隔牆有耳：來自獄中的賀年卡：防疫靠自己 - 李八方
盧建民雖然人在獄中，但仍緊貼時事，繪出多個港人正在面對的情景。
(社內相)
暴動罪被判囚七年嘅盧建民（影攝食）自反送中運動開始，除咗關心抗爭者，仲一直好關心喺前線工作嘅記者。《蘋果》副社長陳沛敏日前就收到影攝食寄自獄中嘅新年賀卡同信件，佢今次主要係祝願我哋記者新年快樂，重叫我哋要出入平安，「不要俾暴警欺負」，睇嚟我哋記者經常畀警察恰嘅形象實在太深入人心啦。
盧建民
(社內相)
影攝食嘅賀卡剛剛好喺農曆新年前收到，感動嘅不單因為佢關心記者安危，更加喺受牢獄之苦時，仍保持樂觀正面，處處關心香港人同抗爭。佢對香港嘅愛，相信唔比我哋任何一個人少。佢喺信件入面不只載有對記者嘅祝福，亦有好多對香港人嘅提醒同祈望。
盧建民寄語港人「不遺忘！不善忘！與年青人並肩同行！」
(社內相)
佢寄語港人不要忘記2019年發生嘅事都係源於政府嘅錯，又再提醒我哋「不遺忘！不善忘！」。的確，八方好同意善忘係香港人一直以來嘅特質，希望手足從獄中嘅提醒可以除去大家善忘嘅習慣。信件又畫有三幅插畫，全部都係半年以來抗爭歷歷在目嘅回憶：火海中嘅理大、四點鐘記者會、九億OT錢、和你lunch、太子站、催淚彈等等元素。
除咗香港之外，影攝食亦有關注國際新聞，祈求澳洲山火熄滅，又留意到武漢肺炎來勢洶洶，寄語港人要「靠自己」，小心防疫。話口未完，前日香港就已經出咗兩單確診，中國確診同死亡個案急升，武漢仲封埋城，可見影攝食嘅估計比衞生署更有遠見。
編按：八方會喺農曆年假期收爐，年初五再同讀者見面。
李八方
