第十一章 電影院
買完爆谷汽水入到去,個場果然係好少人。其實本身我對卡通片都無乜興趣,加上今日又上完成日堂,所以都無乜精神。
睇到一半其實我都唔記得哂成套戲係講乜,反而佢就睇得好入神。佢覺得好睇就得啦咁。
佢突然之間轉個頭過黎問「你係咪對呢啲卡通片無乜興趣?...對唔住啊我應該問下你想睇咩戲先...」
「唔係嘅,只係今日上完堂有啲攰無乜精神啫,唔關你事啊,唔使對唔住喎。」
我講完呢句之後,我嘅嘴唇感覺到一陣温柔嘅感覺。
佢揼低頭問我「咁樣有無好啲啊?」
我嗰下俾唔到反應佢,估唔到自己嘅初吻係咁樣俾人攞走咗「Erm...有掛?...」
就係咁,我成套戲都無睇過,只係喺度回味緊第一次俾女仔錫係咩感覺
套戲好快就完咗,完場嗰陣佢好主動咁拖住我隻手走返出去「男朋友,行啦!去食啲野好唔好?」
「男朋友?...你話我係你男朋友?...」
「係啊,行啦傻仔!」
「哦...」
我地去咗間餐廳食咗少少野就送佢去小巴站搭車走
「bye bye啦傻仔。」
「嗯,下次見啦。」
喺上車之前,我再次俾佢突襲咗一次,原來同人kiss嗰陣個心係會跳得好快,咁係咪代表我中意佢?...
我帶住呢個疑問返屋企,照常食飯同做功課。唯一唔同嘅係,我手機會時不時收到kristy嘅message
「你食咗飯未啊?」
「早啲瞓啊知唔知啊?唔係聽日就無精神上堂㗎啦!」
面對住呢一啲對我關懷備至嘅message,其實我唔係好識點去認對,因為我根本就唔知自己中唔中意佢,甚至唔知佢中意我啲乜...
其實我怕偷看
如揭破感情實況
感覺太不爽
https://youtu.be/AphrA76OpnE