Moon Cup月亮杯-可以每次去小便時拎出嚟睇下，倒咗啲血，洗下隻杯再放返入陰道。
Flix Disc-唔知中文譯乜嘢，好似叫月經碟，亞太地區好少見，呢隻嘢有少少似子宮帽，塞到好入接住經血，可以長時間使用，嚟M時又可以繼續性愛
呢張圖比較做愛時用Disc同杯嘅分別
個人經驗：
棉條係最易用，最易買到，又輕便，女運動員（尤其跳水、泳隊、體操）好細個就會用，游水後換就得。女優、裸體模特兒如果接咗job但又嚟M，都會要用棉條，令工作順利進行
；優點：易買易用
缺點：要勤更換，否則有機會引發中毒性休克綜合症
月亮杯最環保，但拎返出嚟倒經血時會搞到成手血，廁所內最好要有洗手盆或洗滌設備，或者自己帶樽水去洗，呢方面就會麻煩少少，一定要洗手。拎出嚟嗰下要有技巧，一定要照足指示，因為接近真空，如果唔先撳住側邊放氣，扯出來會劇痛。另外，我用月經杯，雖然唔會feel到佢嘅存在，但有時覺得好似會頂住膀胱，好易急尿
；優點：可以睇到流量、環保、唔需要成日換
缺點：搞到成手血
月經碟最大賣點係戴咗都仲可以做愛，但有幾多女仔嚟緊M仲有咁大性慾？呢個產品最高難度係要放隻碟喺最深處，手指唔夠長就做唔到覆蓋子宮頸口，效果就唔係太理想，而會滲漏。小妹唔建議M頭兩日扑嘢，因為女仔冇乜性慾，潤滑又少咗，就算男人唔怕血腥味、成床血，插入會都唔會咁滑，雙方都未必咁享受。此外，子宮收縮緊，需要休息，M嚟時身體較虛弱，赤裸會易受涼，即係老人家講嘅入風，叫男友忍兩日啦！
優點：嚟緊仲可以扑嘢？
缺點：難用、即棄產品、貴
（小妹唔係用過好多次，因為覺得效果唔理想，無再用了）
所有產品都標榜唔會/唔易滲漏，但個人經驗係M量多時，仍有機會漏，所以建議喺底褲再加護墊或M巾作Back up，甚至係月亮褲。
月亮褲係一樣幾好嘅新產品，就咁由得啲血流，防水褲吸收晒。最近用過，防漏效果確係唔錯，夜晚瞓覺著最好，洗完曬乾又可再用。不過我只係喺屋企著，無出街，原因係條褲吸晒啲血後會幾大陣血腥味，著全日就有好腥，亦會有些少焗，除非你買幾條拎出街替換啦，咁污糟嗰條要點處理呢？一條褲百幾二百蚊㗎，唔會即棄啩？產品說明量多時最好都加M巾吸血，如果唔用M巾，如廁時用紙巾印走褲上的血，抹走上面嘅血塊就得。
小妹建議唔好買黑色，因為手洗嗰陣睇唔到啲血漬係咪完全沖走晒，淺色就好啲。
優點：唔使技巧、人人識用、防漏效果好
缺點：唔係咁透氣、唔可以成日換
新手絲：棉條+護墊/月亮褲
環保絲、旅行絲：月亮杯+月亮褲（全部可重用）
運動絲：用過晒以上產品再自行決定，月亮褲焗身，唔知做運動時用啱唔啱
