多謝民陣籌備元旦過百萬人大遊行，亦邀請左小弟發言同拉頭BAN。
當然大家都好失望，死黑警搞到我地無辦法完成百萬人遊行，更加濫捕幾百位市民。
我地唔會比場運動完。民間集會團隊喺2020年會繼續善用大家既眾籌款項，接力舉辦大型活動！
2020年，將會係港共政權同黑警受到清算既一年。
如果今年未能實現真普選，全球必須立即制裁港共！
因此，民間集會團隊將會一連兩個星期日，以「天下制裁」為主題，分別舉行集會同大遊行！
1.12 集氣大會
日期︰1月12日(星期日)
時間︰下午三時至五時
地點︰中環愛丁堡廣場
*已通知警方
1.19 天下制裁大遊行
日期︰1月19日(星期日)
時間︰暫定下午三時起步
路線︰遮打至銅鑼灣SOGO
*已通知警方
可能你會問，點解要舉行連續兩個星期日既活動？
因為根據公安條例，警方最遲要喺一個活動開始前48小時決定會唔會禁止/反對進行。我地希望透過舉行一個橫跨兩星期既活動，盡早知道警方對整項活動既立場，方便宣傳。
換言之，警方需要喺1月10號或之前，決定係咪對整項橫跨兩星期既活動發出不反對通知書。
可能你會問，點解要揀呢兩日？
1月11號係台灣大選，選舉結果對於香港局勢好重要。所以1月12號係好好既機會，比我地檢視台灣既選舉結果，並同時向國際發出「天下制裁」既呼籲。1月19號將會係農曆新年前最後一個星期日，亦距離元旦遊行超過半個月，係一個適合既時間比香港人趁歲晚再一次走上街頭，為香港「大掃除」。
可能你會問，點解要由中環行返轉頭去銅鑼灣？
其實之前一直有唔少連登巴打提議，將路線改為向東行，會更加安全，因為銅鑼灣比較方便大家解散離開，亦方便大家遊行結束後約朋友食飯行街等等。我地翻查資料，有紀錄以黎都未試過有由中環向東行返去銅鑼灣既大型遊行，所以我地都認為值得一試，睇下會唔會可以比大家更加安全咁完成遊行。
另外，以往大家向中環行，意思都係想向位於中環既政府表達訴求。但係黎到2020年，當政府已經唔再聽大家訴求，而係同人民越走越遠，我地再無必要「上訪」式走去政總請願，而係應該遠離政總，走入群眾，步向國際，真正展現港人民意，要求天下制裁！
今日係1月3號，距離1.12、1.19仲有好多時間。我地會繼續盡力籌辦遊行，同埋爭取警方發出不反對通知書。希望大家都可以善用呢段充分既時間，做好宣傳！
