碧咸:「最好嘅球員都必須為自己嘅位置而戰,因為保持最佳狀態係每個球員嘅應有責任。」旁邊嘅查頓辛祖聽完依一番說話之後,亦點頭表示認同。記者招待會嘅尾聲,查頓辛祖迎來如此一條問題:「你如何期望加盟曼聯嘅第一個球季?」查頓辛祖顯示出佢嘅野心:「我希望為自己爭取第一個英超冠軍獎牌。」碧咸對查頓辛祖嘅答案感到開心,因為佢個人都好希望以領隊嘅身份迎來第一次嘅英超冠軍。
一番勞累,碧咸回到佢嘅崗位,準備即將來臨,主場迎戰諾域治嘅比賽,而第一件事要做嘅參與球員嘅場前操練。黎到訓練場,見到新加盟嘅查頓辛祖好快已經同其他球員們打成一片,並非常積極參與訓練,碧咸感到欣慰。助教費蘭交代上一課操練嘅詳情,表示未覺有球員狀態下滑或表現欠佳,而且個別球員有明顯嘅提升,馬舒亞、般奴費南迪斯更培養出具化學作用嘅默契同火花,建議碧咸喺戰術上加強兩人嘅配合。碧咸對費蘭言聽計從,將其建議一一記在心中。
又來到週末嘅英超賽事,曼聯主場對諾域治,碧咸今場喺陣容上做了一個調動,將占士收起,派上新加盟嘅查頓辛祖出任右翼。原因係查頓辛祖喺第一課嘅操練已有好出色嘅表現,喺戰術執行、與隊友配合方面都有良好效果,所以占士今仗只能退居後備席。但碧咸仍然十分倚重占士,並向佢承諾只要有好嘅表現,佢一樣係球隊嘅核心球員。占士並無不滿,表示明白同尊重領隊嘅一切安排。
賽事喺主場球迷嘅歡呼聲下舉行,球迷們都熱切期望著查頓辛祖嘅處子登場。身穿七號球衣嘅查頓辛祖喺開賽後表現積極,走動、傳球都做得恰如其分。直到比賽嘅二十一分鐘,查頓辛祖接應雲比沙卡嘅傳球,然後運用個人技術連過兩人,再來一記傳中,剛好來到馬舒亞嘅頭上,馬舒亞輕鬆一頂,頭槌破網,曼聯領先一比零。接下來嘅賽事,大家互有攻守,但曼聯始終佔優。四十分鐘,馬舒亞一球遠距離嘅勁射,一射入網,為曼聯增添比分至二比零。領先二比零嘅曼聯,得勢不饒人,攻勢一浪接一浪,球賽不乏精彩嘅鏡頭。只可惜喺餘下嘅時間,曼聯都無法再擴大比分,比賽最終以二比零告終。
碧咸對球隊再下一城,英超開季五場全勝固然高興,但同時碧咸發現球員嘅長傳精準度未如理想。碧咸好希望將自己獨步天下,所向披靡嘅七旋斬承傳落去。於是打算喺黎緊嘅訓練,傳授一個合適嘅球員,而碧咸心目中嘅人選就係⋯
A 占士
B 查頓辛祖
C 雲比沙卡
最快有三票嘅選項會作為最終選擇,大家多多支持。