其實五大訴求到最後都只係一個訴求，就係改變成個制度，實行真雙普選，而唔係一個有篩選既選舉，只有背負民意既政府先會對人民負責。
我唔知其實有幾多人係諗住成立獨立調查委員會，可以清算啲黑警就夠，變相返到五個月之，繼續溫水煮蛙。咁到底係唔係咁樣就可以解決所有問題？下次推明日大嶼嗰陣，係唔係又要抗爭多次？
要清算舊政府，其實只有新政府先可以做到，講緊既係高官。定係你覺得呢個政府你可以忍受，忍到一個時候，儲夠錢就移民呢？
我唔反對大家移民，因為呢係大家既選擇，不過我想大家諗一諗移民既原因，係逃避香港既政治現實定抑或係真心鐘意嗰個地方既風土人情。
聽日11月11號，大家話要罷工，我知道香港真係有人真係會手停口停，即使佢係好支持個運動。所以先要籌備工會，喺佢哋背後做充足既配合。
籌備罷工其實需要好長既時間，因為工會需要組織同資金嚟到支援有需要既人，亦都係業界入面既代表去同勞方談判。
喺成個運動嚟睇，可持續性好重要，所以我哋先有需發展黃色經濟圈同埋組織大規模既罷工。仲有好重要既係罷工唔好講明罷幾耐，咁樣會被對家知道我哋既底牌，會失去咗談判籌碼。
大家亦唔需怕工會導致有大台既出現，因為大台唔係問題，有冇人監察大台，防止大台亂嚟先係問題，當然我唔係叫人起大台。
喺成個社會發展入面，政府一路都係大台，點解會有呢場運動？其中一個原因就係我哋盡我哋既公民責任，去監察政府施政，所以促成咗呢場運動。
民主政體講緊既唔只係一人一票，更重要既係投票後既公民監察，防止政府喺度圍威喂，呢個同樣講緊議會選舉。
唔好成日係度悲觀論同失敗主義，路係人行既，未行過點知唔得。明知上前線會被捕，點解仲要上？係因為社會公義。公義係唔可以當飯食，但係冇咗公義你連飯都冇得食，因為你會被人政治迫害，被黑警打死。
大家亦都唔好過度依賴外國幫手，你冇錢都會返工，唔通有手有腳去乞食拎綜緩。我哋要自己主動做嘢先至會有主導權同籌碼係手Bargaining power
仲有就係唔好再上網捉鬼，手足火魔法咪火魔法，請緊記一個概念係Justice war。話人哋係鬼嗰啲人，有冇發過夢，有冇見過啲魔法師生得幾高啊，我自己177cm，佢矮我大半個頭啊
大家夢中相見，煲底相認
