【從毒撚變成浪子 – 陪我走過的一些女性們】

995 回覆
71 Like 8 Dislike
2020-06-09 14:35:07
【從毒撚變成浪子 – 陪我走過的一些女性們】

【序章】

愛情就像燒煙花。
開始時幾個小的煙花,令人期待又賞心悅目;隨之而來愈燒愈旺盛愈燦爛,眼中被煙花吸引,除了煙花什麼都看不到。
儘管如何燦爛悅目,煙花也有盡時,激情過後,令人重新看清楚一切。

-----------------------------------------------------

「家明,你要好好對第時老婆唔好好似你個衰老豆咁出去玩女人啊。」

「知道阿媽。」

印象中係小學或者更早之前,爸爸返大陸做生意,好多日子都唔係香港,屋企就交由阿媽打理,照顧家姐同我一切起居。

唔記得邊一日,阿媽見阿爸好多日都唔返屋企,就同家姐仲有我返上深圳搵老豆。

一切記憶我都已經好模糊,唔知點解上到去阿爸公司,阿爸介紹左一個姐姐比我地識,另外仲有一個比我細既小朋友我識。

當時自己仲細,唔知咩事就同家姐一齊同果個小朋友玩,印象中我地係玩得幾開心。

玩左一段時間,阿爸就帶我地三個人坐私家車去關口,係車上我仲問阿爸:「爸爸,好掛住你啊,幾時可以再黎搵你同果個小朋友玩啊?」

我冇得到阿爸回應。落車後阿爸用力抱實我同家姐:「對唔住,爸爸要係大陸賺錢啊,你地兩個聽阿媽話乖乖地讀好書。」

當時我唔知發生咩事,見到阿媽已經行到好遠。 而大我5年既家姐就拉住我追返阿媽。

係火車上阿媽一邊喊一邊攬住我地兩個:「美玲、家明….嗚….」

雖然唔知發生咩事,但我好有印象依一幕。個一刻我大約知道係阿爸激親阿媽。

「媽….唔好喊,我錫返媽咪。」 細過既我只可以咁去令阿媽開心。 我同自己講要好好聽阿媽話同比心機讀書。

-------------------------

轉眼間,我已經讀中學。 家姐就讀上大學。

阿媽久不久都會同我說教,長大既我知道阿爸阿媽當年既事,所以我雖然覺得阿媽好煩但佢既說話仍然係會放入心內。

因為父母既事,我從小就同自己講要對愛情認真。
2020-06-09 16:32:57
【從毒撚變成浪子 – 陪我走過的一些女性們】

【第一章】

「Kristy….同我分左手啦….」

華少夾起剛滾起既肥牛放入口:「唉~ 咪咁啦,你又唔係未試過分手比女飛,算9數啦。」

「係啦… 女去女還在啊~」阿文打算放雞子入爐中:「補下身先~」

「咪落啊吊…雞子好嘔心。」我一直覺得雞子好嘔心,點解D人會覺得可以補身去食!!!

「頂! 聽日同Joyce飛台灣啊,梗係要補身!」 阿文唔理我反對照將雞子放入麻辣湯底中。「你咁怕食清湯啦。」

「唉…. 」我無奈地夾清湯果面食物。

「點啊。 Kristy同你做咩事?」華少係個會比較關心兄弟既人。

Kristy同我發生咩事?

-----------------------------------

畢業後我加入一間大公司做Sales & Marketing既老散。 由於公司真係太大,Sales 同 Marketing係分開兩Team人做。 我係做Marketing果邊。

Marketing主要負責落廣告做FB同Roadshow等等既後勤野。

而Kristy就係做Sales,主力搵客sell野。

係公司做左半年左右,Kristy就加入。 算同我係同期吧。 佢加入公司果日,可能話係震動左整個Sales & Marketing team。

水汪汪既一雙眼睛、長曲既頭髮、配上白恤衫短裙露出幼長小腿。「Hi我叫Kristy,大家多多指教。」

「喂… 條女正啊!!!」坐我側面既Zoe同我講。

「係啊!! 」 第一次見到Kristy我比佢既美貌迷倒。

「哈… 但你好似有女朋友架~~~ 咪亂黎啊你。」 Zoe 見到我呆呆地望住去左另一面自我介紹既Kristy時對我作出提醒。

「咩啊,望下姐….」 的確我係有女朋友,大學細3年既師妹 – Connie。

-----------------------

「家明,今晚得唔得閒?」Connie問我。

「唉… 唔得啊,今日要加班好多野做。」下個月有展覽會搞,忙著要處理準備工作既我又冇得見Connie。

「又冇得見…. 我地成個星期冇見啦。你返左工之後對我唔同左。」Connie開始抱怨。

的確,自從我返工後,同Connie出街次數係少左好多,有時連電話都傾少左好多。 但我真係好想做好份工希望可以搵多D錢可以同Connie有個美滿將來。

「係啊。 真係好忙,等我完左展覽會就同你去旅行啦。 」

「下… 你完左展覽就到我考試啦,我就係想考試前見下你….」

「唔…. 咁我地可以星期六日出黎架。」雖然工作好忙,但周未我仍然希望可以放下假。 所以選擇平日加班。

「咁好啦……」Connie見我星期六日可以同佢出街就開心返:「錫錫先收線。」

我望一望周圍,附近同事都走光了,我就大住膽:「唔~~卜~~」

「好啦~~ 你收工話我知啊。」 Connie好似小朋友咁收左線。

Connie其實真係好小朋友性格,可能仲係讀梗書既關係。 就係因為佢小朋友,令我好有衝動想照顧佢。

「咳… 唔好意思啊….你叫家明係唔係啊?」

「Hi…你好啊 Kristy….」 Kristy原來仲未走人,死火佢好似聽到我岩岩同Connie傾電話….:「你岩岩返工第二日就要加班咁勤力….?」

「好多野唔明要睇返D file,想快D可以做好成績出黎啊。」Kristy微笑回應我,佢既笑容非常甜。見到佢一舉手一投足我個心跳得好快。

「家明… 唔好亂諗野。 」我自己同自己講。

「你好多野做?」Kristy問。

「係啊,準備下個月展覽會既事,我都係入左公司半年,好多野都唔識做所以要加班。 哈~~~ 」我企起身申一申腰順便打算去飲杯水時發現Kristy 都拎住隻杯:「去斟水?」

Krosty點點頭:「係啊~ 一齊去?」

一場同事去斟水只係平常時,順便當係聯誼一下。

「你都係fresh grad?」我問kristy

「係啊。不過我係美國讀完書留係果面做左陣野先返香港,所以遲左半年先返香港搵工。」Kristy行起上黎非常優雅,聽到佢係美國讀書可以聯想到佢一定係非富則貴既家庭長大。

「打算幾點走?」我唔係太識打開話題既人就是但講下野。

「我隨時都可以走,屋企今晚冇人咪諗住留多陣係公司先走。 你呢?」Kristy輕輕用手將頭髮撓到耳背後摀前身係水機斟水。

其實Kristy曲髮雖然有點成熟,但望真一點會發現佢其實好可愛。Kristy為手中既hello kitty水杯斟滿口後放到嘴中,嘴唇輕輕一開將水杯邊緣包含著,一下一下將杯中清水吞下。

一時間我將目光放到Kristy之上。 佢真係好可愛好靚。

「下?」

「??」

「你冇咁快走人?」Kristy已經飲完水望住我。

「啊… 係,仲要回個designer攤位設計同尺寸先可以走人。」岩岩太失禮,我立即去斟水回避一下。

「好啦~ 你努力啊。」 Kristy微笑對住我:「我都返去做多陣野先。」

Kirsty返去佢自己個位工作,我亦行返去自己位工作。

過左一個鐘,終於Confirm左個攤位設計,同自己阿Head Sam哥匯報完進度就走。 離開時望一望時間,原來已經8點鐘:「阿媽,岩岩收工,我自己食完飯先返黎啦。」

「喂~ 收工啊?」

係Kristy,佢遲我一步行出公司。

「係啊,終於可以收工,你都做完野?」

「期間冇咩做,都係睇下文件,不過睇到好 支力 要走啦。」Kristy用既手袋係名牌子袋,雖然我冇留意名牌,但佢用果個G字頭名牌係我依一個毒男都識既牌子。

「….」 等Lift其間我知講咩好。

「岩岩聽到你話食完飯先返屋企,你約左人?」Kristy似乎係好容易溝通同鐘意講野既人。

「冇啊。 打算係附近食少少野就走。」

「附近有咩好食啊? 我唔知依度有咩好食。我知道日月星街果面有好多餐廳。」Kristy只係識日月星街度食!? 果然係有錢人。

「下!? 日月星街果D好貴啊。 我地人工咁低,一個月食一兩次就可以。 平日都係食我都係附近茶餐廳食就算,如果要好食就行遠少少去灣仔果面。」我地公司係PP3期附近。

「哦~~咁你依家打算食咩? 如果唔介意不如一齊? 我都未食野又唔想一個人食。」 Kristy主動約我食晚飯。

「好。」 其實我冇可能話唔好,女仔主動約自己。 但口快快應承左之後就立即後悔。 【死,岩岩仲應承Connie收工要打比佢。】

「我地食前面間茶餐廳啦~」我打算快快手食完就走,之後立即打比Connie。

「好,冇問題!」 Krisry唔介意同我去食一間勁up dup既茶餐廳。
2020-06-09 17:35:47
【從毒撚變成浪子 – 陪我走過的一些女性們】

【第二章】

同Kristy食食都幾多野講,當然係佢主動講好多野。

餐飯我了解左佢唔少。Kristy係香港讀完中六就去左美國讀4年書,鐘意Hello Kitty。 平日鐘意睇電影同去cafe坐下睇書。令我出奇既係佢竟然有車牌,睇唔出佢外表咁可愛小鳥依人竟然會考車牌。

佢同我誚考車牌係因為自己媽咪睇死佢考唔到,所以佢就要考到比佢媽咪睇。 原來骨子裹佢係一個咁好勝既人。

係食飯其間Connie打比我。

SHIT! 我好心荒! Connie真係食飯期間打比我… 我應唔應該聽呢? 電話不停震動。

「你聽電話啦。」雖然係震動mode但Kristy仍然察覺到有電話打比我。

「唔… 女朋友?」

「唔係。」我唔知道自己做咩事要講大話…我亦唔知道自己點解唔可能大大方方係Kristy面前聽電話。 「 應該係廣告電話黎,可以唔聽。」我將電話放返入褲袋。

「岩岩係公司聽到你好似同女朋友傾電話,好似好開心咁。」原來Kristy真係聽到我錫個電話。

「係啊,拍左幾年拖。」 我冇問佢有冇拍拖,反正自己有女朋友就唔好理人咁多。 正好Kristy知道我有女朋友就可以同自己講要乖乖地好好對Connie,唔可以做一D行差踏錯既事。

「你住邊架?」Kristy問。

「我住長沙灣。 你呢?」

「我住黃泥涌峽道。」

WTF…灣仔半山!!! 佢真係一個有錢人黎,不過佢算係冇架子果一種有錢人。

「你坐的士返屋企?」 有錢冇自己揸車都應該的士車入吧?

「我坐巴士啊。 啊有車~~ 我走先啦Byebye~~」Kristy 又一次令我跌眼鏡,佢原來識坐巴士仲會用八達通。

目送Kristy上車後,我立即打返比Connie:「喂BB~ 我岩岩收工啊。」

「岩岩做咩事唔聽我電話啊???」 Connie問起我做咩事唔接佢電話。

「Sorry啊,岩岩同Sam哥交代一下工作進度聽唔到電話,我一走就立即打比你架啦。」講大話係唔岩,但我唔可以講真話。

雖然呃左Connie,但我又真係冇做一D對佢唔住既事,就將今晚同Kristy一齊食飯既事收係心中。

「我岩岩係公司食左杯麵啦。」「夠飽啦?」「OK啦,太夜唔食咁多野,一陣變肥豬你唔要我點算!?」

同Connie相處日常就係傾電話講情情塔塔既野。 只有唔係有家人朋友或同事係身邊,我可以同Connie講好多肉麻野去令佢開心。

我知道自己畢業工作後係有好多改變,亦因為咁我會好想令Connie可以有多一D安全感。 所以我唔介意花好多時間去同佢傾電話,幾夜都會傾。

「BB,我知道我依排少左時間陪你,但你等我啦,我想比心機D做好份工升職可以照顧你。」

「嘻~~ 傻佬。 我知道你好好啦。不過你都要注意身體啊~ 豬豬我怕你做野辛苦會病啊。」 Connie就好似一個小朋友咁,比我TUM 下就會好開心。

從父母既關係中,我知道女性係好想要安全感,要好多時間去陪佢地。

「BB你星期六想去邊?」 我問Connie想同我去邊過。

「唔。。。。 我地好耐冇咩咩啦~~~」Connie同我作出性明示。

「咁星期六去你宿舍?」心中暗喜,我忍左差唔多一個月都有,終於可以發洩一下。
2020-06-09 19:04:42
Hello響巴
2020-06-09 22:10:05
無音
2020-06-10 00:14:23
btw你真係響巴?啲文無錯字嘅?
2020-06-10 11:17:14
【從毒撚變成浪子 – 陪我走過的一些女性們】

【第三章】- 【分歧】

星期六 我電話響起,係Connie打比我。

「喂…BB….早晨!」我望一望鐘,11點未夠。

「出黎啦,我地一齊食Lunch!」

「尋晚做到好夜,我想訓多陣啊…..」係床上伸一伸懶腰。

「下…唔好啦。今日要見你耐D啊,快D啊。 比一個鐘你換衫過黎。

「係係……知道」我收線後立即換衫,好彩Connie係Poly讀,長沙灣過去唔洗好耐時間。

同Connie去左尖沙咀食好時。 好時沙嗲係我地兩個好鐘意食既一間餐廳,之前我仲係poly時就成日同Connie黎食。 係我同佢充滿回憶既其中一間餐廳。

食完我地行左一陣尖咀之後就去左超市買日用品後再上去宿舍咩咩~

今個星期六日Connie既 roommate唔留係度,所以我可以係度屈蛇,過一個二人世界既周未。

我地雙方既第一次都比左對方。

Connie腰圍27吋,係一個有小小肥既女仔,相對地佢上圍亦好大,可能有C至D左右。 而且佢係一個幾主動既女仔。 我地兩人歡好時,佢好多時會係上面攸主動。

「好 支力…」已經做左兩次愛。 由於係女生宿舍,男性唔可以過夜,所以我只可以留係房內食杯麵。 傾計我亦要壓低聲音。

其實一切都好似好偷雞咁。 所以我好想可以賺多D錢可以租個地方住,咁同Connie一齊就可以好好Enjoy一下二人世界。

「係呢,今年Summer你會搵咩做?」 係床上問準備升year 2既Connie。

「入你公司做啊~ 你公司好似請intern。」

諗起如果同Connie要日日係公司一齊做野好似幾好:「我都好想,不過我聽同事講intern留晒比D大老闆朋友既仔女做,一般人應該唔請架。 不過你試下都冇壞。」

「下…咁啊… 一係我入姐夫度做啦。佢話請人。」

「你姐夫? 做保險架WOR!!?」

「係啊豬豬,佢話請part time入佢條team啊,問我會唔會有興趣。」

「下…我唔係太想你做保險! 好似狗咁要人買野,一陣你冇晒D朋友就死。」其實我係幻想到有D賤人會叫Connie簽床單。

「痴線啦點會。 我仲叫左幾個同學一齊入啊,一齊做點會冇朋友!? 」

「唉,總之唔好做啦。 搵其他工做。」

「咁你公司又唔入得去做… 」Connie一面抱怨咁去將自己加入保險業合理化。

「咁你識幾多人啊? 身邊個個都係同學邊有錢去買保險? 你入去做咪棧變到冇晒朋友!」

「你唔打算幫我買架?」Connie想法就係咁天真,諗住搵身邊既人去幫佢買。

「我唔會買。」為左令佢放棄做保險,我唯有狠心喧拒絕Connie::「第一我唔想你做,第二我唔信保險!」

「點可以唔買保險? 姐夫話你一定會幫我買,你唔係真係唔買下??」Connie信晒佢姐夫。

「你姐夫想呃你入去做,佢要交新人入Team就梗係同你講好易做,第一步搵身邊晒人做啦。 你咁都信?」我開始有少少火,越講越大聲。

「點會呃人? 我姐夫做左咁多年,公司又有人工出比佢架。 你買左保險如果有事又會賠錢比你,咁又點會係呃你啊? 你咪咁老土啦! 成日都聽你阿媽講…」

「你講咩啊? 我話過最憎人話我阿媽……」我嬲到成個人彈起身:「你夠贍再講。」

「….」

「總之我唔比你去做保險!!」我再次提高聲線。

「總之我一定會去做。」

「你係都要同我鬥氣下話?」我知道Connie係為道氣而同我嘈。

「係。 我係要做,你唔好理我。 我就要到成績比你睇!!! 你係唔鐘意咪分手囉。」Connie撓起雙手走去書台果面坐低。

「…..」 佢係想我去TUM佢,但佢話我阿媽又要死都去做保險我真係好唔想去TUM佢。

依個時間一把聲係門外傳入:「同學… 宿舍唔準異性過夜架,麻煩你快D離開!」

我一時間忘記左自己係屈蛇,太大聲而比舍監發現! 但正好比我可以離開。 我打算唔理佢幾日,通常佢會搵返我。

「哼! 走啦走啦。」 Connie要拎返個尾彩。

「….」我冇出聲,好大力咁將度門關上。
2020-06-10 17:03:49
【從毒撚變成浪子 – 陪我走過的一些女性們】

【第四章】- 【家人】

星期日,我係屋企冇出去。

「明仔今日唔洗出去拍拖咩?」媽問。

「係啊,今日唔洗去啊。」我係床上睇返舊漫畫jojo奇妙冒險:「返工好 支力 休息一下。」

「咁陪阿媽去超市買下野啦。」阿媽最鐘意就係去超市買日用品。

「哦! 去百佳啦,唔好去惠康同華潤。」唔知點解從細就覺得惠康同華潤一D點唔好行,百佳地方總係大少少好行好多。

我就 同阿媽兩個去超市,邊行邊傾計。

「返工做左大半年啦,辛唔辛苦?」

「OK啦。 算係上左手,D同事都幾好人。」

「你間大公司黎,做得好就得啦。 辛苦D都要留係度做。」阿媽知道我做我幾好似乎好安心。

老人家見到自己小朋友讀完書搵到一份正經既工作就會安心。 正經既工作唔包括保險! 阿媽覺得保險係呃呃氹氹咁去搵水魚,亦覺得好多時保險公司賠錢後又會加保費好搵笨。

「你同Connie點啊? 」

「幾好啊!」 阿媽突然咁問,我唔通會答佢岩岩尋日嘈完黎咩。

「放工放假就多D叫Connie上黎食飯啦。」阿媽其實幾鐘意Connie,佢認為Connie同我地背景相近又係大學生。「佢係乖女黎架,要好好對人。」

我聽得出阿媽既意思係認為Connie係一個好女仔,希望我同佢結婚。

「得啦阿媽,我知道架啦。 不過依家努力搵錢先啦。」

我見到阿媽偷偷笑。

見到阿媽好似好期待我快D同Connie一齊結婚,我就諗係唔係應該搵返Connie。

-------------------------------

「啊… 好 支力 啊…」家姐同準姐夫行完婚展返黎。

「HI Auntie~ HI家明~ 」準姐夫拎住幾大袋婚展既勝利品返黎我地屋企。

「雄仔你好啊,BOOK左酒席未啊?」阿媽問。

「未Book不過有幾間酒樓同酒店我地都好鐘意,想問下你地意見先。」準姐夫雄仔好有禮貌地將幾張傳單交比阿媽睇。

「媽,酒樓有富臨同美心啊,酒店就搵左旺角朗豪坊。」家姐坐係梳化上死死下咁同阿媽講。

「借黎睇下~」我拎左美心傳單睇下個價錢立即嚇死,擺個酒要近一萬一圍,仲要只係垃圾美心。

「嘩…富臨都幾唔抵,低過美心幾皮但個價都唔平。」阿媽答。

「Auntie 咁可以考慮一下酒店啊。 朗豪坊係旺角好方便。」

「酒店D野好唔好食架? 朗豪坊果幾條街好似好雜。」阿媽意思係果附近好多企街,佢一直都好唔鐘意果一D女人。

我見到雄仔同家姐面色一沉,相信佢地搵酒席真係搵得好辛苦。

「其實我地就唔多親戚既,是但擺一兩圍比我D親戚已經夠啦,阿女你D朋友同事都應該係兩三圍左右姐?」估唔到阿媽原來唔係覺得果幾間太CHEAP而係認為細搞就算:「其實細細地搞就OK。」

「咁啊… 不如去半島酒店擺啦Auntie,我問過人果度有個廳可以擺10圍左右,其實個budget 都係我預算之內。」

「係啊~ 如果媽咪你地冇問題不如去半島啦,唔洗2萬一圍,但又夠卡屎唔會比親戚睇少。」

「都好啊~ 係半島擺啦。」阿爸岩岩返屋企聽到我地既對話。

「如果你阿爸都OK而你地又鐘意咁我都唔反對既。」阿媽都同意去半島搞。

---------------

「阿爸~」係我阿爸就係當年係大陸包二奶果一個,阿媽最後心軟接受返阿爸。 不過阿媽心入面仲係有條刺。

「家明,同女朋友點啊?」阿爸係廚房度食煙。

「幾好啊。」係雪櫃拎支可樂黎飲。

「今日唔去同人拍拖既?」

唔通我真係咁易比人睇得出同Connie有事?

「係啊,返工好忙想休息一下姐,佢都就快要考試咪溫下書囉。」

「Connie係個好女仔,唔好花心好好地對人啊…」一個背住自己老婆玩女人既人叫自己唔好花心…?

「痴咩線啊你。 你個仔我不知幾乖。」

「唔… 早幾日揸的士經過你公司附近見你同個女仔一齊食飯啊….」阿爸原來見到我同Kristy食飯。

「同事黎架,咪亂諗啦你。」好彩係比自己阿爸見到而唔係比Connie見到,如果唔係我諗佢一定會亂諗野。

「唔… 總之你就好好地做人啦。」阿爸食完煙走左出去。

其實我一直好想知道點解阿爸當年會有第二個,更加唔知點解阿媽會原諒佢。

------------

「家姐,結婚係唔係洗好多?」見到擺酒個價錢我真係感覺好大壓力。

「又唔係真係好多洗費,好多野都係雄仔比。 做咩啊咁快諗定同Connie結婚?」家姐偷偷笑住問我。

「又唔係咁快,不過見你結婚好似洗好多,想有個心理準備姐。」

「諗定都好,你地儲幾年錢都差唔多。 不過你最好就預一筆錢買樓或者租樓啦,女仔都唔會想同奶奶住。」家姐同我坐係梳化傾計。

「唔… 買樓好貴啊,依家D樓係咁升。」

「阿雄話有排升,因為利息平。 你想就快D買啦。」家姐係2010年買左樓花,下年2012年就可以入伙。

「我買鬼咩,岩岩先出黎做野那有錢?」

「唔… 咁你真係要比心機啦,冇樓真係可能會比你未來外母睇小。」

「唔會下….」 我諗起Connie既媽咪好似對我幾好,應該唔會咁勢利。
2020-06-11 05:48:18
盧宛茵.jpg
2020-06-11 10:16:39
【從毒撚變成浪子 – 陪我走過的一些女性們】

【第五章】- 【分手】

星期一,我都係冇搵Connie,佢都冇搵我。 今次我好堅持,因為我唔希望佢會做保險。

「家明,開會。」Sam哥叫左我地team同Sales幾個同事一齊開會。

主要係傾下展覽既攤位事項。

Kristy都係其中一個參與既同事,佢都會去展覽會一齊做野。 另外仲有我同期做Sales既Dave。

開會時佢同Kristy一齊坐,睇黎係安排左Dave教Kristy野,明眼人睇得出Dave對Kristy搭晒糖。 同時Sales另一個senior少少既阿傑都對Kristy虎視眈眈。

「喂家明,一陣一齊食lunch好唔好啊?阿傑問我:「同Kristy仲有Dave一齊。」

「冇問題~」同下佢地食飯聯誼一下都係好事。

開完會我睇下電話,Connie都係冇搵我。 一個msg都冇。

當下我有少少心軟,係唔係應該打比佢say sorry呢? 但如果係咁,等於同Connie講我認輸。

「喂,食野啦。」 Dave同Kristy一齊行出黎:「佢叫家明啊。」Dave介紹我比Kristy識。

「啊~ 我記得,岩岩一齊開會既,你好~」Kristy對我微笑。

佢真係好靚女好可愛:「HI 你好啊,我係家明。呀…掛住做野都冇留意時間,原來已經食得飯。」見Kristy扮到好似岩岩識我一樣,我就配合一下。

-------------------------

我地4個人去左日月星街食貴野… 唔知係邊個既主意。

「你地平時多數黎依度食架?」係餐廳內Kristy問。

「一時一時啦,我會帶飯多,你呢? 你會唔會帶飯?」對住Kristy,Dave表現得好熱情。

「我都會帶啊,好熱有時唔想行太遠。 你地呢多唔多帶飯?」Kristy問住對面既阿傑同斜對面既我。

「我一時時啦,自己一個住冇食煮,有時返阿媽度就會拎飯。」阿傑已經諗好食咩。

對住個餐牌我有少少選擇困難,樣樣都一百蚊起跳,食個lunch姐….「我都係一時時,放lunch唔想留係公司,鐘意出黎食。」

「哈哈~ 家明好幸福架,女朋友間中會黎搵佢食lunch。」Dave驚死我會追Kristy咁。

「噢~~ 你女朋友係附近返工架?」Kristy都似乎諗好食咩。

「啊… 唔係啊,佢讀梗書….」我諗唔到食咩好,最平果個餐係冇肉既,想食牛肉但又好貴…

「Kristy有idea未? 諗完不如叫啦~」阿傑好似好照顧Kristy咁。

佢地唔理我諗好未… 心入面爆左粗。

「Kristy食咩啊?幫你叫啊。」Dave見阿傑有攻勢就立即向Kristy大獻慇懃。

「啊… 好啊…想食魚。」Kristy有少少唔好意思地笑左下,之後叫Dave幫手叫餐。

「下~ 你都鐘意食魚架? 唔該兩份魚啊~」其實阿Dave真係做到好出面:「Kristy要白湯定紅湯啊?」

我諗到啦,食個有肉又最平既豬啦…..「Dave…我想食豬啊….」我見Dave咁幫手,咪叫Dave幫手。

「OK! 一份豬…」 似乎係得Waiter一個留意到我想食豬…

唔係… 係Krristy都聽到,我見到佢望左我一眼之後偷笑左下。

飯局好熱鬧,Dave同阿傑兩人主導左餐飯,Kristy就係咁比人問鐘意食咩同有咩興趣等等。 我就間中先答到一兩句,主力都係聽同食飯。

依餐咁貴,我真係要好好咁品嚐一下。 懶理佢地兩條狼狗。

------------------------

【喂~ 岩岩係唔係好悶?】 Kristy email我。

【下? 唔悶啊。 你好悶?】

唔洗好耐佢又回我【唔係,佢地好多野講。不過見你餐飯冇咩出聲又係咁睇電話,唔知係唔係你好悶。】

唔知點解我對住一班同事係比較少D野食,但如果單對單係會比較好。 我答Kristy【佢地兩個係比較嘈一D! 哈… 我唔悶啊,聽你地講野都好開心。】

過左10分鐘左右【OK!! 今晚又要加班?】

【可能要OT一陣,你唔洗OT?】

又過左10分鐘左右【應該唔洗。 係啊,我地交換MSN啊,好似用電公司email傾唔係咁好。】

之後我地交換左MSN,就冇用email傾啦。

---------------------------------

Connie都係冇搵我,OT左一陣既我邊行去地鐵邊諗應唔應該打比佢。

唉… 都係唔打啦。 我唔應該太過放任佢。 之後我約左中學朋友阿文同華少出黎打邊爐同佢地傾下Connie既事。

「唉,唔好比佢做保險! 一家要簽床單架。 你比我買保險都搵條靚女買啦,唔比著數我點解要買?」阿文口賤賤咁講。

「屌~ 你買保險條AGENT真係比你搞架? 買好大???」華少冷冷一句:「你咪最多買幾十萬,一個月供一千幾百蚊。 家明唔洗咁擔心。」

「…. 咁又係…」 聽到華少咁講又好似個心定左DD。

華少見我放心左立即加一句:「不過香港地好多有錢佬~~」

「而D有錢佬都多數咸濕~~~哈~~」阿文立即補充!!

「哈…哈…..」兩條仆街你一言我一語不停自HIGH,完全冇理我感受。

----------------------------

食後,我認輸啦做左衰仔打比Connie先。

「喂… BB… 點啊? 有冇嬲我啊仲?」我打算扮下傻仔先。

「嬲? 冇嬲Connie話冇嬲,但明顯仲係嬲梗。

「唔好嬲啦…. BB…」

「點解你唔明我? 你知唔知我嬲咩?」Connie鉖於肯認佢嬲我!

「我知我唔應該咁惡話你啊…對唔住BB!」

「你仲係唔明! 點解我要做保險你唔比?」

「咁我唔想你做係因為唔想你冇晒朋友嘛。」

「係咩!? 你係咁諗咩? 唔好呃我啦。 你係唔信我,唔信我可以做到。」Connie覺得我唔信佢?

「咩唔信你啊? 我冇話你做唔到…」

「你話我會冇晒朋友嘛,咪即係覺得我冇能力囉!!! 」

我不得不將我內心想法講出黎:「我係怕你會比人呃,怕你D客氹你上床先簽單啊….」我希望比Connie知道我真正諗法,從而打消做保險念頭。

「邱家明你原來係咁睇我既!? 你覺得我係D咁既女人,我係會出賣身體既人咩? 你係唔係話我做雞啊!!」死火,我又唔知咩事佢會聯想到我話佢做雞….

「我邊係咁意思姐… 我係怕你會蝕底比人啊… 依個世界唔係咁簡單架。」

「有幾複雜啊?邱家明! 定係你自己係咁諗野既人呀?」Connie以質問既語氣去問我。

「痴線啦…我點會係咁諗啊。 你咁睇我架咩? BB唔好嬲我啦….豬豬錯啦…」為左唔好同佢硬碰硬,我扮晒傻仔認錯。

「你去死啦仆街邱志明! 我話比你聽我一定去做保險架啦,聽日就去報名考保險試。 我就要比你睇我可以做到生意。」Connie一直都係一個比較硬頸既人,但我冇諗到佢會咁堅持做保險去證明自己有能力。

「唔得,你唔可以去做啊。」我好惡咁講。

「你唔比我做咁分手啦。」Connie cut左我線。

收線後我好嬲,佢明知我唔鐘意都要去做,有冇尊重過我啊?
2020-06-11 10:47:48
唔知點解我對住一班同事係比較少D野

因為同事搶男主啲野食?
2020-06-11 17:19:35
終於打錯字

食>講
2020-06-12 17:05:29
【從毒撚變成浪子 – 陪我走過的一些女性們】

【第六章】- 【突然的再次晚餐】

無想過我會同Connie就咁分手。 我唔係無諗過去道歉,但我真係唔想佢做保險,如果我去道歉佢就更加放肆去做保險。

又或者,我應該由佢去做,但佢撞下板先,到佢做唔到生意就會知道自己錯,之後返黎認錯,咁我就係一個勝利者啦。

收線後我想通左。

-------

「喂,唔見你sms你女朋友既? 依排唔見佢搵你食Lunch。」Zoe問我。

佢真係好八卦:「佢考試要溫書啊。」

「咁今日一唔一齊食Lunch?」Zoe問。

「我同你?」

「唔想?」

「唔係,問下姐。」我望住電腦,其實個腦係放空梗,心入面不停想Connie快D搵返我。

-----------------------

「食咩啊?」坐lift時我問Zoe。

「不如去食拉麵。」Zoe提議。

又食貴野… 「好啊。」

同Zoe離開公司就會傾下無聊野例如去邊玩/有咩好地方去等等。

「我同男朋友去左PMQ,幾得意,可以同你女朋友去玩下。」

「PMQ係咩黎。」我好少留意拍拖可以去邊玩同食野,或者可以話我係一個幾悶同冇主見既人。

「下! 咁HIT你都唔知,FB好多人講。 你睇下啦。」Zoe拎左佢部iphone4出黎比我睇。

「哦…幾靚啊。」其實我唔想話題放係拍拖之上,加上我比較在意佢部電話,smart phone岩岩興起,我考慮係唔係應該轉用:「你部電話貴唔貴?好似可以上網好方便。」

「又唔貴,百幾蚊月費可以隨時上網真係好方便! 你同女朋友一齊出啦,情侶機幾好。 我都係同男朋友一齊出架。」 Zoe同佢男朋友好似好好。

「啊…考慮一下先。 嘩~ 有野食正~ 唔客氣啦。」想不到話題又被拉到女朋友之上,都係快快轉變話題。

------------------------

「細佬,依排唔見你同Connie傾電話既? 分左手啊?」家姐留意到我成日留係屋企又冇同Connie傾計。

「唔係。 佢考試好忙啊。」唔知點解我唔係好想比人知道我分左手,或者係我覺得自己仲有可能同返Connie一齊,佢只係同我鬥下氣姐。

「係WOR! 考梗試,咁你比下鼓勵人啦。

「好。」睇住onepiece既我答。

-----------------------

又過左幾日,我頂唔順打比Connie,不過佢冇聽我電話,亦冇打返比我。其實我諗佢係想做左保險等有成績後先會搵返我,Connie係一個唔輸得既人我好了解。

聽日就係星期六,唔同Connie出街我真係唔知可以一個人做咩。

不如買飛睇戲啦,一個人去戲院睇下戲可以hea一兩個鐘時間。

係公司OT時間下望梗睇咩戲好,其實冇咩所謂,時間長少少就可以。 因為睇完戲我仲要諗之後去邊hea好,我唔想早返到屋企家人又問長問短。

「家明,睇戲啊?」係Kristy,佢唔知幾時黎左我個位後面。

「係啊。 諗住睇戲。」

「你1個人去睇?」佢應該係見到我訂一張飛。

「係啊。」

「唔同女朋友去睇既?」

「係啊。 佢唔得閒。」

「唔…一個人睇好悶咁。 我唔會一個人入戲院睇。」Kristy續:「你收工未啊? 不如一齊食晚飯。」

我睇一睇時間,差唔多8點,又做完野,不如就同Kristy食野啦,反正星期五我好多時會同Connie食野行一陣先返。 如果依家唔同Kristy食野,我會係公司留多一個鐘左右先去食野再返屋企: 「都好,你走得啦?」

Kristy好似一個小朋友咁笑得好天真:「走得啦~」

就係咁我又同Kristy一齊食晚飯,不過今次我心情好安靜,因為唔洗怕Connie又會食食下飯打比我。
2020-06-13 22:18:01
Pish!
2020-06-15 09:27:05
響巴加油!
2020-06-15 17:06:41
【從毒撚變成浪子 – 陪我走過的一些女性們】

【第七章】- 【心動】

同Kristy慢步皇后大道東。

皇后大道東係一條好特別既街道。馬路近山邊一旁以商廈為主商鋪多為家具鋪,另一邊近電車路方向一方以舊樓為主地面為不同既小商店食店。

我地由金鐘往銅鑼灣方向慢步,在山邊商廈一家家中式木製家俱地鋪。

「你鐘意睇傢私?」Kristy問。

「係啊。係唔係好怪?」

「唔係啊。 我都好鐘意睇,特別係中式木傢私,我好鐘意行依面睇野。」估唔到Kristy都會鐘意睇。

「咁你屋企係唔係好中式?」想起Kristy住係灣仔半山,就會自動聯想到佢屋企會有幾豪華。

「哈…又唔係。 我媽咪唔鐘意中式裝飾,你呢?」

「我屋企好簡單既西式裝潢,都係宜家家私買果D啦。不過如果可以,我都想會有一張木製中式梳化放係廳。 西式梳化太軟,坐耐左會冇左彈力。」

Kristy聽到後好有共嗚:「係啊係啊! 好唔好坐… 啊…不過,如果你只買一張中式梳化放係廳咪好格格不入!?」

Kristy份人好可愛好健談,真係完全猜架子。 但你不難係佢行為舉止之中察看出佢富裕人家既氣質。

「你會唔會覺得好怪,依度有間廟。」我地經過皇后大道東山邊一間古廟。

「怪? 唔怪,附近咁多人住,多人要拜神有廟唔奇。」

Kristy邊行邊望住廟宇,像一個小女孩對所有事物都充滿好奇的:「但間廟就夾係兩間大廈之間,好似好迫咁。」

我突然想起一個傳說,講出黎嚇下佢:「唔…可能係好多年前傳說有個郵差夜麻麻去派信,之後收到信果家人就會有人死去,所以有人起依間廟出黎啦….」

Kristy立即雙手掩耳:「啊~ 唔好講啊!! 我驚啊。」

「哈….」冇諗過佢會咁怕:「我唔知道你咁驚SORRY! 不過係傳說黎姐。」

「…家明…你信唔信依個世界上有鬼架?」突然Kristy企係一旁面向牆壁背向我問。

「下。。。。。。 都信會有既,不過人不犯我我不犯人,應該唔會有野搞我。。。」突然Kristy咁問,我又真係有少少驚驚地。

「嗚…」Kristy依舊企係度冇望我,發出陣陣低嗚聲。

近8點鐘,皇后大道東經已好少行人,月色映照下不禁令我有點心寒。「喂….你…冇事下話?」

「嘩~」突然Kristy急回頭對我做一個鬼臉,我被嚇到跳左一下。

「哈…..哈….傻佬! 你想嚇我,仲唔整蠱返你~」Kristy大笑。

「嚇到我心都跳出黎啊。」我真係驚左一下。

「哈。。。 白痴仔~~ 咁都怕。。。嘻!! 你扮汪阿姐咩!? 哈。。。。」Kristy輕快地向前跳步行:「行快D啦,好肚餓啦~~」
2020-06-16 17:43:03
【從毒撚變成浪子 – 陪我走過的一些女性們】

【第八章】- 【和你第一次回家】

最後Kristy同我行到去藍屋附近食野,依個區域又係好特別,本身係一個好舊既小小唐樓群,位處皇后大道既一條掘地橫街之內,地鋪主要係車房。 但近年政府發展舊區保育,藍屋依區又多左人租地鋪發展餐飲。

「依度又幾好,好清靜又唔迫。」係一間情調唔錯好岩傾計既餐廳。

「係啊。 我都係openrice見到。」Kristy出左iphone上網好方便。

我地話題由smartphone開始,最後我決定都出一部,因為太方便又可以坐車時上FB睇下野,我可以多D時間睇Connie發生咩事。

「你係美國讀書時自己住定係宿舍?」食物剛送到台來。

「我係出面租屋架。」

「有親戚係果面?」

「冇架! 當時租屋返學都係自己搞掂。」Kristy既野食都到左:「我唔客氣啦~」

「哦~ 咁你都好獨立下。」意想不到Kirsty原來係咁利害,一個咁可愛又小鳥依人既女生可以咁獨立既人。

——————————————

Kristy同我傾左好多話題,上至家居佈置下至日常飲食,餐飯我食得好愉快,我感到佢都有同感。 食左近個半鐘頭時間,餐廳人客陸陸續續離開,我地亦要離開了。

行出鋪外,Kristy同我對望一眼,突然我有不捨得,不捨得剛才輕鬆而快樂既情境。

「你要返屋企啦…」我唔知道Kristy會唔會聽得出我有點失望。

「….都差唔多,夜啦…」Kristy用佢一雙水汪汪既大眼望住我講。

「咁行返落去啦…」我先起步前行,我怕同佢對望會愛上佢。

「唔…」

一時間氣氛變得有點尷尬,我胡亂的搵下話題講下:「你係邊坐車?」

「係對面有一個巴士站,後一個站就係轉彎果面。」Kristy指住對面比較遠少少既一個巴士站。

「咁我地去果面啦。」我行向後一個比較上遠一點既車站,我想同佢見耐一D。

同Connie冇聯絡幾日,好似我有D習慣佢唔係我身邊,雖然我仲好掛住佢。 但今日同Kristy食飯,我有心動既感覺。

行到車站後我對佢講:「我陪你等車啦,咁夜危險。」

「好啊~」Kristy知道我會陪佢等車,佢好似好開心。

「一陣你架車會上山?」我見到轉彎上司徒拔道既路。

「係啊~ 一陣會行山路上去。」Kristy雙手放背後,輕輕搖曳右腳。

「行幾耐架?」

「唔~大約20分鐘左右啦。」

「咁都好近啊…如果行上去要幾耐?」我只係隨口搵野講下。

Kristy側一側頭想了一下:「行上去可能….大約30分鐘左右」

「噢~ 咁都好快啊。你有冇行過?」突然我係度諗自己好耐冇行山1。

「未啊。 你要唔要….行?」Kristy竟然會咁講。

「好啊。 但你怕唔怕會支力?」我冇諗到佢會題出一齊行,而我又諗都冇諗就應承佢。

晚間既山路唔算太熱,沿著窄窄的水泥山路我兩沿著行人路徒步行上司徒拔道。

「哈。。。你又會咁搞笑陪我行上山既?」Kristy係我前面。

「啊。。。食完飯又冇野做,當散步都幾好啊。」我笑著答。

「但係你今日咁得閒既?」Kristy將手放在背後合上問我。
2020-06-16 20:10:37
係文呀!
2020-06-17 06:42:34
響巴加油
2020-06-17 15:48:43
【從毒撚變成浪子 – 陪我走過的一些女性們】

【第九章】- 【或許應該考慮她】

從灣仔山腳步行上山,黃泥涌道總共我地行左大半個鐘。

沿路我地一直有傾有講,延續剛才食飯既話題,溫馨既感覺亦得意延續。

「唔…其實我同佢分左手。」我同Kristy講出我分左手既事實,佢係第一個知道我分左手既人(唔計我兩個豬朋狗友)。

有時候人就係會同一D同自己未有好多關聯既人特別老實。Kristy對我黎講,可能係一個樹洞,會想將心事同佢講,希望自己心情可以有一點開懷。而同一個唔相熟既人講出心事,往往會加速兩人之間既關係。

「唔…唔怪之得你依幾日好似有少少唔同。」Kristy一副為我傷感既樣子:「你仲好掛住佢?」

「啊…又唔係。同你講左我心情好左好多開心返啦。」

「我到啦,多謝你送我返黎。」到左Kristy屋企,係灣仔半山高尚住宅,露台面向跑馬地。

「唔洗客氣~ …..今晚同你食飯傾左好多野,我個心舒服左好多。」我出於真心的同Kristy講。

Kristy像蜜甜的一笑說:「我都係啊~ ByeBye~」

目送Kristy進入大堂後,我走到路邊望住馬場。

本身我係好掛住Connie,但過左咁多日時間佢都冇理我,同時身邊又有Kristy出現,我真係心動左。

或者同文仔華少兩人所講,Connie都決定左同我分開,已經冇得返轉頭。 倒不如試下放手吧。

Connie唔算我第一個女朋友,當年中學曾經鐘意一個女仔但追唔到,反而有個同班同學鐘意自己,而自己又唔知咩原因會同左佢一齊。但事後又好後悔好似呃左個同班同學而分手。 冇幾耐第一任女友同班同學就比第二個男仔追左。果一刻我又後悔自己點解唔試一試同同班同學一齊呢?

而依家,Kristy係我眼前。 雖然我拍拖經驗唔算多,但我隱隱感覺到自己同Kristy雙方都對對方有少少意思。

我應該試一下。
2020-06-18 17:10:23
【從毒撚變成浪子 – 陪我走過的一些女性們】

【第十章】- 【緣份】

「真心好方便好好用~」同Kristy食完飯後既星期六,我一早出門買左IPHONE黎用。

「有幾啊睇過?」華少同阿文搶左我電話黎研究。

星期六冇女友既日子我只好搵佢兩兄弟出黎吹下水。

「喂條女幾正WOR!」「係BOR! 幾有氣質,咩人黎啊?」

「喂,頂你,亂開我FACEBOOK黎睇架。」我立即從華少手上搶返部電話!

「Kristy係咪你同事啊? Upload左張相WOR」阿文奸奸地偷笑。

「咩啊,咪亂諗野,普通同事黎架。」佢地兩個睇到Kristy放左一張我地上次4個人係日月星街食飯張相。

「普通同事又會開左人個Facebook A/C黎睇既? 呵呵….」華少以一對非常色迷迷既眼睛望住我。

我鬼死咁唔好意思地答:「了解下同事姐…」

「哈…早幾日仲話想同返Connie一齊,點知今日原來已經睇中另一條女。 哈….」「咪係囉~ 大情聖~ 哈…」

「唉… Connie唔聽我電話啊,我可以點?」我帶半點失意地說。

「家明,唔好為一條女放棄成個森林啊。」「咪係,舊女唔去新女唔黎啊。」

「唔知啊… 十劃都未有一點。不如諗下一陣去邊玩啦。」我約左佢兩個出黎食LUNCH,打算直落玩到夜晚先返屋企,都係果個理由唔想家人問長問短知道我失戀。

「我唔得啊,約左女友。」「我都係啊。」

「下… 你地去邊啊? 我一齊去啦,反正冇野做,陪你地去行下街都OK啊。」我同佢兩個講。

「屌你咪撚癲啦。」兩人齊聲。

------------------------

星期六下午,我一個人無聊地行,行到好熱就是但上架巴士漫無目的地遊走HEA時間。

「HI 家明。」

「Hi Kristy 咁岩既!」估唔到會行行下見到Kristy

「你去邊啊?」 Kristy好開句咁問我。

突然見到佢我都好開心同時有點手足無措:「啊… 冇啊。 四圍行下。」估唔到同佢咁有緣份,尋晚一齊食飯今日又見到面。「你呢….你去邊?」

「我岩岩去搵完我表姐食飯,依掛媽咪唔係香港又唔想留係屋企一個人,咪四圍行下。」Kristy舉手投足都非常吸引。

「哦… 」 假日要約表姐,唔通佢冇男朋友?

「你依家有冇野做啊?」

「冇咩事,四圍行下睇下。你之後有冇約人?」我大膽地問。

「冇啊。 我想去PMQ行下啊,果度好似好多野睇好得意,如果你冇野做…」Kristy說著。

「我同你一齊去啊。」我未等佢講完。

Kristy甜笑一下:「好啊~」

就係咁我又同左Kristy行,算係我地第一次既約會吧?

---------------

PMQ內,我地漫步每一個地方每一層樓層。

「哦~ 你都換左IPHONE!!」Kristy見到我部電話。

「係啊…哈…見你用又好似真係好方便咁,岩岩今朝出。」

「唔~ 咁岩啦~」Kristy同我行到PMQ內一間賣精品既鋪:「我想買個電話套用,依度買兩個有discount,我地一齊買啦。 好唔好啊?」

其實係佢問我同時已經好努力地拎起電話套選擇梗:「家明你覺得依個公仔得唔得意? 家係用花花圖案好一D?」

Kristy拎起一個熊本熊套同一個小白花圖案既圖。

「啊….隻熊都幾襯你。」Kristy有幾分少女味,用熊仔幾好。

「但熊本熊有幾隻款,你覺得邊個好一D?」Kristy認真地研究。

「唔…兩個都買晒啦。」我真係唔知邊個好一D。

「下,咁你用咩WOR傻佬… ,你呢,你鐘意用邊個套?」Kristy問我鐘意用邊個套。

「唔…. 其實我唔用都得。」

「唔用? 唔好啦,好危險! 咁貴部機喙落地下花左會好心痛,你一定要用啊。」Kristy說著說著就幫我搵套。

最後我地買左4個套。 2個熊本熊1個花同一個透明套。

「今晚會唔會一齊食飯?」買完套Kristy問我。

「冇啊。 你都冇?」

「冇。 我想打邊爐啊,好耐冇打啦。 不如我地今晚一齊打啦。」見到Kristy越講越興奮,我又邊可能拒絕呢?

「冇問題! 我都鐘意打邊爐,鐘唔鐘意食牛?」一講打邊爐我就會諗起吉野家。

「咩都食~」Kristy好開心回答:「我地去邊食?」
2020-06-18 20:17:21
Pish
2020-06-19 16:23:33
【從毒撚變成浪子 – 陪我走過的一些女性們】

【第十一章】- 【】

「牛肉得啦,我夾比你。」當然我地最後冇去吉野家啦,Kristy搵左間係西環老鋪食豬骨煲。

「啊~ 唔該晒。 你唔係淨係夾比我啦,你自己都冇野食。」Kristy又夾左D肉比我。

我地唔係食放題果種打邊爐,食物質素比較上係好食好多,牛肉入口即溶。由於太好食,所以我地好快已經食完第一輪野。

「你要唔要再叫? 我想再食少少菜。」我留意到Kristy都應該未飽,所以我主動話想再叫野食,等Kristy可以放心去叫其他野食唔會咁比人有一種大食既錯覺。

「你食唔食雞子架? 」估唔到女仔都會食… 我真係好唔鐘意食,落左去個湯度我真係唔想再食。

「食少少啦。」我怕如果我唔食佢會唔叫,唯有期望一陣雞子唔好喧快到。

-----------------

「黎雞子啊~ 你好彩啦,得最後一碟~ 廚房專登比晒你地比平日大碟好多!!!」 伙計同我單一下眼。

頂… 佢一定係以為我同Krsity係情侶,點雞子係為左壯陽…. SHIT!!!

「落雞子先~」我更估唔到既係佢一口氣將所有雞子倒晒落去:「要滾耐D架,我地由得佢係下面,食住其他野先。」

「哦…….」好想嘔,但唔可以! 岩岩先話自己都食,咁理由咁衰仔又同佢講自己其實唔會食。

「係呢…你同女朋友點啊?」Kristy突然問起。

「下? 點? 咪分左手。」

「我見你今日一個人出黎行,係唔係仲好唔開心?」Kristy關切地問我。

Kristy真係好關心人。

「唔… 想自己一個行下散下心咁姐。」事實係我唔想留係屋企,唔想比家人知分左手。

「咁我會唔會阻住你…?」Kristy憂心忡忡咁問。

「傻啦點會WOR!唔會阻我啊。」我大為緊張的,怕Kristy會唔陪我。

「其實尋晚你尋左屋企後咪SEND左msg比我既? 我係想打比你架….」Kristy低下頭含羞地講,右手拎住火鍋不銹鋼長柄火鍋湯勺無目的地轉動湯底。

神推鬼㧬之下我竟然講:「其實…你尋晚返左上屋企後,我都想打比你傾計….」

Kristy聽到我咁講突然面色一紅雙眼微微爭大:「…點解既….?」

「下… 啊…. 我唔知道….」我都唔好意思望住佢講野,雙眼望住個爐。

一時間我地兩個都冇出聲。

先打破沉默既係伙記:「喂黎啦~ 菜黎啦~」

「呃… 唔該」我地齊聲向伙記道謝。

「哈~ 你地兩個真係夾WOR~」伙記偷笑著。

「….」 我同Kristy更加尷尬。

今次我先打破沉默:「我地落菜啦~」

「好啊….」

「啊…不如食完一陣食糖水囉….」我是但搵下話題,就諗起女仔都鐘意食糖水。

「好啊好啊!」Kirsty立即甜甜的笑起來。

我就立即搵open rice附近有咩糖水鋪食,我地邊食邊傾一陣去食咩糖水好。冇再傾岩岩果一個話題。

「…..」

「做咩事?」Kristy問我。

「啊… 冇…」食梗菜時口中突然有一粒口感有少少似肝臟既物體,一股嘔心既感覺衝上來。

「啊…」我連忙吐車口中! 真係雞子…. 真係好嘔心既感覺!! 我一想起雞子係咩就唔想食…. 就算有幾壯陽幾有益都接受唔到。

「啊! 原來你唔食雞子架???? 你做咩唔同我講啊?」Kristy一面擔心一面自責地講:「我地唔叫雞子啦早知。」

「啊…我OK!冇事冇事…. 我唔想你失望嘛…. 」

「傻佬…. 你好搞笑啊…. 」Krisrt笑住我講:「白痴… 自己唔鐘意又唔同我講…」

我似一大啖汽水後:「喧我見你岩岩真係好想食,唔想你冇得食唔開心….」

「唔會啊… 好開心啊我。」

「開心?點解開心啊?」我有少少期待佢會話因為同我食傻所以開心。
2020-06-19 18:33:53
響巴加油
2020-06-20 11:49:23
Pish!
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞