估唔到竟然開到第二個Post
希望繼續分享一下雕像，或GK嘅資訊，
同埋多個地方比大家討論下。
上個POST：
https://lih.kg/1958411
我都開左個IG：chihow_channel
會keep住update自己新開箱或者gk資料。
當你想訂某款，但又心大心細，可以黎問下大家意見。
當你買左新款，除左自己開箱好開心（或者不幸中伏好嬲），可以黎分享一下。
汲取上個post有唔同巴打嘅意見。
希望都改到大家先入為主嘅定義。
其實「gk」主要係白模，而家開訂個啲應該稱之為
雕像
我youtube channel有分唔同playlist，一為有有版權嘅雕像：
https://www.youtube.com/playlist?list=PL-K08VWYmPW7cKvG0OI7I6t3a2NtKquZS
一為無版權嘅雕像：
https://www.youtube.com/playlist?list=PL-K08VWYmPW5MTr02u1LGjvoXWXEwSg0d
同時希望大家尊重下知識產權。
甚至話玩版權雕嘅人唔好炫富，扮哂野。
有版權最主要就涉及金錢，閣下唔買唔係問題。
但請尊重有版權嘅工作室同堅持買版權嘅收藏家。
好多工作室百花齊放，有好有唔好，
好就有良性競爭；唔好就侵犯緊版權，同埋好易中伏或者呃錢。
以下會有啲簡單Q&A
如果有幸再繼續開新post，會繼續update大家嘅問題同答案係第一頁。
1）講左咁耐，邊啲工作室有版權？
日漫就主要Tsume，開天，RYU，UA，鐵風箏，集美（？）
美漫就主要Prime 1，XM，Sideshow
等等
2）邊到可以買到/訂到？
現貨就要問下代理，有機會會有小量現貨，或者有人棄單，
或者上Facebook d 二手Group徵。
由於涉及版權，灰色地帶，唔會有鋪頭明碼實價擺現貨賣（海關有機會搞）
有錯請指出。
-
訂嘅話請搵比較出名嘅代理，近排聽唔少騙案，唔好貪平個少少。
我自己搵龍珠gk toys同專業gk訂開，香港gk都係比較大嘅代理。
本人就唔太建議淘寶嘅，差少少寧願比返自己人賺。
真係要淘都係搵啲大店，XXHome，X智，猴X，萌布X等。
3）訂 / 轉單 嘅流程係點？
訂：搵間信得過嘅代理，比訂金代理>等工作室整>準備出貨>補款>速遞到付
-
轉單：同賣家傾好價錢，最好開個WhatsApp group，代理+買賣家，講明轉單，
到時準備出貨>補款>速遞到付
4）土地問題，啲盒掉唔掉好？
隻雕唔係好貴，收藏價值高嘅話，啡盒就唔建議留（衞生問題）；彩盒就最好留，除非你肯定自己唔會搬屋/唔會賣/唔會移民，或者好瀟灑平賣都無所謂，否則無盒你要將隻野帶離屋企都幾困難。
我自己就租倉擺盒，全部都有留盒。
5）買返黎爛左點算？
新買嘅就算無位擺出黎住，都最好拆開檢查下（除非一心轉賣，有人追求全新未拆），
發現有損，即刻通知代理同工作室講，通常售後都會寄返補件比你，由於香港寄返廠唔平，佢未必要你寄返爛件比佢。
-
二手買嘅照問下代理，太耐無得售後就只能夠課金搵手藝人修復。
唔想課金就自己買啲混合膠痴下，最緊要過到自己個關。
6）閒閒地都一二千，大舊啲就三四千，我買返十零廿隻景品唔好？
當然閣下有自己嘅選擇權，我只能夠以過來人嘅經驗同你講，
當你開始買雕，會發現完全係唔同層次，就會慢慢覺得景品買黎只會阻掟。
我間唔中都會買返一兩隻，但對景品嘅需求愈黎愈細，
只會諗點樣可以擺多幾隻雕。
當然閣下有錢有位嘅話，WHY NOT BOTH
