凌晨瞓覺時,我忍唔住喺房度喊咗出嚟
除咗細個bb仔嗰段時期之後我係從來未喊過,但係今次一諗到可琳要同我分手甚至連朋友都冇得做,我真係忍唔住。
可能係因為喊得太大聲,所以嘈醒咗老豆,佢走過嚟問我咩事,我求其答佢同可琳有啲意見不合就算,唔通同佢講返今日件事咩。
「唉,情情愛愛嘅嘢老豆都唔識咁多,不過而家好夜喇,你聽日仲要返學,有咩不如瞓醒先再諗啦?」老豆語重心長咁講
我:「知喇,老豆。」
不過講真,邊有瞓得咁容易呀,我一諗起可琳就好傷心,而且聽日返學仲要見到佢,到時真係又傷心又尷尬。
第二日返學嘅途中我好緊張,始終都係自尋日嗰件事之後再見到可琳,之前無論默書、測驗定考試我都未試過咁緊張㗎。
終於踏入咗課室,我即刻望下可琳個位,咦冇人嘅。
陳sir話可琳今日都係請咗病假
但我知道佢唔係病,尋日買粥上去俾佢,佢都幾精神;仲話今日應該可以返返學,所以我諗佢今日係唔想見到我先唔返學姐。