【從毒撚變成浪子 – 陪我走過的一些女性們】
【第二十四章】- 【EX飯局】
「HI…好耐冇見啦。」我約左Connie係長沙灣站等,佢早到左少少。
「HI」Connie同我都表現得好尷尬。
Connie打扮同之前比唔同左,佢著上行政LOOK同平日便服比好大差別,成熟左好多。
「我地食咩?」
「去平時去食果間餐廳啦。」Connie講既係以前我地經常會幫襯既一間細小西餐廳。
「好啊。」其實如果佢冇提出,我都係打算去食依間。 因為間鋪係荔枝角同長沙灣之間既小街之上,我唔怕會撞到熟人同事。
「你女朋友比你同我食野既?」去到餐廳Connie問我。
「….我冇同佢講。」我同Kristy講今日同兩個兄弟去打邊爐,應該佢唔會中途打比我搵我,加上我地係間地區細餐廳食,快快手走完就散之後打比Kristy應該冇問題吧。
「哦… 」Connie冇咩特別反應,係度睇餐牌:「我地叫平時食開既意粉同Pizza再加雞翼好唔好啊?」
「好啊。」我都估到佢會想食番依幾樣野食,不過我對佢提起”我地平時食開既XXX”有少少反感。
「你最近點啊?」佢問起我。
「冇咩點啊,你呢? 保險做得OK?」
「OK!!! 有客買架。」佢自滿地說。
我依個時間先留意到Connie神情有一絲憂鬱,帶有一點傷痛感覺。
「你做野做得唔開心?」
「下? 冇啊,幾好幾自由啊….」
「D客會唔會….佔你便宜?」我諗左好耐終於諗到點問佢會比較冇咁尷尬。
「你意思係搞我? 哈… 我叻女黎,梗係識避開D客。」Connie自我稱讚地說:「佢地成日想約我去似酒,想我醉左之後搞我。」
我聽完真係有點火起,一早講左做保險既女仔一定會比客….
Connie續:「我當然唔會同果D客出去傾啦。」
我諗Connie又真係唔係D會簽床單既人….
當晚我地邊食邊傾,都係圍繞一D無關痛癢既話題,最後我地點左一個甜品,當係生日蛋糕作結。
「多謝你陪我過生日啊….」Connie同我離開餐廳後同我講。
「唔晒客…」我未講完Connie就撲過黎緊緊攬實我: 「….Connie我…有女朋友架…..」我唔知道佢係唔係想同返我一齊,但我都拒絕左佢先。
「我知….但係家明….我…. 」Connie講到一半停左。
「??」我唔知佢想講咩,我仍然比佢緊抱著。
「….我地可唔可以…做愛啊…..?」Connie講出一個令我以想不到既說話。