話說警方喺facebook專頁，無端端用咗上世紀80年代嘅食字爛gag腔調，出咗2幅標語圖嚟諷刺抗爭者：「細蓉好，大蓉好，唔做勇武就最好」、「凍奶茶，熱奶茶，犯法一定比（俾）人查」。先唔講佢哋打錯個「俾」字，點解惟獨係搵雲吞麵同奶茶嚟押韻呢？雲吞麵、奶茶同抗爭者又有乜關係呢？點解個post咁無厘頭都出到街嘅？唔通批准出post嗰位，都覺得咁樣好「風趣」咩？藍絲嘅品味就只係咁？相信你哋睇到呢度，已經係一萬個黑人問號。
但同樣係食字gag，網民嘅改圖就明顯技勝一籌。早排有反黑探員私藏過千萬元冰毒，懷疑偷走1.6億元毒品案中嘅部份證物，企圖轉售圖利。有人就套用番警方post嘅2杯奶茶圖，簡單修改標語字眼，反嘲警員私吞冰毒：「多冰，走冰，香港警察販毒運冰。」上句同下句唔止押韻，兩句嘅主語仲要係真正語帶相關，同警方嗰句完全係兩種層次；署名「HK Police」都變成「HK Pol-ice」，相當鬼馬。精警嘅改圖，仲出自曾經做過紀律部隊嘅林卓廷手筆；佢索性將杯奶茶改做紅豆冰：「紅豆冰，菠蘿冰，黑警返工就偷冰。」
