開錯台重開
(黑暗系)香港人的童話故事
https://lihkg.com/thread/148013/page/1
- 分享自 LIHKG 討論區
多謝Mr.B巴打俾我翻譯佢嘅作品,我唔係文科仔,有咩譯得唔好嘅地方歡迎提出討論。唔講咁多 去故
故事一:快樂童年
(1)
「今次考試做咩得第五㗎?你有無諗過我使咗幾多錢俾你補習啊?」小華嘅母親懶理旁人目光,以高八度嘅聲線質問小華。小華一言不發,假裝將所有注意力集中喺眼前嘅功課上面。「你下年就要考中學啦,報名校嘅個個都係第一名,你第五名去獻醜啊?」小華嘅母親用冷冷嘅眼光望住自己嘅仔。
小華討厭呢種眼光。每次見到呢種眼光,佢都會覺得自己係垃圾,會幻想到母親拋棄佢。小華不禁流下淚水,低聲咁講:「對唔住,我下次會努力㗎喇。」小華嘅母親對他嘅道歉不置可否,將成績表放返入書包裏面。「唔好喺快餐店哭喪咁嘅樣喇。今晚再同你爸爸好好教訓你。快啲食完去返補習班啦。」
(2)
經歷完父母嘅訓話,小華瞓喺床上流住眼淚,默默咁望住天花板。學校、補習班、鋼琴班、英文補習、普通話補習、游水班;學校、補習班、鋼琴班、英文補習⋯⋯佢每次望住天花板,就會不期然諗起呢堆無止境嘅課堂。他諗起對上一次最快樂嘅日子,就是兩年前僥倖考咗次第一名,父母因而誇獎佢係乖仔。但自此之後,卻係變本加厲咁督促佢嘅成績。
「小朋友,你做咩喊啊?」一把溫柔嘅聲音從窗口傳來。小華吃驚地望向窗口,只見一隻生住對翼,手掌大細嘅女仔企喺窗檯上。「你⋯係邊個?」小華有一刻想大嗌,但又怕嘈醒父母會招來責罵。「我係幫助傷心小朋友嘅小仙女,可以賜畀每個小朋友三個願望。但係最近傷心嘅小朋友太多啦,我都有啲應付不來。」小仙女抱歉咁笑咗一笑。小華半信半疑咁望住小仙女,話:「我可唔可以許住一個願望試吓先啊?」小仙女溫柔咁笑咗笑:「當然可以啦。」小華諗咗諗,天真咁話:「我希望聽日唔使去補習班。」
(3)
第二日朝早,一切如常。小華懷住忐忑嘅心情去返學,同時心入面亦都祈求願望成真。好唔容易等到放學,小華母親如常接小華去補習班。小華心裏失望,開始懷疑自己尋晚只係發咗一場夢,也為自己唔可以心想事成而失落。突然,小華母親電話響起,母親聽完電話,驚呼一聲,面色一變:「小華,補習老師遇到車禍死咗。」
唔使補習,小華喺屋企溫書。小華母親有啲傷感咁坐喺梳化度。小華表面專心咁睇住課本,內心卻為老師嘅死訊暗暗興奮。呢位補習老師喺區內以嚴厲見稱,唔少家長因而慕名為子女報讀。小華一早已經唔鍾意呢位老師,只覺得心情好似睇見卡通片入面壞人被打敗咁,十分暢快。
(4)
呢晚,小仙子如常喺小華睡房出現,溫柔咁講:「願望實現咗喇,小華開唔開心啊?」小華興奮咁握住小仙子幼小嘅雙手話:「多謝你!我今日終於唔使去補習班喇。」雖然仍要喺屋企溫習,但係對小華來講已經舒服好多。「可以令小朋友快樂就好了。」小仙子都興奮咁說:「你第二個願望呢?」小華終於意識到剩底兩個願望嘅貴重,鄭重咁諗咗一陣:「雖然補習老師死咗,但係媽咪聽日應該會揾新嘅補習老師⋯」小華諗到呢度,心入面又沉咗落來。「如果可以每次都考到第一名,爸爸媽媽一定會好開心,咁自然就會開始疼錫我啦。」小華終於想通咗,天真咁講:「我要成為最聰明嘅人!」
(5)
自此之後,小華嘅成績突飛猛進,每次考試都必定攞到第一名,連一向無乜天份嘅彈琴都成為輕鬆嘅玩意。父母都對小華疼錫有加,同時亦加緊栽培阿仔,但喺小華嘅才智下,所有補習老師喺兩個月內已經跟唔上小華嘅進度。漸漸地,小華嘅父母都無辦法負擔更好嘅補習老師,只好買一堆大學教科書俾小華自習。半年後,小華喺各個辯論比賽同奧數比賽都取得冠軍,被喻為全香港最聰明嘅小朋友,得到學校同家人嘅寵愛。
小華嘅父母笑吟吟咁為佢打上紅色嘅領呔,準備參加大學面試。佢哋決定要善用小華嘅才華,想小華十二歲就入大學。小華坐上父親嘅二手車,向大學之路進發。小華問父親:「其實我覺得我可以考到哈佛劍橋之類嘅外國大學。揀大學唔係排名越高越好咩?」小華相信以自己嘅智慧,只要有機會同哈佛嘅教授見十分鐘,就可以得到哈佛大學取錄。小華父親尷尬咁笑咗笑,話:「其實香港的大學都唔錯呀,你唔想見到爸爸媽媽咩?」小華其實早知道屋企嘅環境根本難以負擔佢出國讀書,但佢就係忍唔住要問吓父親令佢難堪。
當晚,小華向小仙女許下最後一個願望。
(7)
「唉,明明咁聰明,小學六年級就父母雙亡眞係太可憐喇。」教員室入邊嘅老師指住報紙頭條喺度討論。小華父母雙亡成為全城熱話,報紙見小華嘅故事有市場價值,紛紛大肆報導,更成立捐款熱線去幫助佢,政府亦承諾會對佢施以援手。喺一個星期內,小華已經擁有幾千萬的慈善基金,亦可以有錢去外國升學。雖然無咗父母嘅愛,但小華並唔孤單,因為聰明富有嘅佢得到同學月弓口老師嘅愛戴。
從此之後,佢過住幸福嘅生活。
故事一|完