偏偏喜歡你
2020-04-19 23:00:50
但誰的世界如舊呢。
阿朗有一個工友,威少,比他年長十年,面有疲態。
他們能夠搭上兩句話,因為二人都有一個三歲大的孩子,不同的是,威少的是第三胎。
第三胎,阿朗心想,三個棉花糖在家裏走走跳跳,可愛,又可怕。
「我哋都鍾意細路仔嘅,宜家好咗好多啦,識凑咗,都識點用錢。我就老粗嚟嘅,冇咩點讀書,日頭番工努力啲囉。細嘅唔食,我自己都要食嘅。」
說罷,拿出煙,點火。呼出煙圈,薄荷味,透心涼。
「你食唔食?」
「唔啦。」
「咁健康呀𡃁仔。有時有啲大壓力。食煙,先放鬆吓。都成三十歲人啦,邊有得同人傾訴咁多,講經咩,屌。」
二十四歲的阿朗點頭,表示認同。
「番屋企又冇得食啦。」
「老婆唔中意煙味?」
「佢唔介意,我都唔撚會食啦,屋企有三個細路,要佢哋食二手煙咩。大仔實攞住常識書同我講,食煙會有肺癌。」
威少訕訕,但又笑,似是炫耀他已經拉扯長大一個嬰孩,甚至已經讀書明理,多過幾年,唐詩三百首、牛頓三大定律、微積分、西歐歷史,沒有什麼是他家兒子不知道的。
他自豪。
他又和阿朗說,晚上在家有煙癮,只好出門,去後樓梯吸煙。
一枝煙的時間,享受。
期間,他見到鄰居到樓梯間扔垃圾,對方向其投以詫異目光。
「屋企有細路。」
「哦,明白。」
煙味掩蓋了垃圾的臭味,像掩蓋了威少的疲憊一樣,和煙絲探戈,越跳越起勁。
阿朗慶幸,他不吸煙,他不想透過樓梯間的窗户看晈潔月光。
他繼續工作,闖着這一塊塵土飛揚的濁地,等待回家,到世外桃園睡去。