赫奴聞言愣了一秒,然後噗哧大笑,笑得擠出兩行淚水。
明明剛剛才說過要除去畢穎螢和冷凝霜等人,怎料到對方不用找,直接殺上門了。
「哈哈哈哈哈!」
「因為一條頸鏈而滅我海奴會!唔係權力,唔係財富.....我因為一條頸鏈葬送多年努力。啊哈哈哈!」
「後悔?」
赫奴虛弱道:「成王敗寇,僅此而已。只怪我氣數已盡,天道不公。」
刑爆烈瞄了赫奴臉頰的條碼刺青一眼,倏地認出這是某個大型奴隸集團的專屬刺青。
「你應該曾經都係奴隸,好應該清楚奴隸失去自由嘅痛苦。」
「但你得到自由之後,選擇變成另一隻食人而肥,奪取其他人人生嘅惡魔。」
「天真。自由嗎?人類自出生到死亡,從來都冇自由。食人與被食,全憑心狠。教庭殘害千百萬人就受盡景仰,我不過剝削區區幾千奴隸就係十惡不赦嘅惡魔?哈哈!」
「殺死我,只會有另一個赫奴。不過提醒你,我一早已經喺奴環種下禁制。只要我心念一動........海奴塔所有奴隸頸上嘅奴環都會炸開,全部為我陪葬!」
「喪心病狂。」刑爆烈瞇眼。
「哈哈.....君王嘅味道......」
赫奴的話斷斷續續,仰視上方的眼神漸漸渙散,嘴上卻掛著得戚的笑容。
此刻他已回天乏術,彌留之際卻莫名升起一陣瘋狂的快意。
「係啊,就似古代......皇帝一樣,有無數妃嬪為我殉葬。地底泥.......一生夢寐以求嘅......就係呢一刻。」
旭日東昇,和煦的光線從破碎的幕牆滲進海奴殿,一直飄散向那張如同國王大椅的高背椅,照在赫奴的笑臉上。
不知怎地,刑爆烈看著仰天呢喃的赫奴,突然問出一個問題。
「如果再來一次,你會成為同樣嘅人?」
「再來一百次都一樣.....因為造就赫奴嘅係呢個扭曲嘅世界,嘿......入侵者......你係咩人?」
刑爆烈憶起在這個時空所見所聞,沉吟兩秒後終於答話。
「革命軍。」
刑爆烈踏前一步,說出坊間替他起的名號:「我係革命軍— 射日之箭。」
「革命軍?.....如果.....早十年出現就好,哈哈哈哈哈!」
赫奴語畢,舉起手指點向自己的太陽穴,腦海浮現塵封已久的畫面.......
只記得那時候很冷,冷洌的寒風吹入籠牢,連鞋子都沒有,但身體好像比現在暖和.......
「赫奴哥哥,將來我哋如果唔使再做奴隸,可以做咩?」
「做國王?」
「好,我係赫奴國王,你係我最可愛嘅皇后,嘿。不過我最想要自由,所有奴隸都可以幸福啊!」
原來是自由.....
赫奴笑道:「我終於可以自由。」
刑爆烈想要制止,可是灰芒已貫穿腦袋,血花濺了一地。
刑爆烈看著赫奴的屍首沉默一會,對身後的步如飛說道:「飛,呢個世界需要一場革命吧?」
「嗯,既然源奧教視我哋為亂黨,就等佢哋見識.....」
真正的革命!