可不可以，讓我再選擇多一次 ［愛情/甜］

第二十七章 難言之隱

琳琳望到佢嘅時候，第一個反應係點解你會喺度....

阿程同佢對望嗰一下，用咗佢成日用嘅笑容去對佢笑一笑

其實琳琳心入面，佢真係忍得好苦。一直以來都係佢一個人喺心入面默默承受住所有野...

而喺琳琳眼前，係一個雖然乜都唔知，但又一直喺佢身邊嘅傻仔。阿程嘅出現就好似終於有一個人可以令佢放下一直以黎好似好強硬嘅面具，係一個佢可以依靠，令佢真真正正做返自己嘅人。

琳琳行到過去，抱住阿程喺度喊。阿程雖然唔知發生咩事，但係佢知道而家嘅琳琳係好需要一個人陪住佢。 所以阿程無選擇問佢發生咩事，而係靜靜地抱住佢，好温柔摸佢個頭安慰佢。

喺條街度咁樣俾人抱住喊其實係有啲奇怪，因為大家都唔知發生咩事。但喺呢一刻琳琳同阿程都唔會介意，因為對佢地黎講，此時此刻嘅世界只係得返佢哋兩個。

或者大家會覺得好奇，點解明明阿程同琳琳好似唔係識咗好耐咁，但點解琳琳好似特別信得過阿程。其實呢一樣野係源於琳琳身邊一直都有好多男仔想追佢，會喺佢身邊做好多野去討好佢，但都一一都俾琳琳拒於門外。但由於本身琳琳係想補償返俾阿程，所以阿程比其他男仔有更多機會接觸到琳琳。而喺過程中琳琳覺得阿程同其他想追佢嘅男仔唔同，感覺上阿程份人好真耐又唔會為咗想追佢而做啲特別嘅嘢討好佢。而最令琳琳覺得特別嘅係一直以來琳琳都唔鍾意有人喺佢面前講粗口，偏偏係得阿程會無視佢繼續講。

就係咁樣，過咗半個鐘之後，琳琳終於喊完，而阿程嘅膊頭一早已經俾琳琳嘅淚水整濕哂。

「點啊傻妹，喊完未啊？有無好啲？」

「嗯...你又知我喺度嘅？」

「係啊，今朝你阿哥揾我話唔見咗你嘛，我又醒起你要黎呢度補習，所以咪喺度等你囉...」

「你等咗好耐啦？」

「都幾個鐘㗎，差啲就想放棄，好彩你及時出嚟，唔係我已經走咗返屋企。你肚唔肚餓啊喊咗咁耐？不如去食啲野？」

「好啊，我成日都未食過野...」

阿程就帶咗琳琳去附近一間翠華度坐低咗。由於屋企有留飯俾阿程，所以佢就無叫到野食，而琳琳就叫咗碗魚片頭河粉。

「你肯同我講發生咗咩事未啊？好少會見到你喊得咁勁」阿程問琳琳

「我唔想提，可唔可以唔講？...」

阿程知道咁樣迫佢講都係於事無補，所以佢放棄再追問落去。

「一碗魚片頭河。」翠華個阿姐放低碗河粉就走咗

阿程將匙羹入邊嘅蔥同芫荽撈埋一齊入啲河粉度，然後將碗粉放喺琳琳面前

「死啦，我唔記得咗要走青...」琳琳由細到大都唔食蔥同芫荽。

「...唔緊要啦，我幫你挑返佢地出黎」

之後阿程就攞返碗河粉返嚟，逐啲逐啲將入邊嘅蔥同芫荽跳返出嚟。雖然呢個舉動感覺上好似好普通。但喺琳琳嘅心入面佢感受到黎自阿程對佢嘅關心。個心入面其實好sweet，只係阿程無留意到。

我閉上眼睛 貼着你心跳呼吸
而此刻地球 只是我們而已

https://youtu.be/KGrulNiJ6Uc

第二十八章 越軌

「你又話成日無食過野嘅，點解你食得咁少㗎？」阿程望住嗰碗食完同無食過無乜分別嘅粉

「我呢排都無乜胃口食嘢...」

「唔得啊，你食得幾啖邊你邊個夠飽，咁樣你會瘦㗎，快啲擘大個口至少同我食哂啲魚片頭佢啊。」阿程一路講一路將塊魚片頭遞到去琳琳個口面前喂佢食。琳琳唔夠佢講只好乖乖地食哂啲魚片頭

「我送你返屋企？而家都咁夜啦？」阿程主動問琳琳

「好啊」琳琳無拒絕到阿程嘅意見

佢地搭地鐵去到太古站落車，然之後兩個人慢慢行返。

夜晚嘅太古冇乜人，行返去嗰一段路基本上都係得佢哋兩個。雖然條路唔係好長，但係佢地兩個都好有默契咁慢慢行。

行到一半要過紅綠燈嘅時候，阿程主動咁拖住琳琳隻手黎行。琳琳雖然俾佢嚇一嚇，但係無縮開手，反而好享受呢一段屬於佢哋兩個嘅時間。

因為琳琳知道，過多陣佢嘅身份又會變返做人地嘅男朋友。又或者咁講，佢從來都係喺度偷緊人地男朋友嘅時間，佢唔知道呢一種幸福嘅感覺幾時要還返俾人，所以更加珍惜呢一段感情

一路行返去嗰陣，琳琳發現今日嘅月亮好似比起平時嘅更加大更加圓

「你覺唔覺得今日嘅月亮好靚？」

「係喎，真係好似特別大咁樣，如果日日都見到呢個月亮就好啦。」阿程望住天上嘅月亮同琳琳講

去到佢屋企樓下，呢一段借返黎嘅幸福都係時候要還返俾人。

「今日唔該晒你。」琳琳喺入門口之前向阿程講

「唔使，好少事啫。我答應你以後有咩事我都會喺你身邊。就好似今晚嘅月亮咁，喺最黑暗嘅地方入面，我點都會照亮你嘅前面，即使我無太陽咁光都好，我都會一直喺你身邊。即使你見唔到我，我都會喺你身邊守護你，你需要我嘅時候我一定會出現。」

「嗯，知道啦」

琳琳其實聽到阿程咁講好窩心，但琳琳由細都大都好少會透露自己嘅心底話俾人聽，連阿程都唔例外。因為佢覺得俾人知道哂自己諗乜會好無安全感。所以就算佢有咩感覺都好都好少會講俾其他人知

為非作歹只因我天真
無法自制忘掉你而非單身
成了罪人忘形一吻
去你份割做兩份

https://youtu.be/yis_qYqKWVM

差三個正皮睇下今晚有冇機會出多更

正呀 好多篇文

手動正皮

第二十九章 發展

雖然話阿程同Kristy 係拍緊拖，但其實阿程對kristy嘅感覺唔係好強，相反佢差唔多日日都會主動去揾琳琳。但由於無十足嘅把握追到琳琳，所以阿程一直都未有打算去同琳琳表白。加上琳琳之前又一直reject過咁多男仔又話屋企人唔俾佢拍拖，令到阿程唔敢再住人步。畢竟維持而家嘅情況對阿程黎講已經好滿意，佢都唔強求話要同琳琳一齊，亦怕俾琳琳reject咗連朋友都無得做。

而琳琳就覺得其實自己配唔上阿程對佢咁好，萬一阿程知道咗真相，可能就會遠離佢。所以就算對阿程有感覺都好，都只係敢收埋喺心入面。加上阿程又有女朋友，證明其實阿程都唔係好中意琳琳啫，如果真係中意琳琳嘅話一早同女朋友分咗手啦，可能阿程其實係當琳琳係一個熟啲嘅朋友。

正正就係兩個人都咁諗，令到佢地嘅關係一直只係停留咗喺友達以上戀人未滿嘅情度。但係又無人敢行前一步，大家都好似隱隱約約感覺到對方對自己有意思，但又無咁敢將心入面嘅說話講出黎。

「聽日得唔得閒？」阿程問琳琳

「做咩啊？有地方想去？」

「無啊，想見下你啫」

「但我聽日約咗人啊...」

「咁啊...唔緊要啦，下次再約過啦？」

「其實都得嘅聽日，我可以推咗佢嘅...」琳琳主動踏出一步

「好啊，咁聽日12點喺銅鑼灣等啊」

「好啊，到時見」

第二日阿程都係習慣早三個字到，因為佢覺得唔好要女仔等自己

「我到咗啦，喺c出口等啊，你慢慢」阿程同琳琳講

「乜你咁早就到，我仲有兩個站先到」琳琳覆返佢

「我早啲到唔想你等我嘛，我等你有乜所謂」

琳琳今日扎咗馬尾，著咗件普通嘅t-shirt同牛仔褲。雖然好似無乜特別，但係阿程心目中馬尾佢最好睇嘅髮形。

「不如去唱K囉？好似好而無唱過K」阿程問琳琳

「無所謂啊，你中意」

於是乎佢地兩個就去咗銅鑼灣間neway都唱

「只知道是時候拿著鮮花，將心愛預留在盟誓之下~」

雖然話去唱K，但其實全程基本上都係得阿程唱，琳琳一直都無乜唱過，只係靜靜地聽住阿程唱。阿程唱嘅歌基本上全部係情歌，雖然琳琳唔知道阿程係咪唱緊俾佢聽，但對琳琳黎講已經好冧，特別係當阿程一路唱望向琳琳嘅時候。

「你做乜唔唱又淨係望住我啊？」阿程發現到琳琳喺度偷望佢。

「咁間房就係得我同你，唔望你唔通望天花板咩」琳琳俾人發現咗之後就求其作個理由出嚟

「不過點解你唔唱嘅？」

「係啊，我唔係好習慣喺你面前唱...」琳琳顯得有啲尷尬，因為佢對自己嘅歌喉無乜信心，唔想破壞自己嘅形象。

「喺我面前使乜怕羞，快啲一齊唱」阿程夾將枝咪隊去琳琳口面前，而呢首歌正正係《小酒窩》。一路唱其實阿程好希望可以講俾琳琳知呢首歌嘅歌詞係佢心底想同琳琳講嘅嘢，但佢無呢個勇氣踏出呢一步。

小酒窩長睫毛 是你最美的記號
我每天睡不着 想念你的微笑
你不知道 你對我多麼重要
有了你生命完整的剛好


https://youtu.be/h-woMj_Vt0A

樓豬加甜甜蜜個甜

大把甜，你準備好糖尿病
不過之後點發展就好難講啦

已經準備好一箱胃藥

大家似乎都中意琳琳多啲

好奇投個票，大家最中意邊個女腳色
琳琳=1
Sophie=2
Susan =3
Kristy =4

4

琳琳做女朋友
Susan 做sp

估人無得咁貪心

會唔會想我用多啲篇幅寫下Kristy

想
可唔可以唔揀琳琳
Kristy感覺係賢妻良母

竟然係咁
睇落去你咪知
不過仲有啲女腳未出場
可能你會改變主意

第三十章 驚喜

其實諗返轉頭，其實阿程對kristy一直都唔係特別好，反而係對琳琳特別無微不至，如果唔知嘅話可能真係會以為琳琳先係阿程嘅女朋友。可能因為得到嘅就唔識珍惜，而未得到嘅反而更加著緊。

「你下個星期三得唔得閒？白色情人節啊。」Kristy問阿程

「對唔住啊，我要補習之後要返屋企食飯啊，你知我屋企唔俾我拍拖㗎啦。所以陪唔到你啊...」阿程雖然講就係咁講，不過其實佢一早準備好嗰晚會約琳琳。

「琳琳，你下個星期三放學得唔得閒出黎？」阿程特登避開咗唔講白色情人節唔講，就係怕佢準備俾琳琳嘅驚喜俾佢發現。

「好啊，反正我都無野做，你想喺邊度等？」琳琳其實等咗阿程約佢好耐，不過當然琳琳唔會拆穿嗰日係白色情人節啦，大家都心照不宣。

嗯...送啲咩俾琳琳好呢白色情人節...唔知佢中意啲咩呢？...啊係喎，佢話過佢阿哥送過99枝紅玫瑰俾佢，不過佢話佢中意藍玫瑰多啲，咁不如就送藍玫瑰啦。不過原來藍玫瑰好少有，就算有都好貴...不過原來可以用白玫瑰用染料料返變藍

「琳琳，我地聽日喺太子站等啊好？」星期二嗰陣阿程問琳琳

「好啊，無問題」

因為星期三係要返學，所以佢地兩個都係著住校服。琳琳係特別對著恤衫嘅男仔有好感，而咁啱阿程又摺起咗佢嘅衫袖露出前臂，最重要係手仲要有青筋喺度超好睇，喺琳琳眼入面呢個男仔攞住手上面嗰一札藍玫瑰。一切一切發生嘅嘢就好似照住佢心目中嘅劇本走，只係差一句「你可唔可以做我女朋友？」

當然呢一句係唔會出現，因為阿程根本未同kristy分手。雖然佢覺得琳琳對自己係特別，但都係覺得琳琳唔會接受自己嘅表白。

「我聽你之前講過話你中意藍玫瑰，送俾你㗎。」阿程忍住咗無講白色情人節快樂，因為佢地根本就唔係情侶，又講乜情人節快樂。

「哇，好靚啊，多謝你。」琳琳第一次收到佢最中意嘅藍玫瑰，仲要係黎自阿程。其實佢中意藍玫瑰嘅其中一個原因係藍玫瑰嘅花語係暗戀同單純的愛咁解。

「行囉？去食嘢好無？」阿程主動拖住琳琳嘅手

「好啊，去Pizzahut?」其實對琳琳黎講，食咩都唔係重點，因為有阿程喺佢身邊，佢已經覺得自己係世界上最幸福嘅人。無論佢地一齊做啲咩，琳琳都會覺得開心。

雖然話係白色情人節，但始終兩個學生拖住手又攞住一札花，都係會引黎一啲旁人嘅目光，但佢地兩個都無介意。因為對琳琳黎講，呢個係唯一一個可以證明到阿程係屬於佢嘅方法。

「食咩啊你想？」阿程問琳琳

「無所謂啊，你決定啊，我食咩都得。」琳琳其實只係想對住阿程。食咩？佢根本唔在乎。

「咁我地叫個二人餐啦好無？」阿程提議

「嗯，好啊。」

食完飯之後，阿程就送琳琳返屋企。

同樣嘅路，同樣嘅人，同樣放慢嘅路速。今次佢地無乜點講嘢，反而係一人一邊耳機一齊聽歌，靜靜咁享受下。

「多謝你啊，我今日好開心」入門口前琳琳同阿程講

「係咩，咁就好啦。」阿程笑一笑，摸一摸琳琳嘅頭。

諗返而家同一段路，阿程身邊嘅女仔一早已經變咗人嘅未婚妻。仲記得自己學結他就係為咗可以彈俾琳琳聽。可惜，琳琳中意男仔彈琴多啲。雖然阿程都識彈琴，但考完七級就無乜點彈過嘅阿程明顯比唔上演奏級嘅琳琳未婚夫。

有緣無份，或者就係阿程同琳琳嘅寫照


時常想起過去的温存
它讓我在夜裡不會冷
你說一個人的美麗是認真
兩個人能在一起是緣份

https://youtu.be/0890XSydrOM

唔好意思，今晚遲咗

第三十一章 隱瞞


「阿程啊，我今日去我啊哥嗰度瞓啊，如果有人message你嘅話，你唔好理佢，知唔知？」琳琳刻意提醒啊程。

「阿哥？點解唔係屋企瞓要走去第二度瞓？佢最多係你契哥，未親到要上人屋企瞓掛？」

收到呢個message嘅阿程心入面有好多問題。但當然，琳琳係唔會講俾佢知點解，因為呢樣野，正正就係佢最不為人知嘅一面

「阿哥係由細睇到我大㗎，雖然唔係有血緣關係，但我一早當咗佢係我阿哥咁。」

「哦，原來係咁...不過點解你會去佢屋企瞓嘅？」

「你唔好理咁多野啦，總之有人揾你講嘢嘅話，你就唔好理佢啦，忍一日好唔好？」

雖然無得到一個完整嘅答覆，但係阿程都只好答應琳琳，雖然內心入面好想反對琳琳去佢阿哥屋企瞓，孤男寡女共處一室無人知道會發生啲咩事。只係因為自己又唔係佢邊個，都無乜理由去阻止啊...

「唉...希望阿哥佢今晚唔好又亂黎啦，次次我一同第二個男仔熟少少佢就嚇走人....」琳琳喺心入面暗暗希望今晚可以平安渡過...

「阿哥我黎啦」

「嗯，你沖完涼就瞓先啦，我仲温緊書，今日上嗰個lecture唔係好明」

「嗯好啦，咁你加油啦」

今晚應該仲有一到兩篇

第三十二章 挑釁

「唉，温到攰，我都差唔多時間要瞓，聽日又八半lecture，唔早啲瞓實起唔到身，到底點解我要揀讀中醫啊...」

沖完涼之後，佢又再一次攞起琳琳嘅手機黎睇。雖然唔知佢嘅密碼係乜，但唔緊要，因為佢可以攞琳琳嘅指紋黎unlock。

入到去之後，佢開始慢慢睇下琳琳呢排有同啲咩男仔去傾偈

「又係呢個阿程，成日揾琳琳傾偈做乜，呢條仔真係好撚煩，最衰就係琳琳unblock咗佢，唔係就無人會阻住我。等我聽日就玩死佢。」

於是乎佢就攞起琳琳嘅手機，影咗一張琳琳瞓緊覺嘅相send俾阿程以作為佢宣示主權嘅第一步

「叮」阿程睇睇下手機收到whatsapp嘅notification ，佢記得琳琳話過今晚無論如何都唔可以去覆佢send俾佢嘅任何message，但睇下唔覆應該無事掛？

入到去，佢見到一張琳琳已經瞓咗喺床，著住真理褲同背心嘅相。雖然阿程收到呢張相覺得好奇怪，但佢知道而家唔係研究張相嘅時候，因為敵人已經出現咗。但係阿程仲記得琳琳叫佢無論如何都唔可以覆佢。

見到阿程睇完張相無覆佢之後，佢決定繼續send message俾阿程

「你唔好似為自己真係可以溝到琳琳啦，佢係唔會中意你㗎，佢當你係兵咋，你死心把啦。」

睇到呢度，雖然阿程知道自己唔應該覆佢，但係佢內心入面已經忍不住。因為兩年前，佢都曾經以為自己係兵而誤會咗琳琳。今時今日，佢決定相信琳琳。

「琳琳同我講過佢唔會收兵，所以我唔會信你，你死咗條心佢。」

見此情形，佢繼續進一步挑釁阿程「佢係唔想你傷心先咁講啫，你睇下今晚係邊個同佢瞓就知啦，你離開佢啦，你唔好迫我做野。」

「我係點都唔會離開琳琳，你死咗條心佢。」

見形勢唔係佢想像中咁，佢開始由話琳琳收佢兵轉為話佢玩琳琳感情

「你唔好再玩琳琳感情，我警告你」

「你啱啱先話佢收完我兵，你而家又話我玩佢感情，你搞唔搞笑啲啊？」阿程覆返佢

「你係咪點都唔會離開琳琳？」

「係又點？」呢一刻，阿程中咗佢嘅計

「你放心啦，聽日琳琳一定唔會再理你。」佢好得戚咁樣對住阿程講

雖然唔知道佢會有啲咩手段去挑撥離間，但阿程相信琳琳會知道自己對佢嘅感情一定唔係玩。

樓主加油