第六十章 別離
隨住社運嘅開始,琳琳可以揾到阿程嘅可能就少之又少,畢竟自己無呢個膽量可以四處陪阿程佢。佢唯一知道嘅就係六月中嗰陣阿程終於同kristy分咗手,而原因係出軌,但實際上係點,佢都唔係好清楚,阿程唔講,琳琳都唔敢問
好快就黎到七月十號,一年一度有好多人要排隊上IFC嘅日子,琳琳都好緊張自己考成點
「叮~」阿程仲返緊學嘅途中就收到琳琳嘅message,望住佢嘅成績表,全部都5以上,就知何入到想入嘅科
「恭喜哂你啊,終於唔使再擔心自己成績,一直以來嘅努力有回報」阿程同佢講
有人歡喜有人愁,阿程攞完自己嘅成績表之後反而開心唔到。雖然考得唔可以叫係差,亦足夠入到三大,但同理想嘅成績都有啲分別
夜晚食飯嗰陣老豆仲同阿程講叫佢去外國讀書,唔好返黎香港呢一個無希望嘅地方。由細到大阿程都唔敢違抗老豆嘅意思,而今次都唔例外,即使自己唔想,但都唯有聽老豆講去外國讀
「我老豆叫我下年去外國讀書喎...」阿程將呢一段message send咗俾兩個人
「決定咗啦?可唔可以唔去?」呢句message阿程亦喺兩個人嘅對話之中收到...
「sorry...」阿程無作過多解釋,但一句sorry足以形容一切
「你聽日得唔得閒?我想見你」琳琳少有地主動約阿程
第二日出到黎嘅琳琳明顯唔夠瞓,而且個人都無乜精神,連阿程都睇得出
「你還好嗎?有無事?你好似好攰咁」
「無事啊,琴日瞓得唔好啫...」琳琳瞓得唔好嘅原因,其實就係阿程...
「要唔要去休息下?開間房?」阿程呢個時候做咗個大膽嘅決定...