由細到大阿爸都係做呢啲和事佬嘅角色,或者難聽啲講係怕事,今次佢都唔例外。
原本以為阿爸同以往一樣,都係好成功咁擔任咗一個和事佬嘅角色,點知諗得太理想喇,今次唔係…
「咁耐以嚟,你淨係識得做和事佬嘅啫 ,其實你根本係怕事、鵪鶉,你都有份搞到個仔而家咁樣㗎」阿媽無啦啦鬧阿爸
「無啦啦做咩燒埋我嗰疊?」阿爸反駁返阿媽,不過其實都唔知呢啲係咪叫做反駁。
阿媽:「你講到好似唔關你事咁樣喎,個仔而家搞到唔男唔女,你都有好大責任㗎」
聽到阿媽呢句唔男唔女,我又再次好嬲,不過我都廢事駁佢,因為佢哋兩個都喺度嘈緊。
好彩阿爸阿媽聲量唔算大,都唔會嘈到其他人 ,咪如果個畫面都會幾難睇。
明明平時阿爸阿媽關係都算融洽,但係我一講咗我嘅秘密畀佢哋聽之後,佢哋就嘈起上嚟 ,即係話佢哋都接受唔到我呢個好想做女仔嘅想法,覺得我係「唔男唔女」。