【父愛偉大】古巨基湊仔避武漢肺炎 142日屋企閉關冇出街
47歲古巨基於去年尾升呢做老竇,太太Lorraine 在美國秘密生仔,現已半歲的Kuson跟爸爸餅印一樣,由於兒子出世後正藉武漢肺炎高峯期,基仔夫婦為了Kuson健康成長,原來已經142天沒有出街,基仔接受《蘋果》電話訪問說:「由2月1日到而家,我哋兩公婆都冇出過街,因為有咗小生命,要對佢負好大責任,如果市面上疫情未完全穩定,我哋唔敢出門,連自己門口都冇出過。」
初為人父的基仔,今年首次以爸爸身份慶祝父親節特別感觸,「我由佢出世嗰吓開始特別緊張,因為bb出世時比同年紀初生嬰兒係瘦同細粒,瘦蜢蜢得好緊要,特別擔心佢可唔可以肥番啲?太瘦會唔會影響健康?所以特別緊張佢嘅飲食吸收,還好幾個月落嚟,bb已經肥肥白白,大大隻隻,醫生話比同年紀嬰兒係高大同重,我哋放心好多。」
「養兒一百歲,長憂九十九。」基仔父母經常將這句話掛在口邊,做了父親的基仔,終於明白這句說話的意思,「就算我而家咁大個,爸爸媽媽都係樣樣掛心,我特別掛心bb健康,佢咁細個,加上而家有疫情,我份外緊張佢健康,呢段疫情日子,由2月1日到而家,我哋兩公婆都冇出過街,因為有咗小生命,要對佢負好大責任,如果市面上疫情未完全穩定,我哋唔敢出門,連自己門口都冇出過,2月1日到而家已經4個幾月,希望畀一個最安全環境bb,各樣健健康康。」
身為緊張級爸爸的基仔,負責通宵更照顧bb,「因為我試過觀察佢一段時間,有時瞓覺半夜冇端端趴喺度,我好緊張呢件事,萬一佢冚住面,佢唔識轉番頭,局住呼吸我好擔心,觀察佢有呢個動靜後,呢幾個月我負責半夜更,我望住閉路電視,我唔喺佢房,我怕自己有乜郁動會嘈醒佢,我喺房外睇閉路電視,佢趴喺度就幫佢移好身,佢瞓唔林就開海浪聲或拍吓佢,真係醒咗就抱佢,朋友都話辛苦,但坦白講,每朝早我返房瞓前見佢醒咗望住我笑,頭挨喺我度,一切都值得,一啲都唔辛苦。」
看着兒子一日一日長大,基仔好開心好感動,「喺佢嘅成長過程,我用手機拍住記錄每一日,其中好特別一次,喺佢大概4個幾月,我喺網上睇到片段,父母氹bb 講 I love you,好多bb三幾個月大已經講,我咪試吓,喺佢138日當天,見到佢好似想發聲講嘢,我同佢講 I love you,佢竟然同我講 I love you,嗰吓令我爆興奮同意想不到,因為佢未識講嘢,唔知點解會跟到我發音,令我好驚喜好開心好冧,因為你咁愛呢粒bb,佢同你講I love you,個心好甜。」
第一年過父親節感受,基仔覺得世上多了一個比自己更重要的人,「除咗爸爸媽媽太太,而家多咗bb,呢個感覺好強烈,做咗爸爸,更加感激父母,bb一舉一動都令我開心,感受番幾十年前父母睇住我嘅喜悅同感動,所以我第一次以父親身份過父親節,令我更加感激父母。」