即刻開始！

（一） 太古公園

深夜時份，我喺公園呆坐。無月光。
今晚太陽一落山個肚就開始唔爭氣，好肚餓。
附近壽司店、炸雞店都唔啱口味。個肚明明空空如也，但感覺一啖飯都吞唔落。
飢餓感令到頭腦都一樣空洞，好多事似乎都記唔起。

但我記得，我曾經喺依個公園唔見咗嘢。

公園裡面有個小草叢，專心聽嘅話可以聽到裡面有奇怪嘅碰撞聲。
我嘅目光離唔開個草叢，感覺有啲嘢就快跌落嚟。

路過餐廳外嘅玻璃，倒影裡嘅人蒼白無比。
依個真係我嚟？
我望住自己，視線轉到身後坐喺長凳嘅男仔。
佢彎低身雙手㩒住個肚，好辛苦咁。

我裝作散步，坐喺佢隔離嘅長凳，觀察一下有無嘢可以幫到佢。
哇...皺成一團嘅眼耳口鼻喺一塊蒼白嘅面上，同我嘅可以一比。
全世界都睇得出，你肚痛嘛。

突然，個男仔企起身跑走咗。

（二）熱血青年

「咁樣飲落去真係唔得。」麥東冬諗起嗰陣味都想嘔。
「你睇你塊面白到成隻鬼咁，人哋見到你都驚驚啦。」張梓軒笑住講。

梓軒係東冬讀大學時嘅同窗好友，佢哋都係啱啱畢業，放緊假。
東冬大部份嘅好朋友都係中學同學，大學嘅大多數係點頭之交，只有同梓軒格外投契。

「真正嘅蒼白你一定未見過。喺我屋企樓下有個女仔好得人驚，臉色仲白過張紙。」
東冬係諗起非常肚痛嘅嗰晚，坐喺隔離個女仔嘅樣。
佢著住白色恤衫，淡藍色長裙，長到掂地。黑色長長直髮，身形瘦長，臉卻圓圓。
嘗試繼續記起佢嘅容貌，一陣寒意突然蔓延全身，打斷回想。
原來啱啱唔自覺飲咗一啖冰水。

「依個世界應該得你先會飲奶茶飲到肚痛啦！」梓軒掩住個嘴笑住講。
「唔係點吖？佢親手為我整嘅我就一定要飲！」東冬滿腔熱誠，昂首挺胸。梓軒見到都感同身受，頓時熱血起嚟。
「原來已經癲成咁，你要唔要睇醫生啊？仲要係精神科嗰隻！」梓軒再講。
「廢事同你講。我要去書店喇，佢應該啱啱當值。」話音未落，東冬消失喺人群裡。

東冬只係知道依個書店女職員每個星期有三四日喺飲品區返工，實際嘅當值表東冬仲係摸索中。
而每日去書店一趟亦成為東冬生活嘅一部份。
佢慶幸依個女仔嘅出現，令原本淡乏無味嘅生活添了幾分色彩。

（三）看見

有時侯我覺得自己只係個無魂有體嘅軀殼。
唔記得幾時開始，我染上遊蕩嘅惡習。
我亦身無分文，只係得裙袋裡一條莫名而來嘅水晶手鍊。

又行走喺太古公園，前後來去，沿住花園行幾個圈，晚晚如是，無法自制。
至於原因，我不得而知。
咁樣講好似好唔負責任，畢竟我都有家人，有家要歸。只不過佢哋都無落力搵我嘅下落，我亦無心返去。

今晚月亮好靚好圓，我坐喺同一張長凳，拎條手鍊出嚟，欣賞一下水晶上面月光嘅反射。
公園裡面雖然蚊蟲唔少，但我望一望對手，竟然幾個鐘都無被咬。

之前肚痛然後跑走嘅男仔又坐喺我隔離。
佢手拎住同一杯飲品，應該係新流行嘅奶茶，喺附近書店有賣。
我好似都有飲過啊，係喺間書店啱啱新開嘅時候。
去睇書嘅人唔少，飲品區更加大排長龍。
我同朋友都本住湊熱鬧嘅心情買過一次。不過我哋飲完第一個反應係：「嗯。」
味道唔算特別吸引。

唔通我認錯人？個男仔自己喺度傻笑，同上次見到嘅判若兩人。
但我認得佢個背囊。墨綠色嘅舊款式，側邊仲放咗一個自備暖水壺，老套得同佢年紀完全脫勾。
佢咬住支飲管，好似食糖一樣，嘴角分明向上揚。
依區都算係高級嘅屋苑，但無論路人或者住客都愁眉苦臉，成副地上執到金都笑唔出嘅樣。
見到佢發自內心嘅微笑，暖意湧上我心頭。

身體好耐都無溫熱嘅感覺。我失一失魂，手上嘅水晶鍊跣咗落地，斷開咗。
水晶滾去四散，好似競賽跑步嘅螞蟻，快到我無辦法踩住。
以為幸運咁欄住一粒，但都係喺空隙碌走咗。
響聲打斷晚上嘅寧靜。
佢應該都被嚇親，目光好明顯轉到我依邊。

推

推

多謝幫推

Pishhhh

G chi YY

留名

樓豬唔記得post封面

多謝支持

Yo Mew

（四）深度失憶症

佢企起身，繼續咬住飲管，彎腰執起停喺佢腳邊嘅水晶，半走半跑咁過嚟，沿路又執起幾粒，最後停喺我半米外。
依一連串動作我都眼定定望住，坐喺度郁都無郁，諗唔到畀咩反應。
佢同其他人唔一樣？
佢無扮睇唔到我。

「拿。」佢開口。
一把好溫柔嘅聲音。又再飲一啖奶茶。
我試探性咁伸出右手，期待佢將水晶放喺我手心。
「一隻手可能拎唔哂？」佢再講。
我無望佢個樣，但含糊嘅聲音，聽得出應該仲有奶茶喺口裡面。
我伸出另一隻手，雙手準備接住水晶。
等咗一陣都未有水晶落喺手上。
我抬頭，見到佢打側頭擰向膊頭。
原來奶茶喺佢啱啱講嘢嗰陣漏咗出嚟，佢慌忙咁抹嘴。
我忍唔住低頭暗笑。

「唔該你。」我講。

我幾耐無開口講嘢呢？
本來想講多幾句多謝嘅說話，但望住條斷開咗嘅手鍊，我又走咗神。
「咁靚嘅手鍊斷咗，好可惜。」佢似乎無離開嘅意思，企喺我面前，再細細聲講：「如果佢都跌嘢就好...」
我望一望佢，心諗：『嗯？佢自言自語定同緊我講？』
「你住附近嘅？」佢問。
我嗯一聲當作回答，雙眼仍然離唔開手鍊。
佢嘆氣：「你成日都咁夜，自己一個小心啊。」然後轉身向大廈方向走。

我繼續坐喺公園，望住手鍊，強烈嘅恐懼同不安感突然浮現。
更有股欲望好想串返埋啲水晶，我唯一嘅財物。
但...我身上竟然一蚊都無，就連屋企喺邊都記唔起。
我抱膝而坐，睇住路過嘅人對我視若無睹，孤獨感好似秋風一樣包圍住我。

自推

（五）風雲人物

下午三點，踏出太古站，東冬一支箭咁踏上舊路。
轉幾個彎，行幾小段路，由踏出地鐵車門一刻計起，短短三分鐘就到達目的地。
東冬慶幸自己住喺太古，地方唔太大又唔算細，佢嘅喜惡哀樂全都藏喺依個地方。

今日係書店奶茶買一送一優惠，吸引好多人嚟幫襯，人海多到幾乎覆蓋咗成層書店。
東冬視線左右掃過人海，自動尋找老早就印喺腦海嘅身影。
除咗依個女仔之外，東冬都記唔清其他店員嘅樣。以身型概略估計，依度全部都唔係佢。

排咗成個鐘終於買到嘢飲嘅東冬，仍然見唔到佢嘅蹤影。
垂頭喪氣準備轉身之際，東冬聽到一把女聲：「沒茶了，要麻煩你去加啦。」然後旁邊嘅女店員就急急走入倉庫。
東冬隨即雙眼發光，抬頭正好見到佢。
只要可以見佢一面，東冬覺得等咁耐都係值得。

忽然，有個記者衝出嚟欄住東冬，急住同佢做訪問。
「你好啊！想同先生你做個訪問啊。」
「吓，好…」東冬唔識拒絕，無奈答應。
「先生請問點稱呼？」
「東…東冬。」
「你係為咗今日個『奶茶優惠』而嚟嘅？」
遲到嘅梓軒見到東冬尷尬嘅表情，喺鏡頭背後笑到用對手遮住塊面。
「嗯…都算係嘅。啊唔該…我個樣可唔可以打格仔？」
「好！無問題。咁想問你係唔係第一次嚟幫襯？」記者繼續追問。
「今日係第一次，我平時成日嚟。」
「啲奶茶有咩咁吸引到你？」
「依度嘅環境啊，人啊…」東冬偷偷望向忙碌中嘅佢。
「咁你最中意飲邊款奶茶？」
「嗯...我最中意珍珠有奶茶。」
東冬開始面容扭曲，語無倫次，梓軒睇得出佢有幾想離開現場。

依段訪問片段喺網上各平台迅速流傳，東冬成為網民一時嘅討論對象，被貼上「格仔毒男」嘅稱號。佢亦因為覺得太難堪，所以成個星期都唔敢再去書店。

裸體巴

pish

（六）一杯珍珠奶茶

一星期後，東冬誓要今晚開口認識佢，於是提早嚟到書店，舒緩緊張心情。
他徘徊喺心理學區，想搵本書。
聽梓軒講，第一印象對日後發展影響好大，所以東冬想知道點樣開場先可以留個好印象。

依本寫：「為了讓對方留下深刻印象，就不能有所保留。」
又有一本寫：「當我要跟別人說話時，通常第一句是『你喜歡自己嗎？』」
『九唔搭八咁嘅……』東冬心諗。
行嚟行去，翻開十幾本書，仍然未諗到第一句應該講咩。

店裡面嘅客人已經寥寥無幾，原來唔經唔覺距離閂門只有十分鐘。
東冬開始緊張起嚟，啱啱收集到嘅金句都忘記得一乾二淨，一句都諗唔起。
得返五分鐘！東冬諗起梓軒成日掛喺嘴邊嘅口頭禪：「信自己！唔驚！」

『唔理喇！去咗飲品區先算啦！』

因為就快閂門，只係得返一個客人等緊飲品，職員亦都係得個女仔一人。
東冬慢慢行到收銀處，一步一驚心。
望住佢嘅背面，有種講唔出嘅矛盾。又想佢快啲轉身，但又未諗到講咩好。
東冬聽到噪吵聲越嚟越大，唔知係奶茶機器聲，定係自己嘅心跳聲，就嚟要爆炸一樣。

『算喇，都係平時咁，一句「一杯珍珠奶茶唔該」就算。下次再努力啦……』東冬安慰自己。

機器聲停咗，奶茶完成。
「謝謝，歡迎下次再來喔。」佢對客人講，然後向收銀處行過去。
東冬吞一吞口水，準備講出口了。

「欸，你常來耶，是住附近嗎？」佢問東冬。

依句說話令東冬有股前所未有嘅電流由腳底湧上每一條頭髮，同對方四目對望。

自推到有人睇