人哋覆
⚠️20:00更新
今日星期日,明明安排咗自己返半日工,希望可以 family time,結果OT兩個鐘,照顧埋家庭,打開電話,自己都嚇咗一跳,多謝大家嘅關愛
首先我無加入其他群組,為保障自己情緒,亦都冇打算去嗰邊爬文,但係已經有不少朋友cap圖俾我睇,當時人有公開道歉,無論男女朋友之間有冇共識,當事人出嚟講咗對唔住,我就接受當事人講嘅對唔住,事情告一段落,祝你同honey健康愉快
—————————————————
「莫道你在選擇人
人亦能選擇你」
呢個世界唔係喺網絡講幾句,就等於自己啱晒;不等於你一廂情願將自己個角度講出嚟,就係the truth the whole truth and nothing but the truth,反正網絡世界就充斥着fake news
第一點:全公司有閉路電視同埋有錄音,在診症房清楚解釋要驗兩種內分泌,要抽兩次血(既然你都話自己讀醫護,抽一次血可以驗幾樣嘢,常識吧?尤其是動物,郁咗就要抽多次,可能驗一樣嘢要抽幾次,又可能抽一次驗到幾樣野,清楚了嗎?)在症診室清楚講咗要打針入去,有錄音,我翻睇咗CCTV,睇吓自己有冇講漏,係冇講漏嘅!如果唔係,我做乜要你隻狗留低?我明白你當時情緒激動可能聽唔入耳,因為我睇返CCTV,你係望住男朋友,冇望住我,但反而你男朋友望住我點咗頭;你可以話你聽唔到,因為在你角度是真的,但係唔可以冤枉我冇講過。
第二點:連同場客人作人證都話,嗰日我有同你講症,有解釋過個病,連其他人都聽到,你反而聽唔到。我有同你講你隻狗有分離焦慮,下次嚟你要抱住佢等。收入籠等驗血,其實絕對是正常步驟;元朗家庭式診所,我無辦法將所有等待驗血的動物free run 或有足夠空間比所有主人抱住來等;有天你總會找到你心目中適合的診所。你心目中嘅貼心安排,恕我哋未能做到。
第三點:我入房講同出lobby講,絕對冇分別!香港地方淺窄,當日你同你男朋友嚟嘅時候,明顯見到有好幾個主人等緊,全個lobby都係狗,其他全部10幾歲、全部大病過你隻狗,唔好意思,我係會用多啲時間心機係佢哋上面,大症當然講耐啲,要睇超聲波同X-Ray先需要入房,同你隻狗品種絕對無關。我諗識我嘅人都知我鍾意領養動物。既然5分鐘講得完嘅嘢,咁我就會喺lobby講,當時如果你唔明,應該即時表達。唔係默默俾錢埋單拎藥,之後一肚問號一肚氣,你當日離開冇耐已經即刻再打電話黎喊住問係咪自己整病隻狗,我哋姑娘好耐心咁解釋左呢個係內分泌問題,如果唔明,你可以再打嚟;如果唔信,可以睇第二間,second opinion每位醫生接唔少。你嘅handling 唔應該係之後在背後攻擊我們。如果你不相信,你當刻可以即時不付錢不拎藥。
第四點:男醫生對你幾好係一回事,我對你公事公辦,絕對冇冇禮貌,不喜歡,找第二個,如題。我冇時間每一個主人談笑風生半個鐘九個字先入正題,我淨係可以講,我比較full booking 
第五點:到今時今日仍然未有另一間診所問我攞病歷,究竟你有無醫隻狗?因為我電腦就寫你應該聽日複診嘅。我唔在乎你唔翻嚟,我全間診所亦都唔會再睇你,我係在乎隻狗啫!不過唔緊要,你都將收據同驗血個報告擺晒上網,似乎我冇需要email 病歷
第六點:唔好PO完,比其他人鬧就del原PO,話自己「過大」,然後又唔順氣走去PM其他人,再去其他群組PO;明人不做暗事,你可以直接嚟搵我,也有消費者委員會、獸醫管理局等等。上網鬧交,在我來說有點像在街市的三姑六婆,所以我思量了很久才出這個post,但我覺得沒理由被人不明不白長期攻擊
第七點:我份人點樣行醫,我諗10幾年唻,其他客人最清楚;淨係今日星期六我嘅客人,有將軍澳、大埔、九龍入嚟,未計元朗本區。我啲姑娘全部晏晝三四點先食飯,唔好彩嗰日係無飯食、一唔係就OT幾個鐘;我哋已經用盡我哋嘅能力去處理每一個客人嘅需要!所以請不要彈劾究竟姑娘能唔能夠抱起你隻狗、佢條狗帶有冇摟轉!
如果你內心有不滿,或者心情上唔好,請以理性同埋包容嘅角度,寬容地同我哋講,而唔係一面倒上網打,我哋絕對冇回應嘅機會;我大你咁多年,我可以同你講,小妹妹,當你畢業終於成為醫護後、企喺件事嘅另一邊,你就知道你今日嘅行為,係會對醫護人員造成幾大嘅傷害,同埋幾大嘅打擊。你今日睇到呢篇文一定好嬲,你10年後再睇返,你會有唔同嘅感覺。