玖蒼
2020-05-23 22:23:03
我攬住阿欣,一直以嚟夢寐以求嘅嘢終於都實現…
但我攬住佢,諗住肥婆,代表啲咩…?
我自己都唔知。
小phillip嘅反應好誠實,但同時亦都提醒咗自己要推開佢,廢事尷尬…
「你…覺得呢?」阿欣問我。
「不如…食飯先…?」
我唔知點樣答佢,所以唯有迴避佢嘅問題。
如果大腦唔使負責思考,咁樣我一早已經有答案…只不過,呢段時間入面同肥婆經歷得太多…種種片段都拉扯緊自己,叫自己唔好衝動。
後尾餐飯係點樣完,食咗啲咩,途中講咗啲咩我已經唔係好清楚,靈魂好似抽離咗出嚟咁,我變到一個機械式嘅自己去同阿欣對答…
明明眼前嘅佢觸手可及,明明眼前嘅佢唾手可得…
但點解…點解我就係伸唔出呢隻手呢?
「陣間陪我散步吖。」就食完飯嗰陣阿欣同我講。
「哦…好呀…」
「你唔開心…?」
「唔係呀,見到你不知幾開心…」我講。
「嗯…」
六月嘅夜晚唔算太熱,我同阿欣喺維園入面,再一次行嗰條唔知已經行過幾多次嘅散步徑。
「係呢,你…嚟緊sem break有無咩打算?」阿欣問我。
「無呀…都係hea住過㗎啦…」
「要唔要一齊去做義工?」阿欣問。
「到時先算…」我講。
「你唔同咗…」阿欣講。
「係咩…?」
「如果係以前嘅你,一定即刻話去…仲會叫我一定要記得叫你…」
「嗯…可能…做到有啲厭掛…」
「你係唔係識咗啲新朋友…?」阿欣問。
「做咩無啦啦咁問…?」
「無…上次喺又一城溜冰…咪撞到你…同個女仔嘅…」阿欣講。
「哦…係呀…做咩無啦啦提起?」
「你同佢好熟㗎…?」
「嗯。」我答。
「識咗好耐㗎?之前唔見你提起佢嘅?」
「唔係呀,都係呢幾個月先識…不過幾啱key。」我講。
「哦…咁…嗯…」阿欣好似欲言又止咁。
然之後我哋就靜咗繼續行…行吓行吓,阿欣突然之間嚟一個急停,再捉住我隻手…
「你係咪…變咗喇…?」阿欣用楚楚可憐嘅眼光望住我,唔知係我錯覺定咩,仲好似見到有淚水喺佢眼眶入面蕩漾,幾乎就要跌出嚟…
維園燈光好暗,我望唔清楚…
「你指…?」
「你知㗎!」佢用力捉實我隻手…
「我…我…我都唔知…」我講…
曾經我以為,我對阿欣嘅感覺係唔會變,無論過幾多幾多年,我覺得自己都可以一直鍾意佢…又或者,我覺得自己每一日瞓醒都會重新鍾意佢一次…直到再無聽日為止…
佢係我第一個真正鍾意嘅人,無錯雖然毒撚係好易動情,但我好肯定我對佢唔係三分鐘貨仔…
雖然無一齊過,但我已經當咗佢係我初戀…我哋一齊睇戲,一齊做義工,一齊食飯,一齊行山…我哋除咗拖手攬錫同扑嘢之外都已經做齊情侶會做嘅嘢…我真係好撚鍾意佢…
我以為…我唔會變…
如果曾經咁深信嘅嘢,喺呢一刻變到咁陌生…我已經唔係好識面對自己嘅感情…
「我唔準呀…我唔準你走…我唔準你變呀…」阿欣今晚第二次攬埋嚟…
佢啲頭髮仲係咁香…身體嘅軟熟程度令小phiilip再次變身小phiiillllliip…
我想推開佢,但阿欣就攬到我實一實…
「咁…好囉…」我摸摸佢個頭講。