可不可以，讓我再選擇多一次 ［愛情/甜］

第六十三章 甜蜜

拖住手嘅阿程同Evelyn黎到地鐵站，因為阿程夜晚要同屋企人食飯，所以送咗Evelyn走先

「我走啦」Evelyn拖住阿程隻手

「好啦，返到屋企記得Whatsapp我啊」阿程摸一摸Evelyn個頭，雖然有啲想錫落去，但第一日拍拖就錫好似有啲唔係咁適合...

「知道啦，你開開心心食飯啦」

食緊飯嘅阿程，收到Evelyn嘅message

「我返到去啦，你食飯食成點啊？」

「食緊啊，鐵板燒好正」阿程影咗佢食緊嘅嘢俾佢俾Evelyn睇

「嘩，好正咁喎」

「有機會帶你黎食啊，好唔好」阿程覆返佢

「聽日你得唔得閒？不如去睇戲？」阿程主動問佢

熱戀中嘅情侶總係無時無刻都想癡埋一齊，永遠都唔分開

「好啊，有咩戲睇？」Evelyn 好快就覆咗阿程

「一係睇Spider-Man?我未睇過呢套」阿程建議

「好啊，同你睇睇乜都得！」

第二日出到黎，Evelyn 今日著嘅衫同琴日嘅校服好唔同

如果話Evelyn著校服係清純嘅話，Evelyn呢一次嘅打扮就日系嘅可愛，都係阿程嘅最愛

一件有少少oversize 嘅T，加條牛仔裙，加埋對Doctor Matins 嘅皮鞋。雖然Evelyn唔高，但呢一套嘅打扮都足以令佢突出自己嘅長處同埋佢白淨嘅腳

拖住身邊呢個女仔出街，阿程覺得好有一種自豪感，因為呢個女仔足以令條街嘅大部分人望過黎，緊重要嘅係呢個女仔係佢中意嘅人，雖然阿程仲未放得低哂個EX，但佢好有信心有一日一定可以放得低，只要Evelyn喺佢身邊

只係無諗過有一日都要學會放低佢

push

六十四章 蜜運

睇完戲嘅佢地去咗食飯，一直以來喺阿程心目中男仔同女仔出街食飯俾錢都係天經地義，如果個女仔想AA先會再算，所以阿程同Evelyn出街食飯都預咗要俾錢，但都無覺得有乜問題，始終係女朋友，請佢食飯好應該

但係呢樣野對住Evelyn黎講就好唔同，佢覺得就算自己無錢都好，都應該盡量去俾返錢個男仔，就算係男朋友都好，人地無義務去請自己食嘢

如是這，一場攻防戰開始了

「你俾咗幾多錢啊？我俾返你啊？」Evelyn喺銀包攞咗100蚊出黎打算俾返阿程

「唔使啦，好少錢啫，我請你食飯好應該」阿程收埋自己對手，嘗試唔俾Evelyn塞到張100蚊入佢手

「唔得啊，下次貴嘢先你請啦，今次AA好唔好？」Evelyn試途去說服阿程

「貴野我都請得，平野更加無所謂啦」阿程駁返佢。其實阿程收返100係無所謂，只不過佢知道自己嘅家境比Evelyn好啲，所以希望Evelyn 可以好好地儲起啲錢，阿程出得嘅都想幫佢出

「一係咁啦，你放喺我度，我幫你儲起？」阿程提出咗個方法，令佢又幫到Evelyn儲錢之餘又唔會令佢覺得無俾錢

「好啦」Evelyn對呢個方法都感到滿意

去到地鐵站準備要走嘅時候，佢地兩個抱住咗對好耐好耐。一對啱啱開始嘅情侶往往都係咁，明明好快就有得見，但每一次分開都好似最後一次見咁

「我要走啦傻妹」阿程摸一摸Evelyn個頭

「唔制啊，我要抱多陣...」Evelyn就好似隻樹熊咁，攬實唔放手

到佢抱夠嗰陣

一鬆手，阿程就錫咗落Evelyn個嘴唇度。呢次唔係阿程第一次同女仔kiss

應該話係好多次之中嘅其中一次，但呢一次嘅心動感覺，係從來都無試過，錫完之後兩個人都有啲尷尬，唔係因為唔中意，而係因為呢一個Kiss，係屬於佢地嘅第一次

「好啦，我要走啦」阿程同佢揮手講拜拜

「好啦，聽日見」Evelyn仲未從啱啱嗰一個Kiss入面抽身出黎，呢一刻嘅佢內心小鹿亂撞，心跳加速，成塊面都好熱

唔好意思，出文出得比較慢
因為樓豬我仲未overcome 到
所以有時會好想逃避唔想寫

面對好過逃避，加油啦

加油
間唔中上下水就得

多謝gchi，聽日出文

文呢

第六十五章 初體驗

Evelyn 對比琳琳同Kristy都唔同，佢出生喺一個比較窮嘅屋企，好細個就要自己出黎一路返學一路打工，有時仲會因為琴晚要返工搞到自己朝早起身發脾氣。而返工對於阿程黎講係一件好遙遠嘅事，因為佢出生喺一個中產家庭入面，由細到大都可以話係要乜有乜

呢一條屋企嘅鴻溝令到阿程同evelyn有時會有價值觀上嘅矛盾，而Evelyn有時候會因為兩個人屋企上嘅分別而去覺得自己同阿程唔夾

「你考完Dse成幾個月你做過啲乜啊？成日只係識喺度玩，除咗食玩瞓你仲識乜？」阿程嘅爸爸有一日因為工作嘅壓力喺度鬧阿程

阿程喺佢面前唔敢出面，只係希望佢可以快啲鬧完俾佢走

「你求奇去揾份工打下都好啊賺下錢，你以為我賺錢好易啊而家？」老豆嘅呢一句話，令到阿程萌生咗去揾工嘅念頭

阿程由於無工作經驗，所以佢都唔知揾乜工好

戲院？好似都幾hea，返得過

有一日睇睇下telegram嘅時候發現有一間餐廳請人，所以就試下去in，反正佢話唔使經驗

餐廳嘅負責人好快就覆咗佢message，話聽日下午就去面試

阿程其實有少少緊張，因為佢都未見過工，又唔知要準備啲咩

不過好好彩，去到餐廳個經理好nice，仲好關心阿程係咪唔夠錢使，叫阿程填咗啲資料就請咗佢，無特別問咗啲咩問題，只係問佢聽日返唔返得工，而無野做嘅阿程幾時都得閒，所以聽日就正式係佢返工嘅第一日

樓主我會盡量更得快啲至少一日一更
對唔住大家，前排太多事發生搞到樓主心情好差
不過settle哂了

加油

第六十五章 初體驗 中

「阿程，你今日第一日返工，你換咗件衫先，跟住Ryan 教你就得㗎啦，呢度返工好輕鬆㗎咋，加上所有人都係黃㗎，唔使擔心，不過如老闆喺度就盡量唔好講政治野啦」副經理提醒阿程

「知道啦」阿程作為一個新仔，都唔敢亂講緊野，只係敢聽聽話話做個乖仔

「Ryan，經理叫我跟你做野，你有咩要我做啊而家」阿程入到廚房，同Ryan講

「你出去set枱，你學咗點set未？枱號係1-16，你記得哂未？」Ryan一次過講咗好多阿程未聽過嘅嘢

「未啊唔好意思...」阿程雖然知道講唔知可能俾人鬧，但佢真係未學過，所以唯有冒住俾人鬧嘅機會講

「唔緊要，bar枱有13個位就係1-13號枱，之後Sofa就係14-16號枱」

「哦，ok」

「Set枱就係咁set，我試一次俾你睇，記得要對齊」Ryan 叮囑阿程

「知道」阿程心入面覺得都唔係好難啫，自己應該應付到

「同埋記得要沖茶，兩個水兩個茶」

「嗯，無問題」阿程啱啱開始返工，對所有野都好好奇，仲未出現返工等放工嘅情況

執完哂枱之後就等開市，所有同事都坐埋一齊喺度吹水

「新仔，你叫咩名啊？」一個中年嘅姨姨見阿程新黎無乜人理佢，所以好心幫佢打開話題

「Hello，我叫阿程，係呢度嘅part time，我19歲」

「下，你19歲？你gel完頭至少都似22左右喎，咁後生做乜要出黎做，無讀書咩？」

「有啊，不過做下part time當賺下錢咁囉，加上當係試下咁囉...」

第六十六章 初體驗 下

「哦...咁你比心機啦，呢度返工好輕鬆㗎咋，唔使太擔心，你叫我susan媽得㗎啦，個個都係咁叫我㗎」Susan 媽同阿程講

「哦，知道啦，我會比心機做野㗎啦」Susan媽呢一番說話令到阿程放鬆不少，因為至少唔係啲咩好忙好chur嘅工

好快阿程就迎來第一個lunch time，啲客入到黎，阿程就要喺廚房準備好前菜攞出去俾佢地，第一次做野嘅阿程雖然平時唔怕對人，但畢竟係客人，所以心入面都係有少少怕做錯野，要知道香港嘅客不嬲都係最西嘅

好彩呢個lunch service 都喺有驚無險之下完成，最大嘅難題係有時好難聽到個耳機入面講緊啲乜，加上佢地叫菜名嘅時候都係用簡化咗嘅方式去叫，阿程第一日返工未背到menu，所以有時候要同事提點先知要出啲咩出去

放飯嘅時候阿程好快就食完飯喺度睇手機

「你唔瞓一陣？5點先再開工，你要唔要瞓下？」經理問阿程

「唔使啦，我唔算太攰」阿程覺得咁樣瞓有啲奇怪，所以就無咁做

好快又黎到dinner service，晚市嘅menu比午市嘅更加複雜，更多唔同嘅菜式，不過好彩阿程有喺放飯嗰陣去背個menu，先未至於完全唔知發生乜事

「點啊，返得慣唔慣？我見你好多野都好快上手」落場之後經理問佢

「ok啊，都係啲手板眼見功夫，唔算難」阿程一路換返件制服，一路答

「咁就好啦，你叻仔黎，咁快就上手，俾心機做啊，我會睇住你」經理搭一搭阿程嘅膊頭

「知道啦」阿程答

第六十七章 別離

阿程喺之後嗰幾個月入面都係過住返工放工瞓覺嘅日子，放假嘅時候就會去搵下女朋友，不過呢一種冇乜煩惱嘅日子好快就會離阿程而去，因為佢準備要離開香港，而呢一日，係佢離開香港嘅倒數三日

佢如常咁樣去咗Evelyn 屋企陪佢，由於疫情嘅關係，佢哋兩個都少咗出街，反而多咗留喺屋企，雖然冇乜特別嘢做到，但係互相陪伴着大家已經係最幸福嘅事

「我要走啦，聽日見啦」阿程摸一摸Evelyn嘅頭

估唔到呢一句說話，令Evelyn 喊住咁叫佢唔好走

「你唔好走得唔得，我唔想同你分開...」Evelyn好用力咁攬住阿程，彷彿一鬆手阿程就會離開佢

「傻妹黎嘅，我哋聽日咪見囉，好快咋嘛」阿程攬返住佢去安慰佢

「我唔係話今日，我話三日之後，我唔想離開你啊...唔好走得唔得呀...」呢一樣嘢其實係拍拖之前佢哋已經知道會有發生嘅一日，但係比愛情沖昏頭腦嘅兩個都係選擇左一齊

呢一次係少數Evelyn 會咁樣對住阿程喊，一直以來佢都唔想比到麻煩阿程，又或者係佢好倔強嘅個性關係，佢好少去表露自己嘅真正感情俾人知

就算係男朋友，佢都盡量唔好麻煩到佢，因為佢知道每個人都有自己要煩嘅嘢，人哋係冇必要為你而再去麻煩，但正正係呢一樣嘢，令到阿程好多時都唔知佢點諗，埋下咗分手嘅伏筆

「對唔住呀，你知我改變唔到呢樣野，但到時候好快就可以再見啦，三個月左右姐，你等到嘅，係咪？」阿程安慰佢

「好啦好啦，咁你返屋企要小心啲啊，返到去要打電話俾我」Evelyn知道無論自己點樣做都改變唔到呢個事實，唯有放棄唔好再掙扎，等阿程可以安心啲咁樣離開香港

第六十八章 別離 中

雖然好唔想有呢一日，但要黎嘅始終都係要黎

臨離開之前嗰一晚，阿程瞓咗喺床上面好耐好耐都瞓唔到

心入面好唔捨得呢一個住咗好耐好耐嘅香港，朋友，父母，呢一個屋企

更多更多嘅，係唔捨得其實只係一個識咗大半年嘅人—Evelyn

點解唔捨得？因為阿程知道呢一次見完之後，下一次見就已經係唔知幾時，三年嘅時間，對人生黎講或者唔算太長，但對於一對只係拍咗半年拖嘅情侶黎講，呢個係一個超大嘅考驗

雖然口講就話會好快見到，三年嘅寂寞要捱得過又談可容易？身邊嘅每一個人都係話long distance 一定會分手一定會散

阿程都知道呢一個事實，但唔通因為怕散就永遠都唔拍拖咩..

而呢個世界有啲事就係明知99%失敗都要做落去㗎啦

漫漫長夜，瞓唔著覺嘅阿程開咗自己嘅notes，寫返起自己第一次認識Evelyn 嘅印象，作為留念又好，作為一份禮物送俾佢都好

另一方面嘅Evelyn打開咗自己嘅whatsapp，諗返起自己同阿程嘅一點一滴

呢個男仔識咗半年左右，估唔到就令自己為佢奉獻咗咁多個第一次

第一次同男仔Kiss，第一次帶男仔返屋企，第一次同男仔單獨過夜....

無數個數之不盡嘅第一次

更加係第一次有一個男仔令佢知道幸福嘅感覺係乜

由細到大Evelyn因為出眾嘅外表，一直都引起好多男仔對佢嘅追求，但講到第一個令佢愛嘅男仔，真係得阿程一個

Evelyn都唔知佢到底有乜令自己中意，又唔係特別靚仔，又唔係好高，當初仲以為佢係一個死mk嘅有錢仔，原來相處落先知佢都唔係一個咁嘅年

三年嘅時間，到底我地會唔會行到落去呢？

就算唔會，都希望我地經歷完呢段感情之後，大家都會有所改變，成為一個更好嘅人，就已經足夠

有冇文呀樓豬

上水，今日有文

第六十九章 別離 下

要到嘅，始終都係要到，無論阿程幾想時間停喺呢幾個月入面，時間都唔會等佢地

「叮叮叮叮....」阿程嘅鬧鐘響起，亦即係代表呢一日，係佢最後一次見到Evelyn

佢地約咗喺機場見，有老豆車嘅阿程好快就入咗機場入面，但Evelyn 就要等阿程先入到去機場，即使佢一早到咗，由於示威嘅原因，所有人都要有機票先可以入到機場

Evelyn 今日無喺阿程喊到，因為佢知道咁樣做只會令阿程更加唔捨得，佢好明白事理，佢甚至係比阿程更成熟

今次係Evelyn 第二次見到阿程嘅爸爸媽媽，第一次係喺阿程嘅畢業典禮上面

阿程需然好想喺離開之前再一次錫多Evelyn 一次，但由於父母望住，加上戴住口罩，所以只係攬咗一攬，摸咗一摸佢個頭，同埋最後一次親口聽到佢講嘅I Love You

阿程其實係一個好中意入Lounge 嘅人，因為可以喺入面坐下，食下野。

而呢一次都係佢唯一一次，佢拖到咁遲先入閘

事先打好嘅文喺飛機起飛之前send咗俾Evelyn

「金魚妹（Evelyn):

Hello，你見到呢篇文嘅時候，我已經上咗飛機，當你讀完嘅時候，我應該已經再收唔到你嘅回覆。呢度就當係你九個幾鐘嘅解悶朋友啦。

我唔係有心再整喊你，我知道你喺呢個時候應該已經喊完一次，又或者仲喊緊，但我覺得有啲嘢真係好想同你講。雖然每次講嘅嘢都係大同小異，又係回憶返我地呢六個幾月一齊嘅時間。但呢一段日子，大概係我人生之中，過得最短，而又最唔捨得嘅六個月。

(以下用書面語，好似比較文雅)

回想六月初夏，一群又一群的年輕人在烈日當空之下，為香港為自由拼了自己的前途。而當中有你，亦有我。也許我與你早已在某個毫不起眼的轉角處相遇過，但與你邂逅的一刻，已穿過我靈魂之窗，牢牢地刻劃在我腦海中。

那一夜，又是多麼的巧合。

憶起當天，剛失戀的我只願賣醉在一個無人知曉的地方，那麼我便可以不顧儀態哄出心中萬千苦惱。老實說，我並不喜歡啤酒，皆因那種苦澀的味道確實不討人歡心。大概人還未到中年，未學懂如何欣賞那味道。

我倆的相遇沒有刻骨銘心的經歷，也沒有可歌可泣的動人故事。只是一個十分平凡的開端，二人到此各有目的。男的，為忘掉上一段感情。女的，為追求昨天的美夢。而現實卻把他們交織在一起。

大概是傷心過度，當初並未有將注意力放在你的身上，而你也專注在心目中的白馬王子。談得上認識的那個橋段，已經是幾天過後。我與你因避開一陣陣臭氣熏天的煙味在那矮小的石壆上第一次互相認識。

未知是否被氣氛影響，我們交換了心底的秘密。從這刻開始，我們的命運已注定連成一線。

從那天起，我會期待你的來臨，每天準時在煲底等候你。目的，只是與你關係能更進一步。

自此之後，我千方百計尋找與你相處的時刻，以失戀為由邀請你與我一同以音樂療傷。說想去呼吸新鮮空氣，其實只是想爭取與你獨處的時間。

也許是上天憐憫，你對我感興趣的一刻竟然是因為我們同時想聽同一首歌 《思覺失調》。這也算是打開了我們的第二章：曖昧。

尚記得那天晚上我與你約定於零晨時份一起到金拱門共進宵夜。卻遲遲未見你的出現，心急如焚的我四出尋找你的蹤跡，終於在那條黑暗的小道中弊見你與他正為組織之事爭持不下，差點要大打出手。

一時情急的我只好跟在你倆身後以確保你的安全。很天真，對吧？但當時的我並不知應以何身份介入你們的討論。始終，我們才相識數天。如是這，我默默在你身後跟了個多小時。你多番試圖把我勸退，可能是為了爭取本屬於你的二人空間。只是在我一次又一次的堅持下，你才允許我留你身後。我知道如此舉動會以起你的反感，始終我們除了是剛認識的陌路人外，甚麼都不是。而他卻是你朝思暮想多年的意中人。但當下的我不知進退，只願把你的安全放在首位。

直到那天，我們才交換了電話號碼，也知道了你的芳名。而那，只係我們的開端。

阿程」

呢一次係佢第一次咁做，但亦只係得呢一篇

唔好意思，大家有久候了

呢幾日chur緊assignment 大家等我星期五做完出文

應該會一次過出晒

加油樓豬

樓主