當枕邊人返辦公室多過喺屋企、日日做嘢做到三更夜半,所以第一先生林兆波就算係喺周末要一個人過,都唔係好奇怪啫!
有讀者向八方報料,話噚日、即係啱啱過咗嘅星期六(28日),夜晚喺香港電影資料館電影院撞到好面善嘅一男子,裇衫波鞋衣著樸素,睇真啲原來係林鄭月娥另一半林兆波嚟㗎。原來佢買咗7點半嘅飛,睇黑澤明嘅《我對青春無悔》(No Regrets for Our Youth),呢套係黑澤明1946年執導、戰後嘅首部電影作品,故事涉及學生爭取言論同學術自由,但被政府鎮壓,係反戰之作。
呢位讀者仲話,單拖去睇戲嘅林兆波,原本坐喺第一行最左邊嗰個位,及後有一家三口前來,疑似父子坐喺林兆波旁邊、相信係媽媽嘅女士就一個人坐喺同行最右手邊,林兆波繼而同旁邊男子耳語,然後過咗去同嗰位女士調位,估計係主動讓位畀佢哋一家三口坐埋一齊,大團圓結局。散場後林兆波邊撳電話邊走人,繼續孤身走佢路。