因為ex，我決定向全世界嘅女人報仇10 (真大結局)

外轉 （二）

11:30 PM
Rachel: Hey 得唔得閒呀

咁多個fd入面，得Nora知道我同呀文啲嘢。嗰次呀文同Nicole去左台灣，我就係同Nora一齊去飲酒...。記得嗰陣時我仲要飲醉打左比呀文...，勁尷尬。

Nora: 做咩呀 我就訓啦 Zzz🥱聽日6 點起呀
R: 陪下我啦😭😭佢到依家都未番屋企 我好擔心佢呀...
N:吓 咁夜 佢唔係同個Ex一齊咩
R: 嗯...
R: 佢話去拎番條屋企鎖匙
N:但係拎鎖匙洗唔洗拎咁耐呀
R: 我都唔知呀
R: 我唔想搵佢 廢時搞到我好似唔信佢咁
N: 嗯。但係你真係信佢咩？佢之前有冇試過咁呀？

我唔想同佢講之前呀文同Nicole 又攬又錫嘅事，我唔想呀文係我啲fd面前尷尬。

R: 都無嘅
N: 唉 真心嘅 你唔好咁信佢啦 我唔想你比佢呃 佢咁夜唔都番 又無同你講咩事 你真係覺得無事發生？
R:但我可以點，打去同佢嘈？定衝去搵佢呀...
N:你冷靜啲啦⋯⋯
R: Sorry 我好似發左你脾氣咁🥺 你訓先啦 你聽日唔係番早咩
N: 你掂唔掂嫁 我可以陪多你一陣 唔訓都陪你衝出搵條仆街
R: haha 唔洗啦 你訓啦 thanks
N: 好啦！ 有事就打比我啦 good night
R: Sweet dreams ❤️

我都想同呀文拖住訓，發個好夢。但佢到底做緊咩？！我信佢唔會做得太過分，但始終依家都咁夜無理由仲未番。

我心中有無限嘅想像，你會唔會抱住佢，而佢又捉住你唔放 唔比你番屋企。你會唔會決定左唔要我呀？呀文...唉... 我唔可以亂諗。周紫凝，你要信佢呀！你應承左要信佢嫁！

12:15AM
我沖完涼就趴左係床上面，成個空間散發住我同呀文嘅體味，同埋水味。哈哈...點解會諗啲咁嘅野嫁，比呀文教壞哂。好掛住呀文呀！我應唔應該打比佢好，我打去會唔會唔係咁好呢，但係都12點幾啦喎...唔係囉，我係佢女朋友，打去問下都好正常姐。

「喂！文仔..你仲未食完飯呀？」
「食完啦..我地行緊..」
行緊？！咁夜可以去邊到行...
「哦..好啦咁，你唔好太夜呀，小心啲」
「嗯..！你唔洗等我啦傻妹」
唔洗等？！姐係有排都未番？
「嗯....咁..我收線啦..」
「好..唔洗擔心～」
「好啦，掰掰」呢一刻我好忐忑，講真我唔信佢真係淨係行，但如果佢真係做左啲好過分嘅事，我應唔該原諒佢呢？

我無拍過好多次拖，由細到大都唔係好識同男仔相處，細個對得最多嘅係狗仔。狗仔好乖好醒目，你只要成日陪左佢，留意佢嘅一舉一動，比多啲關心佢，佢會感受到，跟住就會慢慢同佢親近到。有時我會不知不覺用左同狗仔嘅相處模式同男朋友相處，比佢無限嘅愛同包容，因為我信佢有朝一日會感受到。但我啲朋友都成日話我對男朋友太好，比哂所以嘅愛佢，完全冇愛自己。

對於呀文，我完全迷失左，佢就好似有種魔力，令我慢慢咁愛得愈來愈深。啱啱一齊果陣，我地好sweet，係我第一次拍拖拍得咁開心，果陣時我地嘅世界冇Nicole，呀文一心一意對我好，比左個最難忘嘅生日我，令我感受從未感受過嘅愛。
但Nicole 嘅出現，我feel 到佢開始動搖... 跟住從未有過嘅恐懼感慢慢浮現，我好驚呀文會突然之間走左。直到呀文同我講佢同Nicole 又抱又錫咁，我真係完全失控左。

1:00AM

突然間，我聽到推門聲，我聽到呀文去左沖涼。

到底我應唔應該問佢發生咩事呢？

佢沖完涼。入到房，我feel到佢有少少攰，「咁夜嘅？」我唔夠膽直接問佢。
「冇呀..我地傾左一陣計。係喎，我拎返佢條鎖匙啦」佢好似唔想講太多，係咪我諗多咗？我總係覺得 佢好似有嘢瞞住我。
「好啦...快啲訓啦傻瓜」我錫左佢一啖，我好想佢抱抱同我講「傻瓜，我愛你。」
「嗯，早抖」但佢無察覺我嘅不安。
「早抖～」

熄左燈之後，呀文好快就訓著左，我背住呀文訓。我嘗試唔再諗今日發生嘅事，但我控制唔到。我雖然好愛呀文，但如果佢同Nicole ....我真係唔知我係唔係可以承受到，呢個係我底線。我可以接受你心入面暫時仲有佢...但係可唔可以唔好比我知呀...我會好心痛...
左眼嘅淚水忍唔住流左出嚟，吉到右眼。我偷偷地望呀文，好彩佢訓得好林。我唔想比佢知道我亂諗野，因為我信佢。

支持繼續出外轉

聽日有冇文

盲目地愛一個人，就算佢點衰點賤，都仲肯去選擇比藉口自己而去信個賤人，這就是愛情。
如果癡癡的等 某日終於可等到 一生中最愛(唔好意思用左奶共廢老嘅歌)，周紫凝一路等，終於等到條仆街肯對佢表明心跡，就算條仆街心裏面有第二個都唔介意，而不斷比藉口自己去愛條仆街，就知對佢對條仆街嘅愛有幾咁深，把握到最好嘅時機同條仆街一齊，條仆街點錯都唔放棄，抵你做世界冠軍。

多謝支持

答唔到你住

樓主我會默默地追

我依家對你嘅文唔再係呀文同Nicole 嘅激情
而係呀文同Rachel 嘅細水長流

係

見到Nicole 真係好難再相信愛情

凝凝愛條仆街愛撚到失去理智.....就算察覺到條仆街咁夜先翻黎，有嘢瞞住自己，都寧願呃自己，催眠自己要相信仆街文。一次又一次包容同原諒條仆街犯過嘅過錯，再加上又陪係條仆街身邊咁多年，陪佢走出低潮，為佢默默付出，對條仆街嘅付出多過佢咁多。甚至最後唔去計較條仆街犯過嘅錯，只係想同條仆街一齊行落去，就憑以上呢啲就抵條仆街最後揀咗你，做佢嘅終生伴侶。btw 好在條仆街最後都叫迷途知返，揀咗周紫凝做佢終生伴侶，如果唔係真係憎鳩仆街文一世。

細水長流都係好重要嘅階段

等你！

譚詠麟仆街啫 首歌無罪嘅 一首歌嘅誕生 歌手嘅功勞只係其中一部份

信黨，沒事

唔make sense 發生咁多野 Nicole話唔搵就唔搵?
成個鋪排又突兀又唔合理
同埋好似古代人咁 無電話用 咁多時間搵對方 都唔搵

你會唔會鐘意一個人 無啦啦玩消失啊

終於都Live左
真係好故，如果係一開頭就追應該會好期待樓主出故
希望外傳會帶返個happy ending俾nicole
難得決定唔拜金搵到真愛又咁離佢而去，好重情傷

見到有人話阿文同rachel嘅愛係細水長流真係得啖笑
兩情相悅就話啫
而家擺明阿文心有所屬
咁都有得吹奏？