[殭屍/鬼怪/打鬥]《噬魂》我由古惑仔變左做現代道士

1001 回覆
81 Like 6 Dislike
2020-09-10 20:16:24
在一條昏暗的後巷裏,一個身影躲藏在暗角裏

他身材健碩,身穿黑色長袍

這時一個中年男人醉醺醺的走進後巷

「風繼續....吹!!」那醉漢大聲的唱歌,腳步不穩的走著

穿著黑袍的那人,慢慢在暗處走出,跟從著男人的步伐,一點一點走近

男人突然轉身!

「你係邊個!做咩跟住我?!」猜不到那醉漢尚有點清醒

黑袍沒回答,直接出手

醉漢反應也不慢,向後跳一步避開,再跳起飛膝

黑袍用左手擋住,並用左手捉醉漢的腿,把他拋向牆,牆身上剛好有利物突出,醉漢的左手手臂瞬間被刺穿,血液流出

「你到底係邊個!」醉漢在痛楚的幫助下變得更清醒

黑袍依舊沒回答,一步一步的走近醉漢,黑袍比醉漢高出一個頭有多

「三令七法,借法觀事!開!」原來醉漢也是學術之人

「明明係人,點解咁重陰氣」醉漢驚訝

「敕令!風神借法!」

一陣強風襲來,後巷的雜物都被吹起,神秘男子卻分毫未動,只有黑袍被吹起

黑袍被吹起後,他沒有右手

醉漢右手拿出匕首指著黑袍

「我獨來獨往,應該甚少得罪人,你係咪搵錯人?」醉漢問

黑袍依舊沒出聲

「你唔講野咁我走啦」醉漢轉身打算離去

黑袍上前,想捉住醉漢

醉漢突然轉身,用捆仙索纏住黑袍的手

「都估到你㗎啦!」

醉漢跳起,騎在黑袍的肩膀上,並用繩索綁住黑袍的頸,用右手拉緊

黑袍亦用他的左手往上不斷拉扯,想把醉漢拉下

醉漢當然也在閃避

他更將雙腳蹺實,整個人靠後躺下,將繩拉得更緊,黑袍的頸被勒著,雙眼都充血,爆出紅絲

黑袍索性跳起整個人向後躲下,壓在醉漢身上,傳出骨折的聲音,醉漢吐出一口血


醉漢把黑袍推開,爬起來

「嗄.....真係嚟攞命㗎喎....」醉漢按著胸口

他飛出繩,纏著黑袍的手,但他小看了黑袍的力氣,黑袍一扯就把他拉到面前,黑袍出拳,打到醉漢胸口,醉漢被打到飛開,黑袍用繩再把他拉過來,再出拳

重複著飛開、出拳、飛開、出拳

好快,醉漢已被打得半死,血一直從口腔流出,跪在地上

「你...到底......係咩.......人」

黑袍走近,一腳踢在醉漢的臉上,直飛到牆上

「啊!!!」醉漢暈到過去

黑袍用捆仙索綁在醉漢的腰上

捉著繩的另一頭,用力揮動繩索,黑袍力氣十分之大,靠著繩索連醉漢都揮動起來,他揮著繩,將醉漢不斷撞到牆上,疼痛把醉漢撞醒

「啊!!」又是慘烈的吼叫

嘭!!

最後一下.....

醉漢的生命,完結

黑袍扯著醉漢的頭髮,把他拖行,消失在黑暗中......
2020-09-11 00:15:48
樓主我番來了
一炮過追曬一星期爽好多
2020-09-11 11:37:23
最緊要睇得爽
2020-09-11 16:21:06
留名先
2020-09-11 18:22:44
多謝
2020-09-11 20:21:33
「咁點解唔辭職?」我問他

「要搵食啊,手停口停㗎」他慨嘆

「唉,咁啦,依個我電話同屋企電話,我睇下有冇啲兄弟可以幫到你,我依家要上一上雍雅山做野,轉頭再同你傾」我拍拍他之後站起來

剛剛被我打倒的那兩個廢柴已跑走了

我沿着上次走的路行上去,大概十分鐘後就看到雍雅山

去到入口時已看到那個叫習維的助理在等我

「你好~先生早晨」他向我鞠躬

「早晨」我也禮貌地點頭

「先生,今日得你一個?」習維問我

「係啊,我一個」

「好~」習維轉身,帶我上去

再次去到3號屋

「段先生你好,今日係我幫你睇下間屋嘅」我禮貌地打個招呼

「哦~好啊,得你一個都得㗎啦」段先生奇怪的笑了一下,但我也沒多想

但清晰可見,這間屋比上次來的時間變得更暗,明明是一大清早,怎會暗到這個樣

「咁不如你講下覺得間屋有咩唔妥」

「比上次更奇怪,我會聽到怪聲,有時瞓教個陣門口會有啲敲打聲」段先生說出的,都是一般鬧鬼會出現的情節,但九叔明明說這間屋很乾淨,真奇怪

「好,我幫你睇睇」

我走上樓梯,上一層看看他的房間

進到房間,的確也是很昏暗,但這樣看就沒有看到有什麼鬼怪存在

突然!門用力的關上了

我轉身,拍門

「段先生?」並沒人應我

「大鑊!」

我用力的踹向門,希望把門撞開,但門比我想像中牢固

一腳!

兩腳!!

三腳!!!

終於打開了!足足用了三腳才把門打開...

衝出房間後,我定眼一看

到處的擺設都被弄亂了

「咁快手?!」我才被困一好分鐘左右,那麼快就可以弄個天翻地覆?!

我下樓梯到下一層 —— 客廳

客廳同樣也是變得混亂不堪,沙發、茶几、雕像、電視全部被翻倒了

「段生!」我邊叫邊從工具袋拿出彎刀旁身

「段生!」我在這豪宅到處遊走都不見他的蹤影

「喂!」突然背後傳來一聲音

我轉身,但也太慢了,他已捏住我的頸

「係....你?!」

畫面去到九叔那邊

家裡的電話響起

「喂」是九叔拿起電話

「九....叔...救....命!!」

嘟....嘟.....嘟....

電話掛斷了

「喂!喂!航!!」

「英!行!航出事!」九叔衝去拿工具

「𡃁仔出事?」英叔緊張的問

「係!」

「得!」英叔拿出新的弓

出發!
2020-09-12 14:31:22
自推
2020-09-12 22:08:54
「𡃁仔做咩?」在趕往現場的英叔問

「唔知,佢打嚟講咗句救命就收咗線」九叔一臉緊張的

「但個日間屋好乾淨㗎喎....」英叔不解

「唔理啦,去咗先」

到達大學站

九叔走近那保安

「今日有冇見過上次圍你嗰個男仔?」九叔問他

「有,仲同佢傾咗兩句」保安回答

「得,唔該」九叔匆匆離去

去到雍雅山入口,保安亭裡的保安全暈倒了,周圍的閉路電視也遭到破壞

「前面!」九叔指著前方

原來是習維,他躺在3號屋的門外

「喂!喂!」九叔拍他的臉

習維朦朧中醒來

「入...面......」他指著屋內

聽到後,英叔率先衝入屋

「你自己坐唔坐到?」九叔扶起習維

「得...」

「好,咁你抖抖先」語畢,九叔亦進入屋

當九叔進去後,習維輕鬆的站起來,拍一拍西裝上的塵土,然後擺出一個意味深長的笑容把門關上並鎖緊

屋內的九叔卻毫不知情,他趕上了英叔的腳步

「四圍笠笠亂,但一個人都冇」英叔跟九叔說一下情況

「上多層睇下」九叔指著樓梯

「好」

沿路上樓梯,牆身上有血跡

「啲血...好唔正常」九叔看著牆上的血

「瘀黑色.....殭屍」英叔說

「行快兩步!」

突然從後撲出兩隻童殭,九叔及時一腳把其中一隻踢開,英叔跟童殭糾纏一番後亦用弓把童殭打開了

「又係童殭?!莫盡唔係死咗㗎啦咩?」英叔驚訝

「唔理啦!搞掂先講」九叔拿出雙劍

九叔從樓梯跳下,腳踩在童殭的胸口,把他踩在地上,左手橫斬,把童殭的頭斬下,右手直刺在胸口

就一瞬間,一隻童殭已被殲滅

英叔則近距離的對著另一隻童殭發箭,直接把童殭打得灰飛煙滅

「上!」九叔跑上樓梯

他們一路殺到天台,沿路在狹窄的樓梯間遇上四隻童殭,三隻低階殭屍,但都一一被九叔他們處理掉

當他們天台後,情況卻遠超出他們想像

「𡃁仔!!你做咩啊?!」英叔大叫

「航!冷靜啲,咩事?」九叔也嚇了一跳

他們嚇一跳的原因是因為.....

我站在天台的邊緣,捉住段先生的頸,把他「半天吊」

「九叔!佢係殭屍嚟㗎!紫色眼!」我激動的說

「張師....父,救命!你...徒弟...傻咗」段天向九叔求助

「航!快啲放手!!」九叔喝令我

「九叔啊!點解你唔信我!佢係殭屍啊」我再次講出我眼見的事實

「九,會唔會係𡃁仔比童殭迷惑咗?」英叔偷偷的在九叔身邊說

「唔知,剎停咗件事先講」

「𡃁仔!你話佢係紫眼殭屍?咁你唔係佢手腳,放低佢,交比我處理」英叔行近

「英叔!我放手就搞掂㗎啦!佢一跌落去就玩完!」

「唔好!佢係殭屍啊嘛,咁佢一定唔會跌死,將佢交比我就得」

在英叔分散注意力下,九叔成功悄悄的走到我身後,把我撲倒,我也因此放開了段天

「九叔!佢真係殭屍嚟㗎!!」我不斷的大叫

但換來的不是信任,而是九叔的拳頭,他把我打暈了

「段先生...唔好意思,你有冇事?」九叔扶起段天

「嗄....嗄....冇事,唔關你事」段天摸著頸說

「點解會搞成咁嘅?」九叔問

「啱啱佢入咗我房睇下有咩古怪,突然四方八面都有啲怪物跳出來,佢一開始都有保護我地,但慢慢退到去天台,佢就突然發咗癲咁」

「好....真係唔好意思,樓下嘅嘢我已經幫你處理好㗎啦」九叔再次道歉

「唔緊要,唔該曬你」

就這樣九叔把我抬回家
2020-09-13 21:20:47
九叔帶著我離開了雍雅山範圍後,就把我弄醒了

「九叔....」我模糊的醒來,被打的地方還有點痛

「清醒啲未?」九叔問我

「𡃁仔你搞咩啊」英叔叉著腰問我

「我好清醒....」我坐起來

「到底頭先咩事?」九叔再問

「頭先.....

客廳同樣也是變得混亂不堪,沙發、茶几、雕像、電視全部被翻倒了

「段生!」我邊叫邊從工具袋拿出彎刀旁身

「段生!」我在這豪宅到處遊走都不見他的蹤影

「喂!」突然背後傳來一聲音

我轉身,但也太慢了,他已捏住我的頸

「係....你?!」我驚訝

「係啊~先生,係我啊」

捉住我的是習維!

我提起前臂用力的撞在他的手踭,他捉住我的手鬆脫了,我馬上再補一拳,打在他的肋骨處,他後退一步

「先生~可以再大力多少少」習維拍一拍西裝

「我硬係覺得你講野好似一個人.....」我由第一次聽到他說話就覺得他說話的語調很熟悉

「喔?係咩~咁請問先生覺得我似邊個呢?」習維雙手放在腰後

「我知我就講咗啦.....」

「會唔會係段一凡?」不是習維的聲音

我望過去傳來聲音的方向,聲音的主人是段天!!

他蹺著二郎腿,手拿著紅酒杯

「你識段一凡?!」

「唔止識,仲好熟」他眼神在一瞬間變得凌厲

「段天....段一凡....」

「好啦,唔洗估啦」段天站起來,用腳一踢把本來翻倒了的茶几重新放好,把紅酒放下

「佢係我細佬」段天盯著我

「呃......」不是吧....居然是兄弟

「習維,你出去先,我慢慢玩」段天脫下西裝外套,解開襯衫的袖口鈕扣,走近我

「你想殺咗我?」我不自覺地後退

「咁你又唔洗咁驚,我未諗住殺你住,依家殺你一啲都唔好玩,遲啲先啦」段天縮一縮膊,鬆動筋骨

我感覺到自己掌心都冒汗了,所以我份外大力地握著彎刀,手都紅了

「唔好咁緊張,想睇下你身手姐,我都想知莫盡睇中你啲咩」

「不過,比啲前菜你熱下身先」段天拍一拍掌

在旁邊跳出兩隻童殭

我一時不為意,跟其中一隻童殭對望了

我知道自己會墜入幻象,所以馬上閉上眼睛,集中意志跟自己說

「假嘅!一陣見到嘅都係假嘅」

但也沒有用,我再次張開眼睛時,面前的景象已轉變了,變成了我曾經住過的地方

兒童之家....

一個我盡不想提起的地方,但它又是我人生的轉捩點

那時的我是一個小肥仔,個子不高,性格比較怕事,基本上是處於最低地位,兒童之家裡年紀比較大的小孩都會以耍我為樂

這時在我面前出現一班小孩,這群小孩正追著另一個小孩,他們愈跑愈遠

「喂!點啊肥仔!跑唔郁嗱?」其中一個小惡霸叉著腰說

其他的同黨附和的笑

「唔好再打我啦....我冇力啦」被欺負的那小孩求饒

「你跑得贏我地其中一個,我地咪唔打你囉」另一個個子比較高大的小惡霸說

「咁姐係冇講過姐...」

「啊!比機會你仲咁多野講!打佢」

在一聲令下,在場的小孩都衝上去對被欺負的小孩拳打腳踢

打到累就散開

「好啦,再打就會比人發現㗎啦!走!」

整群惡霸一起離開了

我走向被欺負的小孩
2020-09-14 20:44:59
我走到他面前, 他抬頭看着我

這小孩是小時候的我?!

「呃....」我一時反應不了

「痛唔痛?」我問他

「痛....」小時候的我回答

「痛,點解唔還手?」

「唔得㗎!我都唔夠佢地打...」他先是大聲的說,然後又慢慢低下頭

以前的我是這樣的嗎....我自己都忘記了

「唔夠打?」

「嗯」他點頭

「你試過未?」我俯視他

「未...」他瑟縮的說

「試都未試過點知自己唔得啊!」我突然大聲,把他嚇了一跳

「我同你講,你愈驚就愈要面對!你繼續逃避,只會令佢地變本加厲」我指著他說

「咁我應該點做啊....」他依然瑟縮一團的坐在地上

「反擊!」

「姐係要我撩佢打?」他問我

「唔係要你撩佢地打交,而係下次再比佢地蝦個陣,要搵準時機還擊」

「搵準時機....」看來他有點不解

我在他耳邊說了一句語,他就馬上點頭明白

「咁有冇信心?!」我問他

「有....」

「大聲啲!」

「有!!」

「好,咁先似係我嚟㗎嘛」

我伸出手

他看著笑,亦伸手捉住我手,我把他拉起來

「應承我,以後努力啲做人,跟從自己所想,可以?」我捉實他的手

「嗯!可以!」他用力的點頭

哈~這樣算是自己給自己的承諾嗎?不知道,但起碼我做了一件一直很想做的事—— 改寫自己前半生

這應該也算是成功了吧

我從幻象中醒過來, 一張開眼就看到兩隻童殭在緊盯著我,我馬上低頭,避開他們的視線,憑着直覺揮動彎刀,好快,地上傳來兩聲撞擊的聲音,是童殭的頭顱

段天站起來拍掌

「唔錯,意志力幾好,咁就睇埋身手啦」他解開領呔,轉轉手腕

他有能力控制童殭,即是說他的實力起碼有莫盡的程度,我怎可能跟他過招啊,上次跟莫盡過招,幸好有神秘人相助才能撿回性命,已經算是非常幸運了,現在又多一個段天...天啊!

「點解成日都係我㗎!」我心裡大罵

段天開始走近我

「咁開始啦喎!」

段天跨過茶几,跳到我面前,我揮刀橫斬,段天比童殭的動作快很多,在我的手剛動時,他就猜到我動作,蹲下避開了我的斬擊

蹲下後,他一招掃堂腿把我掃倒

我倒下後也還擊,斬刀斬向他雙腳,他向後一個小跳步避開,我亦襯這空檔站起來

這次我搶先出擊,飛出彎刀,引開他注意,自己則衝上前抱住他雙腿把他摔倒在地,我騎在他身上,伸出手接回彎刀,雙手捉實,向段天的胸口插去

段天當然沒那麼容易被的打敗,他起膝撞向我的後背,撞得我整個人向前飛撲

我左手按地,右腳著地發力,成功轉身,但在轉身後,段天已向我撲來

跟剛剛相反,現在是他騎在我的身上

接下來的就是一拳一拳的打在我臉上,當我快要暈過去時,他又突然停手,站了起來

「依家我比個機會你求救,得一次機會,好好把握」他望向自己手上的血,這些血是我的

他多看兩眼後,居然伸出舌頭,舔走手上的血,還擺出一副享受的樣子

我留神一看,才發現他的眼睛變了紫色,口裏亦長出了兩隻撩牙

我面前這個富豪是隻殭屍?!

「求救啦,等緊你啊」他繼續舔著自己的手

我拿出電話,致電回家

「九....叔....救命」我求救

當我說這句後,段天就向我衝來


..........

「成件事就係咁啦」我說出整件事的始末

「咁點解最尾突然會係你捉住佢,要掉佢落街呢?」英叔疑惑的問我

「我都唔知,佢突然放軟手腳,唔攻擊,所以我咪想殺咗佢」我解釋

英叔九叔對望了一眼,沒說話

「你地....唔信我?」我問

「返去先再講」九叔轉身離去
2020-09-15 20:41:56
今日暫停一更
2020-09-16 23:08:34
回到家中

「九叔啊!你地真係唔信我?」我看著他們二人

「唔係唔信,只係你始終比童殭嘅幻象入侵過意識,可能記憶會有啲混淆」九叔說

「我好肯定冇呢.....」

「得啦,我地會留意下段天依個人」感覺九叔就在膚敷衍我.....不過也沒辦法,他們也沒錯

但我心裏知道,我沒有被混淆記憶,段天必定是殭屍

就這樣,段天這件事就不了了之,我再也沒刻意提起過,最起碼身邊沒有發生什麼大事



平靜的日子一天一天過去

不知不覺

到了初夏時份

「好鬼熱啊!不如開冷氣啦...」我上身赤裸,滿身是汗的趴在桌上

「我都想開啊....」英叔同樣也是滿身大汗的躺沙發

「好熱咩?我唔覺喎,心靜自然涼」九叔在搖椅上看著報紙

「心靜?心靜我死咗啦!」英叔抱怨道

「你地唔好吵喧巴閉就唔熱㗎啦」九叔依然平淡的說

「.......點解可以唔覺得熱㗎」我疑惑的問九叔

「慣咗」九叔說

「啊!!邊有可能會慣㗎....你真係痴線㗎」我真的佩服得五體投地

「熱下熱下就慣,以前係道館由朝熱到晚都係咁」

九叔說出這句後,我轉個頭望向英叔

「望咩呀望!怕熱唔得啊?!再望就插盲你!」英叔怒視我

「呃.......」

我馬上轉話題

「九叔,點解依掛都冇乜人搵你捉鬼嘅?」我問九叔

「唔係成日有,同埋冇得捉先好,即係代表冇咁多鬼怪遺禍人間

「都啱嘅,加上你有咁多錢,唔洗做都夠過世啦」雖然九叔到現在都還沒透露自己的身家有多少,但可以肯定的一點是,絕對不少!!

「我啲錢係咁曬㗎咩?!」九叔也怒視我

「唔係唔係!」我搖手說不

「啊!我去買餸!」我穿回上衣

「嗱!你買返嚟唔啱我食呢,我就打鑊甘嘅」英叔握緊拳頭看著我

「咁都要打?!咁你想食咩啊」我問他

「哈!我自己都唔知!總之唔啱食就打」英叔仰天大笑

他應該是熱到傻了,唉~真難服侍

「食咩餸好呢.....琴晚就食咗豬同魚」我在心裏細數著昨天吃的餸

「啊航」

回頭望,是夢晞

我跟她自從上次後就接近沒有接觸,話都沒幾句,只是碰見時會尷尬的寒暄幾句

「hi,食咗飯未啊?」我說,老土到極點的開場....

「食咗啦,啊媽習慣早食飯啊嘛,你又唔係唔知嘅」夢晞拍一拍我

「係喎,真係唔記得添」

「其實我地唔洗咁尷尬喎,我諗通咗㗎啦,我地可以重新認識!」她說出一句我想不到的話

「重新認識?」

「嗯!」她點頭

「你好~我叫呂夢晞」她伸出手

我呆了一呆

「做咩啊?唔想識我啦?」她側一側頭,看著我

我應該....是時候放下葉靈了嗎.....

我緩緩的伸出手

「你好,我係陳天航」我看著夢晞笑

她也回報我一個甜甜的笑容

「好~新朋友!你要去邊啊?我陪你去啦」她說

「我要去買餸啊.....英叔話唔啱佢食就打我...」我一臉苦惱的說

「哦~咁好簡單姐~交比我啦~」夢晞擺出自信的表情

「好!我信你」

就這樣,我跟夢晞出發去街市

「嗱,英叔中意牛肉,九叔中意食魚」夢晞向我教路

「識佢地咁耐,都冇留意佢地鍾意食咩添」我摸著後腦勺,傻笑

「你地啲男人又點會咁細心啊」夢晞斜視我

「咁我地今晚煮咩餸啊?」我問

「豉汁蒸倉魚、可樂雞翼、菜芯炒牛肉,啱唔啱你食啊?」

「啱啊!直頭正添啦!」我不斷點頭

「傻佬~」她看著我傻笑

突然,在我眼尾處掠過一身影

感覺很熟悉.....是....


「晞!你企係到等我一陣!我好快返!」

「下?!你去邊啊?」

夢晞問我,但我說完後,就頭也不回的我就跑往剛剛那身影經過的地方

「啊武!武!」我邊跑邊叫

那麼快就不見了蹤影?!我轉身

又看到啊武的背影

「喂!啊武!」我追上前

呠———!!

隨即而來的是急剎車的聲音!!

一輛大貨車停在我的面前

原來我不知不覺追出了馬路,幸好沒事.....

但啊武的身影又不見了,是我的幻覺嗎?
2020-09-17 15:58:58
live左
2020-09-17 18:56:25
多謝支持,仲未收工,盡快出文
2020-09-18 02:09:16
2.都未收工
2020-09-18 02:12:02
仲未啊🤦🏻‍♂️🤦🏻‍♂️
2020-09-18 02:12:32
「啊航!」

叫我的是夢晞

「你搞咩啊!?衝出馬路!嚇死人啊!!」她緊張的捉住我

「冇事...放心」我輕輕拍她的頭,但視線還是到處張望,搜索著啊武的身影

「你到底做咩啊?周圍望,定係你見到嗰啲野啊?」她也陪着我到處張望,好像很害怕見到鬼一樣

「唔係啊~我見到一個好耐冇見嘅朋友姐」

「咁緊張,女仔嚟㗎?」夢晞瞇起眼看著我

「唔係啊,傻妹,男仔嚟㗎」

「男仔?!死啦!冇地位啦!!」夢晞裝作喊的樣子

「哎啊~唔係啊,係我一個好兄弟嚟,唔見咗一段時間㗎啦,啱啱見到一個好似佢嘅人,不過我諗唔係佢啦」

「咁我地返去啦,九叔等緊我地㗎」夢晞拉著我走

在我跟夢晞轉身走後,正有一身穿黑袍的身影站在不遠的地方看著我

回到象山

「我返嚟啦!」我率先步入家門

「咁耐㗎!死仔!係咪想餓死我?!」

我一開門就聽到英叔的咆哮

「英叔!有冇掛住我先!」夢晞在我身後跳出

「啊晞!你今晚係咪煮飯比我食啊?」英叔開心的說

「係啊,餸都買埋啦~豉汁蒸倉魚、可樂雞翼、菜芯炒牛肉,啱唔啱食啊?」

「啱啊!太好啦!依兩條友煮飯真係好難食,有你煮比我食就太好啦!!」

「咁掛住我啊?」夢晞笑得開心

「最衰都係你!而家先氹番佢搞到我咁耐都冇得食啊晞煮嘅野!
2020-09-18 02:13:00
睇住先打到一半咋
2020-09-18 02:13:26
新讀者lm
2020-09-18 02:17:11
咩工咁夜都唔收
Big4?
2020-09-18 03:49:21
我都想啊,但唔係啦
2020-09-18 03:49:33
多謝支持
2020-09-18 14:04:57
通完宵開工今晚停一日,太攰
2020-09-18 20:09:00
2020-09-18 22:14:59
多謝支持
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞