「毒遊遊記」去轉哥倫比亞順便學西班牙文

趁有cafe wifi更新少少先

Day 40
Medellin

呢一日朝早九點幾就嚟到呢個San Javier站，係一個喺Medellin B線嘅尾站嚟
呢度咁人山人海係因為每個人參加咗Comuna 13嘅tour都會喺呢度集合
而我之前就上網報咗一個叫Zippy嘅free walking tour

等到十點鐘個導遊嚟到就開始講解喇
首先第一件事要知嘅就係其實並唔係剩係平時上網見到嘅彩色山上面戈堆屋先算係Comuna 13,
由Metro站開始戈個範圍已經係Comuna 13嚟
然後就係講解其實呢個區域日頭好安全，叫大家唔駛擔心想影相嘅話相機手機可以拎出嚟

而walking tour嚟到嘅第一個地方就係呢度，
導遊話以前呢個位置已經係一個界線嚟，
過咗呢個地方再向山上走就係一個無人管治嘅地方

而依家已經變咗做一個當地居民成日會去嘅球場
話因為政府諗住想有一d建築係會令到戈個地方變得有人流，
令到其他人都敢行過去戈個位置
而球場望上去嘅戈堆住宅以前係非法嘅，所以話以前政府連水都唔會提供俾佢地
佢地就要自己將水管駁去政府嘅水管度，從而拎到免費嘅水源
而因為呢個地方係連政府都唔會管治，所以有好多毒品交易都會喺度進行，而罪犯多數都會住喺度

推

之後嚟到一間當地嘅學校同運動場所咁
導遊話如果我地認真留意嘅話會發現上午同下午著住校服喺條街度行嘅係唔同嘅細路嚟嘅
話因為政府為咗想多d人讀書，所以就指定咗學校分上，下午校
但上午校嘅學生就要7點鐘開始上堂

佢講起呢度呢幅壁畫，話係當地人好鐘意嘅，
大致係話靈感來自法國咁
喺呢度如果想喺一幅空嘅牆度畫壁畫好容易，只要向政府申請就得
但如果你想喺一幅已經有壁畫嘅牆度畫嘢嘅話就好難，因為你首先要得到原作畫家嘅同意
同埋如果你畫完之後當地人覺得你幅畫差過原先嘅話，你個朵就會臭晒，無人會再想睇你嘅畫作

運動場所嘅正面，幾有藝術感咁

見到幅壁畫幾靚就影吓


入到去見到一堆哥倫比亞師奶做緊健身操

之後上到個天台可以見到個全景咁

仲有隔離間學校啱啱放學

隔咗陣佢地就衝咗上嚟喺度玩跳繩

之後行返落去，其實都係度度都見到d壁畫咁
好似話如果參加嘅係graffiti tour,佢地會主力帶你去睇呢堆壁畫同埋影相咁

而呢個地區依家仲變咗個hip hop場所，好多人喺度玩街舞

之後就直接搭電梯上去個頂，呢條電梯係哥倫比亞入邊第一條免費同埋public嘅電梯嚟嘅

上到去個頂望落去嘅風景

上到頂之後其實已經變咗做一個超級遊客區
勁多攤檔賣首飾同嘢食嘢飲咁


之後又係d街舞表演咁

然後去咗導遊間屋，聽吓佢講點解佢地會想搞呢種tour咁
大家俾完貼士就散咗水
導遊話如果大家想跟佢落返去metro站，可以大約20分鐘之後喺個大門口度等

自己行嘅時候由另一個位置影返過去

見到幅好大塊嘅壁畫

行行吓口痕就買咗杯芒果溝啤酒飲

溝埋之後味道係奇怪嘅

唔知呢兩幅係唔係取材自香港

沿路準備行返落去時見到一路喺tour度幾好傾嘅瑞士仔同幾條友喺個guide嘅門口仲等緊
但係一早已經過咗20分鐘，瑞士仔於是就入咗去個guide間屋度搵佢
佢出嚟之後話個guide喺間屋度啱啱食完飯
話個guide本身都無諗住有人會真係等佢一齊行落去，諗住全部人應該係自己散水
落返山之後就變咗同瑞士仔佢地去咗間local餐廳食嘢
喺哥倫比亞度食嘢經常都會有大大舊牛油果附贈，十分良好

啲相靚 留名

食完嘢之後幾條友過咗嚟搭欖車
因為之前個導遊話只要拍卡入metro站嘅話，其實個欖車係唔駛額外俾錢搭嘅
幾條友又無坐過於是就過咗嚟搭

搭欖車見到個景其實呢邊仲係有好多鐵皮屋
但係個總站出去就變咗見到一堆新起好嘅樓，感覺呢條欖車其實都係因為有戈堆新樓先會特登起出嚟

而返到去hostel之後都已經晏晝4點，喺間hostel hea咗陣之後就口痕出咗去飲咖啡

順便叫咗件carrot cake食，味道唔錯
而瑞士仔呢個時候突然間問佢地諗住整意粉，問我有無興趣過去食
咁我本住慳錢嘅意則就即刻話好啦

最後托福食咗一餐，後尾幫吓佢地洗碗咁
不過佢地間hostel好多限制，佢地話買咗支紅酒諗住開嚟飲都俾人ban咗
話因為間hostel本身有賣酒，所以唔飲得外來嘅酒
最後搞到幾條友要食完餐意粉之後先一齊出去街邊度飲咗支紅酒佢

好多人都講呢套嘢但我未睇過

Day 41
Medellin

呢一日係喺Medellin嘅最後一日，所以諗住去行埋d之前mark低咗但係唔多順路無去到嘅景點
首先出發行路過去一間叫modern Art Museum嘅物體
雖然每次入去呢種museum我都唔多識欣賞
但都抱住咗半中伏嘅心態行過去

半路上見到d共享單車咁

間museum係喺Medellin入邊比較新嘅區域度，一路都見到d新起緊嘅樓

嚟到間嘢嘅側面，呢度前身係一間倉庫，依家變咗做co-work space咁租俾人做嘢

Museum嘅正面，俾咗6000cop入去（題外話：最近美元換cop由1:3000升到去1:4000）

上到去佢個5樓天台度可以望吓景咁，不過其實好多地方都望到，呢個位無咩特別

影到吓對面嘅新樓咁，有d人喺個露台掛hammock好寫意

之後落咗去個展館睇吓d展品咁，用紙袋整出嚟嘅大廈

呢幅畫話係用咖啡濾紙同埋砂糖整出嚟嘅
不過唔多清楚佢想表達嘅含義


呢間museum今次無咩點伏，主要原因係入場費只需要兩蚊美金
同埋起碼堆展品叫做幾靚

出返去之後去咗museum個紀念品店，見到佢地賣呢d嘢
不禁諗起Museum可以公然咁賣老翻架咩

然後由museum行去一個叫Nutibara Hill嘅地方，網上話係一個好靚嘅山頂，可以睇吓景咁

佢嘅理想圖

現實

上到頂見到一個一眼望盡嘅廣場，連間教堂都裝緊修
有一堆人好開心咁同一塊I Love Medellin嘅牌合照，但我完全唔知有咩咁值得影

有d小食店咁

仲有普通到爆嘅景，如果無咩嘢做順路都可以過一過嚟，
但如果要專登坐的士嘅話就真係可以慳返

之後行返落山去一個叫Mercado del Rio嘅food court度食lunch
見到個Metro站影咗吓相咁


Lunch時間呢個food court都幾多人

最後俾呢一間鐵板燒整出嚟嘅香氣吸引咗

食咗碟幾好味嘅雞肉炒飯，不過我覺得聞到嘅氣味吸引d

然後順便喺度食咗條雪條

一條士多啤利雪條盛惠2USD

樓主啲相好靚呀

樓主一直都冇戴口罩？自己小心啲
俾同行人歧視都好過冇咗條命仔

之前無戴過
Ecuador 依家封咗邊境
睇嚟我都係要留喺度多一段時間

lm

樓主咁好恆心

每日寫少少就會好快上手
同埋依家知道要留喺哥倫比亞多一段時間
就更加得閒打文

Day 42
Jerico

呢一日朝早check out完之後行咗半粒鐘去南邊嘅巴士站搭車去Jerico,一個喺Medellin南邊嘅小鎮

個巴士站大堂，衰在係最近嘅Metro站都要行15分鐘先到

都係買完車飛要過吓閘咁

呢一日應該係哥倫比亞啱啱開始有confirm case無耐，有d notice board叫人洗手同戴口罩咁

搭呢一種小型嘅van仔過去，坐咗3粒鐘，盛惠30000cop

跟住嚟到呢邊嘅住宿，Jerico小鎮得一間hostel,其他全部都係酒店
但係之前睇相又唔太鐘意間hostel,於是就索性book咗間double room,20歐羅一晚

有個露店望到吓出面嘅教堂咁

放低嘢之後就行咗去戈間藍白色嘅教堂到，順帶一提Jerico係喺哥倫比亞入邊出名神聖嘅地方
呢個小鎮話有十幾間教堂喺度，同埋哥倫比亞第一位聖人都係喺度出世

教堂嘅入邊，同哥倫比亞其他地方嘅教堂對比的確係幾靚


跟住喺條街見到d幾靚嘅粉紅色花

現況更新 3月16日

寫少少關於呢邊嘅程況先

哥倫比亞呢邊暫時有45個confirm case
呢邊早兩日已經禁咗委內瑞拉嘅邊境出入口（雖然呢個係同政治因素比較大關聯）
而南邊嘅厄瓜多爾就宣佈咗關閉海陸空全部出入口，禁止所有 （包括當地人）進入

而琴日（3月15）哥倫比亞都宣佈咗禁止所有14日內去過亞洲歐洲嘅非當地人入境
所有學校都已經停咗課，而亦都立咗法未來14日禁止喺境內搞旅行團

呢一日喺當地聽到好多遊客都討論緊武漢肺炎
而hostel度都有兩三個歐洲人諗住趕返去首都Bogota直接搭機返歐洲咁
但大多數本身plan咗長期喺南美旅遊嘅人就索性決定extend tourist visa留喺呢邊

有部份嘅hostel同hotel就直接講咗禁止新嘅歐洲人入住

點解啲歐州人要趕返去
我智利呢邊都禁左啲人入境同停左課

佢地有d係本身玩多一兩個禮拜就走
依家驚分分鐘遲d直頭出入境都封埋

我果邊啲同學歐州人都衝住返去
我都好難理解
而家你會留耐啲哥倫比亞？有冇plan返香港

我本身有張7月嘅回程機票
依家咁樣留耐d喺哥倫比亞先啦
感覺搭飛機仲危

現況更新 3月17日

呢一日嘅哥倫比亞開始實施咗宵禁，所有人喺8點鐘之後唔可以再出街
而hostel嘅人就大部份都今日衝緊過去首都諗住走
最誇張係有幾個荷蘭女仔為咗返屋企，買咗張1500歐嘅機票
但要由Bogota飛入去Panama,再入Miami,再去Toronto,然後先返去Amsterdam
街上有d cafe開始貼咗告示話即日起唔會開門住
而又有傳聞話星期六開始爆得最勁嘅Bogota (大約有30個case)會直接封閉
喺呢度book住宿依家要俾人做問卷調查問入咗嚟哥倫比亞幾耐咁