JimmyTheREV
2020-03-27 00:41:32
第三章@2011年7月1日
呀強喺pizza hi工作咗一年,自從嗰陣喺居酒屋食過完美無瑕嘅咖喱之後,呀強一直都想跟嗰位大廚學藝,但礙於明叔走咗之後Adrian將cold kitchen交咗比呀強,所以佢喺未搵到接任嘅人之前都唔會離開pizza hi。呀聰佢本身有廚房經驗,做嘢爽手少甩漏,加上之前嘅沙律熱潮減退,令呀強開始想將cold kitchen交比佢。
又到月頭出糧嘅時候,呀強攞完人工之後就去搵Adrian,呀強行咗去打荷枱度搵Adrian同佢講「我想做埋呢個月之後去其他地方學吓藝,cold kitchen嗰邊我認為呀聰有能力可以應付。
Adrian就話「後生仔學多啲唔同嘅嘢係好事嚟嘅,到你覺得你夠能力嘅時候,我絕對會歡迎你返嚟。」
呀強得到Adrian嘅同意,就準備用最後呢一個月去令呀聰成為cold kitchen嘅主角。
收工之後,呀強同呀晴講佢辭咗職,呀晴驚訝咁問「點解你要走呀,喺呢度唔係做得好地地㗎咩?你走咗邊個煮福食比我喎。」
呀強解釋「唔係呢度唔好做,只係我想見識多啲唔同嘅菜系同埋學多啲嘢,煮啲更加好食嘅嘢比你食啫。」
呀晴見到呀多咁堅決咁講就話「好啦,但係你要應承我,唔可以識其他女仔。」
呀強心諗「屌,你又會唔會唔識其他男仔吖」但係口裏都係答應咗呀晴。
呀強已經計劃好下一站要去居酒屋學藝。但係荗荗然走去同佢講我想見工好似唔係咁好,始終佢門口冇貼請人嘅紙。
呀強應該點先可以跟到居酒屋大廚學藝呢?
A.禮貌地問大廚請唔請人
B.搵人試探佢請唔請人
C.搵大廚挑機