明明平時阿爸阿媽關係都算融洽,但係我一講咗我嘅秘密畀佢哋聽之後,佢哋就嘈起上嚟 ,即係話佢哋都接受唔到我呢個好想做女仔嘅想法,覺得我係「唔男唔女」。
因為我覺得佢哋太煩,都冇曬心機聽佢哋講緊啲咩,佢哋都唔知嘈咗幾耐,大概十分鐘左右喇,之後都嘈到冇嘢好嘈。
「唉,我冇眼睇你哋呀」阿媽講完呢句之後就離開醫院
跟住阿爸擰一擰頭之後都相繼離開
阿爸阿媽走咗之後,病房入面就得返我同可琳兩個人。
「唉,原來我喺阿爸阿媽眼中係一個唔男唔女嘅人」我半自嘲半認真咁同可琳講
「唔好咁啦,可能佢哋要啲時間去接受啫,你忍耐一下啦」可琳摸住我隻手安慰我
「唔會㗎,我最清楚佢哋,佢哋好傳統㗎,接受唔到我㗎喇」
可琳聽到之後無奈咁攬住我,我知道佢都幫唔到我,但係唔緊要,有佢陪住我已經差好遠。