軟綿綿
2020-09-16 01:36:24
(99)
推開咗Ashley返到去大本營到,一陣炒野嘅焦香味就撲鼻而來。番茄菠菜蛋餅、牛油果多士加藍莓汁,估唔到嚟露營都仲可以咁有營養。一直skip早餐開嘅我,都有意欲食返個珮柔牌營養早餐,同娶埋珮柔返屋企。
珮柔煮到個臉仔都紅撲撲,天然胭脂令個人都白裏透紅。頭毛髻仔都濕哂,一滴滴晶瑩嘅汗珠滑過臉龐。紅暈係就係可愛,不過似乎紅得唔太正常。
行近佢已經感覺到嗰種熱嘅氣。我用手探一探佢額頭,完全係滾嘅,個傻妹係咪拎埋自己去煮先咁㷫?大家都嚟唔切調侃我地嘅親密之前,就畀我嘅言論嚇倒。「我同珮柔依加返去喇。」
「吓?咁急。」William有啲不捨咁講。
「咩事啊?」阿鋒都算問返個正常問題。
「有冇野幫到手?」連Cheryl都睇唔出?
一個二個盲嘅咩,珮柔煮咗咁耐餸塊臉紅成咁,都冇人察覺到唔對路?發燒應該仲伴隨四肢無力,佢竟然仲完成咁大量嘅菜,唔hea整,真係睇到都辛苦。「珮柔發燒啊,所以我地走先。」既然大家都睇唔出,咁就由我交代下。
「佢喺度都可以休息嘅啫,舟車勞頓咪仲辛苦?」阿安似乎對我嘅提議唔係咁滿意。
「呢度瞓都瞓得唔好啦, 更何況係一個病人。」都係浚仔明白點照顧人。
大家嘅關心係唔可以令珮柔減輕發燒嘅症狀,快啲夾佢返屋企休息,唔係拖多兩日,又要操勞,病情可能嚴重好多。
「哥哥⋯⋯」珮柔拉一拉我衣袖,「但我可唔可以食埋個早餐啊?」傻豬嚟嘅,發燒發到咁嚴重都掛住食。「咁食埋先,上車瞓陣,陣間車你去睇醫生。」
包包都話:「有多個女仔去安心啲。」當然好喇!有包包啜下珮柔對波,吸返啲毒出嚟,可能會好得快啲。
於是就喺大眾依依不捨嘅目光下,押送珮柔上車,啲剩餘物資都唔執了,都係珮柔重要啲。
珮柔同包包喺後座,方便照顧。我就喺倒後鏡中見住珮柔由悠悠咁睇窗外景色,到昏昏欲睡都要格硬擘大眼,後來挨落包包個膊頭度個和諧畫面,兩個咁互相扶持幾好呢。
珮柔中中下仲落埋人地對波度先落到大脾,好彩係包包喳,撼埋落Ashley個胸度嘅話,個頭應該會受傷。
珮柔整整下竟然瞓咗落包包大髀。雖然見唔到珮柔咩狀況,不過我相信包包會照顧得佢好好嘅。
轉眼間就到咗珮柔屋企樓下。
一個珮柔話輕唔輕,話重唔重,我見佢瞓得咁冧,就一野攬咗上身。殊不知,原來都係個重擔嚟。包包用羨慕嘅眼神望住珮柔,但我又點孭得起兩條女呢?唯有隔空做咗個飛吻嘅動作,希望包包能夠意會到我嘅心意。
放咗珮柔落床之後,我同包包就分工合作。竹十指不沾陽春水嘅包包堅持唔煮嘢食,搶咗幫珮柔換衫嘅優差嚟做,真係好過份,咁就變咗由我煮。
剩返嘅食材量大概只夠珮柔一餐,陣間點都要出去買。快手煮咗個菜心肉碎粥頂住先。
「阿驍⋯⋯我好肚餓啊。」包包揉住平坦嘅小腹講。
《續。196》