《家姐話,幫我追女仔》

1001 回覆
561 Like 17 Dislike
2020-10-07 00:32:31
我問家姐:「你同輝哥而家點?」

婷婷用疑惑嘅眼神望住我,好似喺度問緊:又邊撚個呀?

OK,婷婷當然冇咁粗魯,只係Who? .gif咁樣,係我自己亂咁幫佢加對白㗎啫。

我補充:「輝哥係家姐男朋友。」

家姐聽到,好似想解釋啲咩,但轉一轉眼珠,又冇講出聲;婷婷即刻講:

「恩姐有男朋友啦?」

事實上,家姐過成點係冇人知,佢Instagram account唔po嘢,簡介又淨係得一枝香港旗,唔係聽佢親口講,其實唔會知佢嘅個人生活。

「唔係男朋友……我哋冇一齊到。」家姐話。

婷婷好似好想側頭,但又忍住呢一種誇張:「咁——啫係點啊?」

家姐個口係咁開開合合,最後只係講到一句:「就係冇一齊到。」

我解釋:「嗰個男仔話鍾意家姐,已經好close,但話唔想一齊,一直拖住家姐囉。」

婷婷即刻放得手上嘅叉:「衰人嚟㗎喎!」

可能因為婷婷講嘢大聲過平時嘅關係,所以家姐都嚇一嚇,望住佢;婷婷繼續講:

「我唔明啊,咩叫鍾意但又唔一齊?點可以咁㗎,咁咪係咪代表冇鍾意到可以一齊?所以先一直拖住?」

好波!好波!婷婷同我諗嘅嘢係一模一樣,甚至佢冇見過輝哥都咁覺得,叻女呀!

我附和:「係囉,垃圾嚟。」

家姐低頭食嘢:「唔好咁講啦,佢唔係咁衰㗎。」

大家明唔明呢種感覺,明明你已經提咗一個人好多次,甚至好多人都想幫吓佢,但佢係都執迷不悟,仲要維護嗰個會傷害佢嘅人——真係令人好忟憎呀!點解家姐會咁呢?畀輝哥落咗降頭?

明明家姐平時都係醒目女啊!

「而家係A0嘅我同婷婷都睇得咁透徹過你喎。」我話。

家姐即刻用咗一個好凌厲嘅眼神望住我,OK,啫係叫我收聲,可能佢唔想畀婷婷知道咁多,破壞佢嘅形象。

「唉,愛情真係好難。」婷婷突然咁講:「恩姐,你實明某一啲好在意、但唔肯講出口嘅時刻。」

婷婷轉咗文藝腔,然後同家姐對望,呢兩個女仔完全無視我,尤其是婷婷,眼尾都唔望吓我。

「做咩啊?有煩惱?」家姐快速咁睄吓我。

婷婷成個人都好正向咁對住家姐:「唔係話煩惱嘅,我想佢知,又唔想直接講,如果唔係我就好似好怪。」

阿俊同Winnie突然咁熟,其實……我好在意。所以,我而家同恩姐講,咁阿俊都會聽到。

到我用Who? .gif嘅樣望住婷婷,但佢都係完全冇望過我。點解?幾時又有一個佢?我已經日日同婷婷一齊,但我都係唔知嘅?

突然殺出一個程咬金,我覺得好絕望,呢段時間嘅一切追求,對婷婷嚟講其實係咪冇意義?

家姐答:「我明啊。真係少女情懷總是詩,同其他人唔同。」佢刻意咁望我,我就係佢口中嘅其他人……

但而家我笑唔出,因為就算家姐咁樣向婷婷眼神示意望住我,婷婷依然冇望過我一眼。

婷婷心裏面諗緊其他人——

唔係我。

「我見到兩個、我都好鍾意嘅朋友,無啦啦好親近,唔知點解我完全唔開心。」

終於開到口,其實我成個人都好緊張,可能都因為心虛,完全唔敢望阿俊;唔知而家佢見到嘅我,係咪好木頭公仔?

「係咪一男一女?」家姐問。

「係。」

我一聽就聽得明,婷婷呷緊醋,只係唔知係邊種。如果真係愛情呢?我好不安。

「哦……嗰個男仔。」家姐答,但又微笑。

「係。」婷婷細聲咁答。

吓,邊個?男咩仔?
2020-10-07 00:34:09
家姐話:「明。」

「我覺得,唔應該係咁,而且好似好突然。」婷婷下意識搖頭。

其實係咪我自私?明明係好事啊,大家都變成好朋友。

兩男一女嘅友情——如果真係友情,婷婷會咁慌亂咩?睇怕,係愛情。點解要咁殘忍,喺我面前講呢啲?

家姐問:「咁點解唔問佢哋是但一個?」

婷婷答。「因為……佢哋就算親近,都唔係出奇嘅事。我冇資格理咁多……」

或者係,我唔想、唔敢問,怕聽到一啲唔鍾意嘅答案?

呢個答案到底係啲咩?


婷婷咁卑微,為咗其他人、其他男仔;但唔係為咗我。

屌,我聽緊啲乜啊?我同其他男仔唔同,唔會令你受呢啲委屈㗎,我都冇同其他人close,除咗郭靖。

「你鍾意咗個男仔噃,唔再係得好感啦。」家姐話。

唔知點解,家姐望住我笑得好開心——有冇搞錯,你唔到先黑晒面㗎咩?竟然幸災樂禍。睇人仆街係咪真係咁開心?

明明家姐你,知道我係有幾鍾意婷婷啊。

唉,仆街嚟。

但係,婷婷一聽到家姐咁講,突然好驚咁望住我——係,同之前一直無視我唔同,佢而家望住我,再即刻望返家姐,然後抿嘴、皺眉、碌大隻眼。

吓?真咩?死啦,佢會唔會發現,我講緊佢?仲要係鍾意?

婷婷做咩咁驚?係因為突然醒起,冇同我講到啲秘密,驚我覺得我哋唔夠老友,而唔開心?

如果我唔開心,唔會係因為咁囉。

唉。

會唔會好明顯呢?但睇阿俊唔點出聲,應該都冇發現嘅。

結果,呢一餐飯,得家姐開心、好好心情,佢話,係因為我哋兩個着住校服咁食飯,令佢覺得好青春,好似返返去舊時咁。

我盡力睥佢——係呀係呀,青春包括女神鍾意第二個,係咪?

而婷婷,就成個人都面青青咁,冇咩反應。

總之,得家姐開心,真係唔明佢做乜勁;反正我少躁底……

食完之後,婷婷就話要走;我送佢出去,一路上,我哋都冇講嘢,各懷心事咁。

就算似係講咗出嚟,都仲係好唔舒服咁,可能係因為,阿俊——呢個我想佢知嘅人,接收唔到我嘅信息。

婷婷行行吓,問:「你最近有咩——唔同?」

我想問,佢同Winnie嘅關係變化。但一諗到,恩姐話代表我鍾意咗阿俊,即刻覺得好混亂。

「你?定我?」我疑惑。

咩問題嚟?我以為,婷婷係問緊佢有咩唔同,啫係剪頭髮嗰啲before and after。

「你自己。」婷婷答。

「冇啊,冇咩。」我話。

最唔同,咪就係今日頹咗好多囉……唔通又同你講咩。

冇啊?係咪因為唔講得?定係我呢條問題問得好差?咁算啦。

我同婷婷講拜拜,佢好似苦笑咁望我;我都同佢一樣。

行返屋企,都係失魂落魄。

家姐見我入屋,就笑一笑:「一齊share班戟啦!」

「冇心情。」我敷衍。

「點解?」

「你明明聽到㗎喎,仲喺度偷笑添。」我不忿。

「你哋真係戇鳩鳩,兩個都係讀書讀上腦。」家姐唉咗一聲。

咩話?

家姐你仲戇鳩啦,畀仔呃。做咩而家笑我哋呢?
2020-10-07 00:38:26
下次加更係300正皮
樓主ig: chingceciii
https://instagram.com/chingceciii?r=nametag
Penana:https://m.penana.com/user/73839
可以fol我,同埋追返啲舊故
另外《相愛十年》實體書而家發售,
有興趣可以dm我或者上penana買!
2020-10-07 00:38:48
呢個故真係好可愛
上兩個故喊到我死 但係依個不停咁笑緊
2020-10-07 00:42:46
家姐你再唔醒就真係戇鳩鳩喇
2020-10-07 00:44:34
做咩又咁多誤會架,郭靖你條粉皮快D救場啦。
2020-10-07 00:52:04
三個都係on99
2020-10-07 02:56:19
好青春好sweet
2020-10-07 03:35:33
呢兩篇sweet到糖尿 嗰種呷你醋想你知但又心驚膽戰唔想俾你發現 不過又會因為你發現唔到而唔開心
青春呀
2020-10-07 10:14:35
我諗起我男上司叫我做野都可摸耳幫手xxxx
2020-10-07 11:44:49
想睇家姐俾人呃豬食
呀婷又on99咁懷疑男主同女frd

乜現實真係有咁蠢既人咩
2020-10-07 12:17:21
2020-10-07 20:21:57
輝:多謝你
俊:
2020-10-07 20:23:57
畀你哋講到我都覺得真係好青春!
冇試過是否人生遺憾
2020-10-07 22:11:40
試過之後到最尾都係得唔到可能仲遺憾
2020-10-07 23:10:33
有文未
好緊火呀
2020-10-07 23:45:27
調返轉諗
試過嘅就冇試過你呢種遺憾
2020-10-08 01:03:04
家姐你仲戇鳩啦,畀仔呃。

「屌你啦,幸災樂禍、黑心、仆街仔!」我咁樣同家姐。

「吓,你咁樣鬧我呀?」家姐扁一扁嘴:「如果真係災禍咁唔開心,我會笑得仲勁啲囉。」

「咩意思?」我唔明。

「阿婷同邊個熟啊?」家姐問。

我諗吓婷婷身邊嘅男仔,除咗為咗揾我而出現嘅郭靖,都係得我咋。

「我囉。」我不假思索。

「唔係啊,女仔朋友。」家姐望吓天花板。

「哦……Winnie,佢哋最熟。」我答。

「你同Winnie熟唔熟?」家姐問。

「唔熟。」

「咁最近有冇傾偈?」點解家姐咁似查案咁審犯?

「有。」我諗起同Winnie嘅WhatsApp對話,家姐話晒都係我軍師,所以我攞部電話畀佢睇:「嗱,咁咋嘛。」

「呢個時間唔係返緊學㗎咩,做咩你哋要用WhatsApp傾。」家姐碌到去今日十點鐘嘅對話,疑惑咁問我。

「婷婷喺我隔籬。」係啊,否則婷婷就會知Winnie話我哋sweet。

「咁佢實見到晒啦。」家姐恍然大悟,敲咗兩吓枱。

「So?」見到講咗,唔見內容咪得。

「呷醋囉。」家姐向後挨凳。

「吓,呷咩?我點會搶走佢好姊妹、取代佢地位?有棍嘅我唔做呢啲事。」有婷婷乜都得,冇婷婷乜都唔得。

「阿婷呷Winnie醋呀死蠢。」家姐打埋喊露。

「吓……有咩好呷呀。」我唔明。

平時諗嘢好快嘅家姐,竟然面有難色,不斷整理語句:

「你自己都識講婷婷得你一個男仔朋友,咁仲有邊個啊;你又同Winnie有傾有講,咪就係話你哋囉。」

「可能佢仲有其他朋友,我唔清楚啫。」一諗起就心灰。

「唔係,佢真係講緊你。」家姐堅定。

「唔使𠱁我。」唉。

「信我啦。」家姐笑。

「憑咩?」我反晒白眼,鑊鑊都話信你,你連自己都未搞得掂喎。

家姐攞出電話,WhatsApp婷婷:「細佬唔係鍾意Winnie。」

婷婷秒回:「點樣肯定呢?」

哇,啫係家姐講得啱,真係我同Winnie令婷婷唔開心?點解家姐一講婷婷又get?傾得就流暢嘅?不過喺我諗緊嘅時候,畀家姐打斷咗。

「佢同Winnie熟,係因為——」家姐打打吓,問我:「咩理由呀?唔係要我直接爆你吓話。」

「因為——哦!婷婷就嚟生日,問Winnie佢鍾意啲咩。」

我一邊講,一邊照住打,只係見到婷婷好快手咁覆咗個WhatsApp sticker。

家姐講:「得啦,OK啦。」

之後婷婷仲有send嘢嚟,但家姐就已經收起電話,懶神秘唔畀我睇,然後問我:「開心啦?」

「有咩開心,我畀人誤會喎。」我疑惑。

「你冇專心聽婷婷講嘢?」家姐皺晒眉,又好嬲又好笑。

「有。」我點頭。

「啫係冇專心聽我講嘢,或者聽完唔記得囉,唉。」家姐搖頭。

「你鍾意咗個男仔噃,唔再係得好感啦。」家姐話。

我淨係記得婷婷有男仔friend,然後佢呷醋唔開心,知道咗呢個人係我之後,我就覺得以婷婷唔多朋友,可能驚我同Winnie是但一個會同佢冇咁friend。其他唔記得啦。

「而家都搞掂咗,OK!」我施施然。

*

我望向細佬,真係覺得——佢戇鳩鳩。

我已經講咗啲充滿提示嘅嘢,不在於推測嘅「你鍾意咗個男仔噃」,而係在於已經肯定、婷婷又慌張回應嘅「唔再係得好感啦」

唉,你咁樣點追女神呀,雖然,你女神同你一樣都好天真可愛啫……

婷婷再WhatsApp我:「唔好爆我對阿俊有好感吖……唔該恩姐,睇吓佢知唔知TAT」

但係,我又莫名睇好佢哋呢對,好襯好夾,望住佢哋,覺得愛情可以好簡單——點解我遇唔到呢一個真心真意追求我、想同我一齊嘅人呢?最弊嘅係,我竟然已經接受「我遇唔到」嘅呢種諗法,唉……

加油呀細佬,其實你已經贏在起跑線,再叻啲,就可以收尾啦。

*

到我WhatsApp婷婷:「你誤會咗啦,我同Winnie唔熟,放心啦,我哋都會一直陪住你!」

-
樓主ig: chingceciii
https://instagram.com/chingceciii?r=nametag
2020-10-08 01:03:17
2020-10-08 01:04:05
好純真你會永遠記住佢
2020-10-08 07:42:20
一朝早睇啲咁sweey嘅嘢可以開心返學啦
2020-10-08 08:04:03
2020-10-08 11:09:12
唔知點解鐘意睇家姐嗰邊多過細佬
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞