呢排個個都講緊三峽大壩就黎出事乜乜乜,一旦真係發生我相信連登仔一定會大肆慶祝,小鳳姐一定會好唔得閒,甚至會有人效法上年何已完落選後去開party慶祝等等。
小弟想呼籲下大家唔好公開咁做。
點解先?
最主要係唔想影響手足打國際線。
呢單野一定會係人類歷史上最大型既自然/人為災難之一,直接死亡人數保守估計都會係百萬起跳,計埋災區受嚴重破壞後引致糧食短缺,導致災民營養不良,再引致瘟疫橫行,諸如此類,最終死千幾二千萬人係絕對有可能,一個唔小心成為引發支爆既最後一根稻草都唔出奇。
面對住咁大既災難,世界各國就算同中國關係幾差幾想佢仆街,檯面上都一定會致以深切慰問沉痛哀悼,甚至會提出人道援助 (當然金額/數量會有幾多,或者到最終係咪口惠而實不至就另計啦)。
咁你話喇,呢個時候走出黎大肆慶祝,個畫面會幾咁難睇?
另外,你話係人道主義、左膠大愛、偽君子攞光環乜都好,主流西方社會喺大災難發生時/發生後通常會有種要幫助受難平民既諗法 (無論個政府有幾仆街),於是就會有唔少民間組織捐錢捐物資 (大規模D既NGO 籌旗、細規模既女童軍賣曲奇等等),明星又拍片寫歌打氣等等 (詳情唔多講啦,大家2004年南亞海嘯、2008年汶川地震、甚至最近武漢肺炎都見過係點操作);呢D時候我覺得如果一味跳出黎講指責佢地奶共 (不論佢地係咪真係奶共) 實在唔多理想。
講完一大輪咁你想點呢?
好簡單,悼念,仲要係公開悼念,搞晒大型集會咁去做。
屌你呀,鄰國人民死活又關我事?
的確係唔關架,所以個主題就唔係以前支聯會六四式 「沉痛哀悼長江下游死難同胞」,而係「紀念被共產黨害死既千萬冤魂」。
仲有,黑警夠膽反對集會既話仲可以篤灰上微信話佢地唔尊重死難同胞正漢奸添,我就買定花生等小粉紅出征喇。
咁咪即係做戲?
某程度上的確係,目的就係要攞光環 – 有咩理由班鬼佬走晒去扮救世主霸佔道德高地我地唔可以呀?扮之嘛。
最後加返兩句:
光復香港,時代革命
五大訴求,缺一不可