二零五零年 – 我女神係暴徒

一個抗爭失敗之後既香港市故事。
------------------------------------------------------------------------------

大家好, 今年係二零五零年, 我叫阿熊, 今年三十歲, 身材高大, 而家係將軍澳區既建國中學度教書, 多得老豆係退役武警, 上年佢同D舊伙計係微信朋友圈度公開譴責過我校長, 譴責佢咁多年都唔升我職, 我今年終於升左做科主任, 負責教國民通識科。

明明國民通識科係教育部最關注既科目, 係全國高考入面呢科既得分係會乘大五倍, 香港市既中學排名都係用每年高考既國民通識科平均分黎排。

但偏偏校長就好唔鍾意呢科, 可能因為校長以前係美國讀書, 美國既國民教育非常落後, 導致佢唔了解呢科對同學幾咁重要。

其實作為老師日常生活真係好單調, 除左每日早午晚唱3次國歌係最令人振奮既時刻之外, 學校其他事都係機械式作業, 連教學內容既一字一句, 教育局既領導們都有比好清晰既指引, 基本上老師照讀就有糧出。但久不久都有老師被捉到違規向學生教導非官方批准既內容, 真係唔明白點解佢地咁蠢。

呢班亂咁教育學生既教蓄, 都有個共通點, 佢地父母係三十年前都被政府標籤係深黃色份子, 對社會曾經做過非常大既損害, 所以職級表有專門幫佢地開一級, 叫做Y.M. (Yellow Master), 而其他正常老師都會係G.M. (Graduated Master), 憑我博學多聞既語文能力所推測, 深黃色既邢惡份子應該同色情事業有好大關係。

但黨一向都用人唯才, 並無扼殺呢班黃色份子既生存機會, 呢班黃色份子仍然生存, 足以證明中央既文明同包容。

雖然一向我都非常歧視呢班教蓄, 但偏偏….我既女神黃迪儀老師都係其中一個Y.M…..

「往北角列車現在到站，請不要超越黃線，並先讓乘客落車再上車，謝謝合作。」

要由將軍澳搭黨鐵番去月娥島, 要先搭將軍澳線到北角, 轉乘港島線到中環, 由中環轉乘東涌線去青衣, 青衣站徒步行二十分鐘到青衣外島線總站, 先可以搭外島線抵達月娥島。手機黨鐵APP顯示預計行程時間為一百五十分鐘。

雖然十五年前政府用左五千億起左一條跨海大橋由西環直接通往月娥島, 當時我重好細個, 我記得市長係電視度主持大橋開幕, 宣佈係佢任內解決左月娥島交通不便既問題, 佢重宣佈自己已經同月娥Connect連為一體, 我記得當時老豆飲緊啤酒但突然濁親噴左出黎。

但大橋開通後黨巴係唔允許行大橋, 而私家車甚至連政府車輛都需要申請特別通行證先可以過橋, 通行證呢十五年間只係發出左一千張, 由於通行證設計精美, 全部都被偉大祖國富豪買黎當閃卡收藏, 所以基本上大橋近十五年都無乜車行駛。

「起來! 起來! 起….」

入到車廂內, 偉大祖國既軍歌響遍車廂, 辛勤工作一日之後聽到呢首歌真係非常治癒!

雖然係收工時間, 但出將軍澳既人唔算多, 車廂仍然有唔少空位, 迪儀行入車廂之後無坐低, 企左係車門附近, 低頭睇緊電話。我就企係隔離車廂打斜角既車門附近, 用眼角啤住佢。

老豆教落, 為免跟甩跟蹤目標但又唔想監視得咁明顯, 最緊要低頭斜啤住目標人物對腳, 觀察佢雙腳既動靜, 所以我非常專注咁望實迪儀果雙長腿, 今日佢隻絲襪既格仔真係好吸引, 望既同時我努力諗緊一陣轉車時應該點樣扮偶遇, 再約佢食飯比較好。

「下一站油塘, 乘客可以換乘觀塘線。」

列車駛到油塘, 突然間我嚴密監控既果雙腳開始郁動, 行出左列車! 意料之外, 迪儀唔係番屋企咩? 點解會係呢度落車?!

我急急腳跟住落車, 迪儀已經係扶手電梯落緊去U2層, 真係奇怪佢係行緊去觀塘線既方向, 轉觀塘線點解唔係調景嶺轉車呀?

迪儀沿住觀塘線, 一直搭到去九龍灣落車。奇怪, 九龍灣果個乜野德福廣場同德福花園係十年前已經被政府用土地收回條例收番, 再送左比黨鐵擴充總部大樓, 附近既屋苑都變晒黨鐵宿舍, 都無地方可以行街食飯, 夜晚過黎呢度做乜呢?

迪儀好似好熟路咁, 出站後越過唔同既通路, 到達兆業街, 最後迪儀竟然行左入武警牛頭角分部…

加速

lm

留名

自從老豆榮休之後, 我就無再入過警署。我記得以前跟老豆番警署玩係好開心, 老豆班伙計又會用警車載我四圍去。

有一次玩認人遊戲, 老豆比左段閉路電視我睇, 段片影到一個男人既背面, 老豆話佢捉左十個人番黎, 叫我隔住塊大玻璃估下邊個人既正面比較似片中男人既背面, 果陣我見到有個肥大叔面貌猙獰, 雖然閉路電視望唔到佢個樣, 但我毫無猶疑咁指住佢, 跟住老豆同班叔叔就讚我叻仔, 話我幫佢地成功捉到犯人添呀!

我行入警署, 見到迪儀係詢問處果度同個肥武警好似爭論緊D野, 我一路聽一路慢慢行過去。

「長官我求你讓我見一下我弟弟…他的名字是黃迪輝..他在羈留室! 求求你!」

肥武警繼續拎住企鵝集團最新推出既手提遊戲機, 望都無望迪儀。

「這位女士, 沒這人, 你走吧!」

「他是在這裡..他一直都在這裡的羈留室, 求你讓我見他一面! 你先在電腦幫忙查一下他的名字好嗎? 求你了！」

「都說沒這個人了, 長官做事不用你教!」

「對不起..他是十年前被抓進來的..他叫黃迪輝..求你幫幫忙! 我付你茶費可以嗎?」

肥武警聽到個錢字, 抬高頭望向迪儀。

「這位美女, 萬事有商量, 有茶費的話你早說嘛! 我們可以溝通溝通! 那你願意付多少茶費呢? 服務人民一直是我的使命呢!」

「五百元可以嗎? 求你了!」

「哎呀, 我大雞不吃小米, 五百元讓我費神幫你查電腦, 把老子我當乞丐嗎? 你媽的! 市長平常到區內巡視都派五百元給乞丐, 你竟然當我乞丐! 你滾!」

「長官請你幫幫忙…我是有權見我弟弟…我是他的監護人…你不讓我見他我不會走的! 我要投訴!」

肥武警聽到呢句之後就企起身, 推左迪儀心口一下。

「放屁! 你滾! 你剛用胸部襲擊我的手! 你這是意圖謀殺武警! 再不滾我把你也抓進去!」

迪儀自然反應用雙手護胸, 眼泛淚光, 向後退左兩步。

見到迪儀比肥武警非禮, 我佛都有火, 衝上前捉住迪儀隻手, 拉左佢係我身後面。

「長官, 你為何對這位女士動粗啊? 我看見你用手非禮她!」

迪儀望住我, 神情非常震驚, 眼同口都掹得好大。

「熊主任你為…」

「先生, 你別胡說! 我懷疑這位小姐的胸部經過非法改裝! 剛剛她的胸部像有磁力一樣把我的手吸過去! 幸好我是習武之人, 否則這隻手就廢了!」

由於肥武警愈講愈大聲, 署內大堂其他武警都開始望過黎, 有一個本身睇緊中超足球電視直播既武警, 企起身行緊埋黎。

「你媽的! 在吵什麼? 還想活嗎?」

呢位身型好高大既武警, 膊頭三條柴, 應該係大堂呢度既小隊長, 佢一路講, 隻手一路伸向掛係腰間既伸縮警棍, 然後支棍對住空氣一揮, 「咔嚓」一聲支棍就伸長左。

見到支棍我其實並唔驚訝, 老豆以前都好鍾意係屋企亂咁舞支棍, 當支棍係太極劍咁揮, 老豆同班伙計重會幫自己支棍改名, 老豆果支好似叫「振中棒」, 老豆佢地慢慢重自拍左好多揮棍片放上微信朋友圈添呀!

「這位隊長, 請保持克制! 我是有這個的! 我完全無敵意。」

我由公事包入面拎左個鎖匙扣出黎, 鎖匙扣微微發出紅色螢光, 上面係印有香港武警既警章。呢個係每位現役或已退役既武警同佢家人都會擁有既識別工具, 鎖匙扣內設有晶片可以比系統掃瞄到係所屬邊個單位既同袍, 而我個鎖匙扣表面係白色, 代表我或我家人係膊頭有花。

「先生你是…..?」

呢幾個月黎, 好驚會輸
一直幻想將來既香港會變成點

望住自己小朋友, 唔識點教

最後選擇用反諷既方式抒發

光復香港
時代革命

「先生你是…..? 你這個鎖匙扣是?」

「是! 長官! 我也是部隊大家庭的一份子, 我們是自己人! 聽黨指揮! 能打勝仗! 作風優良!.........」

我將由細到大都聽住老豆係屋企叫既口號激昂咁叫出黎。武警對呢類精神口號都好受落, 三柴武警聽住我叫到呢度, 都肅然起敬。

大堂內幾個武警, 包括果個隻手被胸部磁力襲擊既肥武警, 都一齊叫起口頭黎。

「劍鋒所指!!!!」「劍鋒所指!!!!」「劍鋒所指!!!!」「劍鋒所指!!!!」

「使命必達!!!!!」「使命必達!!!!!」「使命必達!!!!!」「使命必達!!!!!」

三柴武警行上前伸出右手同我握手。我同武警握手果剎那, 我感覺到迪儀握住我隻左手握得好大力。

「先生, 原來是自家兄弟! 但為什麼你會和這個狗屁的女士在一起?」

「本來父親託我來請各位英雄吃晚飯, 進來時看到好像發生了點誤會! 這位女士是我的同事, 她剛剛可能言語間有衝撞到那位武警大哥, 我跟她一起工作多年, 她絕不是造遙生事的人, 不如就算了吧!」

「你父親是?...」

「我父親已退役多年, 就不要提了, 長官, 不如這樣, 我把茶費放下, 你和兄弟們今晚去吃點好的, 小弟我就負責把這位女士帶走吧, 不要再麻煩你們了! 你看這樣好嗎?」

我係銀包入面拎左五張一千蚊人民幣出黎, 遞向三柴武警, 三柴武警即刻伸手出黎拎左, 然後頭也不回就已經轉身開始指揮佢既小隊, 每個隊員分工明確, 快速翻查唔同酒家既外價餐牌, 務求善用呢筆茶費大吃一餐。

似乎佢已經無再理我同迪儀既存在, 只係背住我向我揮一揮手。

我拉住迪儀急步行出警署, 當離開左警署大概一條街既距離之後, 迪儀大力甩開左我隻手。

「放開我! 熊主任…你竟然是武警的同伴! 你不要過來! 你離我遠一點!」

迪儀一路喊一路退後。

「迪儀你先冷靜點! 你到底在說什麼? 你弟弟到底是什麼情況? 有什麼我能幫忙嗎?」

「你不要…再裝假仁假義, 你們武警全家都不是好人啊!! 武警死全家! 嗚嗚….」

「迪儀, 你先冷靜點! 我知道你想見你弟弟, 你剛剛也看到他們不敢動我, 我能幫你的! 你先告訴我發生了什麼事好嗎?」

迪儀靜左落黎, 側住頭望住我, 神情充滿疑惑。然後佢由手袋拎左部手機出黎, 開左張相比我睇。

「這是我弟弟黃迪輝。他十年前被武警抓到後就困在這裡的羈留室…本來我作為監護人每個月都可以探望他..但近幾個月來都不再讓我跟他見面了」

「十年? 怎麼可能在這裡困他十年呢? 這裡又不是監獄! 是不是有什麼誤會啊?」

「因為武警根本沒有正式控告他啊…這十年來一直都說正在調查中..我已經找過很多不同界別的大人物求助..什麼議員、太平紳士都找過了, 他們都說這些是警方行動細節不便插手, 所以我只能久不久來求一下當值的長官….」

迪儀到底係到講乜野? 無端端點可能困住佢細佬十年呢?

迪儀到底係到講乜野? 以前老豆有教過我基本警例同法例, 武警如果對市民有合理懷疑, 只可以強制性羈留市民四十八小時, 查唔到就要釋放, 無端端點可能困住佢細佬十年呢?

「但武警最多只能羈留你弟弟四十八小時啊? 怎麼會這樣?」

「熊主任..你不知道嗎? 差不多二十年前, 前市長透過<<非緊急法>>授權武警如果懷疑任何市民是黃色份子, 羈留時間可以由四十八小時無限伸延…而且武警無需向任何人解釋原因…」

「我曾經找過大律師幫忙向法庭申請人生保護令..要求武警向法庭解釋拘留原因, 本來法官已經接納受理, 但在開庭前幾天開始, 大量親政府派和武警在微信朋友圈中不斷彈劾法官…又說他是黃色法官, 連法務部長也出來說十分關注黃色法官意圖協助黃色份子分裂國家...」

「最後在開庭的時候, 大律師都還沒開始作開案陳詞, 法官已經直接宣判武警勝訴…還判罰了我以百萬元計的訟費和堂費…所以這十年間我一直都在償還欠債…」

「最後連幫我出庭的那位大律師…都在香港消失了, 聽聞是因為在單車徑亂過馬路被送回國內受審了…之後就沒有任何人敢幫我了...」

「我已經..已經不知道怎麼辦了…」

二零二九年十月四日下午三點正, 為進一步加強監控及打壓香港市的潛在黃色份子, 時任香港市市長宣佈推行<<非緊急法>>, 法例全名為<<非緊急情況規例條例>>, 即時生效。即使香港市並不處於屬緊急情況或危害公安的情況下，香港市長聯同香港市黨委書記仍可隨時訂立任何他認為合乎國家利益的規例, 以<<非緊急法>>訂立的任何規例，須持續有效至香港市長聯同香港市黨委書記藉命令廢除為止。

我記得以前讀香港近代史果陣, 有提及過呢一段。但實際上我無係電視或者其他媒體見到市長有引用過<<非緊急法>>黎立法, 點解會咁?

「迪儀…那…即是你弟弟真的是黃色份子?? 黃色份子在我們這一代不是已經絕跡了嗎??」

「什麼黃色份子啊…迪輝被抓的時候才十七歲啊…他以前是和同學組樂隊的…他們平常只是在街頭唱唱歌而已…但是…他們被抓的那天..他們在學校錄音房唱了那一首歌…」

「那首歌?? 唱什麼歌要被抓啊? 唱歌是合法的啊!」

「熊主任…你知不知道有一首歌叫<<<榮光>>>…?」

迪儀既聲線愈來愈細聲…

「榮..?」

「殊殊殊殊! 說小聲點! 危險!」

迪儀舉起一隻手指放係唇前, 示意叫我唔好出聲, 佢環顧四周, 佢除左留意附近有冇路人, 佢重好小心咁望向附近既燈柱, 燈柱到底有乜野問題? 到底發生緊乜野事?

LM

迪儀問我有冇勇氣知道真相, 我答唔出。無端端我點解需要知道真相? 我每日活生生過既生活唔通都係假嫁咩? 唔通我需要將我呢三十年黎既認知都否定咩? 我又唔係生活係北韓! 邊有咁多演員扮演市民呀?

我同迪儀分別之後, 因為時候已經唔早, 迪儀只可以搭黨鐵去青衣既「主席碼頭」再搭五星小輪番月娥島。而我就番去位於太古城既屋企。

聽老豆講以前香港既中產屋苑, 即係而家我住緊既太古城都比黃色份子佔據, 果班尊崇資本主義既走狗, 獨佔住社會大部分既資產, 果班黃色份子一直都帶歧視既眼光恥笑警察住係警察宿舍, 即係住公屋。

印象中就係我出世果一年, 即二零二零年, 舊香港警隊正式編入武警, 從此老豆就有出頭天。

課本中提起過, 香港警隊獲正名之後, 政府揮動富中國特色社會主義既偉大鐵鎚, 果斷動用收回土地條例, 將太古城為首既中產住宅區收番, 按警階發配比武警既警官, 用黎多謝武警止暴制亂既成果, 亦標致住黃色份子既衰亡。

聽老豆講當年班黃色份子好妒嫉警隊學歷高、人工高、福利好, 成日妒嫉警察可以入讀毅進課程, 毅進課程聽講即係而家既博士學位。

聽聞當年有首歌叫做「有班警察毅進仔」, 不過我係百度音樂似終都搵唔番呢首歌黎聽, 如果世界上谷歌真係重存在既話, 唔知可唔可以聽得番呢首歌呢?

番到屋企, 今晚好奇怪, 平時屋企部電視機會長開, 一路播住中華翡翠台既節目, 呢個用電視聲送飯、靠電視聲訓教既習慣, 係呢頭家可以話係已經三十年不變。入到門口, 見到老豆好靜咁坐係大廳既梳化度, 佢正用好凌厲既眼神啤住我。

「熊仔, 你頭先去左邊?」

「我? 我同同事去左食飯囉。做乜野事?」

「點解你會去左牛頭角警署? 重要同隻曱甴女一齊? 你係咪傻撚左?」

「你點解會知我去左邊? 你講緊乜野曱甴女? 老豆你做乜野事?」

「頭先武警總部阿李SIR, 打比我話系統偵察到牛頭角有人講起禁語, 之後係監察網絡度偵測到你條鎖匙扣係現場, 而且監控鏡頭重拍到你同曱甴編號1736112號黃迪儀一齊, 你地兩個係鋪頭前面攬埋一舊, 你到底係度做乜撚野?」

老豆青根暴露, 握實拳頭, 我係第一次見到佢咁嬲, 佢既眼神好似想殺左我咁。

「偵察網絡?...你咁耐以黎都可以監視到我既一舉一動?...老豆你係度講緊乜野? 你點解會知道迪儀同我一齊? 點解你要叫佢曱甴? 無錯, 迪儀係黃色份子既下一代, 咁又點樣呀? 黃色份子既罪係上一代已經贖左, 迪儀只係一個普通市民!」

「果班黃色份子, 叫佢地曱甴已經好仁慈! 曱甴死全家! 你知唔知當年班曱甴害到我地幾慘? 我地著住制服行到邊都比人鬧! 班伙計只係扑爆堆曱甴個頭咁小事當發洩下, 點知班曱甴就搞大件事! 寄晒堆影片去外國譴責我地! 我地係有公權力嫁! 法例咁多年黎都賜予我地權力為所欲為! 以前明明我地坐定定係警局都呃到加班費, 班曱甴搞到我地日日大熱天時四圍撲先收得番原本我地就垂手可得既野, 公平咩?!」

「所以我地成班手足, 終於都令班曱甴付出代價! 我地說服政府收晒佢地既屋! 趕晒佢地番去訓坑渠! 我地學習公安建立起完善既監察系統, 捉晒所有反對我地既人去勞改! 如果唔係咁, 你覺得你而家可以過咁和平既生活咩? 阿仔你醒下啦!」

「老豆! 公權力唔係咁樣用嫁! 公權力係由市民授予比你! 唔係比你地為所欲為!」

「熊仔, 你呢班教書佬, 對社會毫無貢獻! 你識乜野呀? 如果頭先唔係李SIR打比我先, 等我有機會壓住件事既話, 你比人拉左去雞姦啦!」

老豆繼續係度長篇大論咁講曱甴, 我好似都聽唔到, 我一直以為老豆係服務人民既英雄, 佢點解好似突然變左做恐怖分子咁? 老豆一直講一直講, 講左好耐佢終於收聲番左房訓。

我坐係梳化上面, 我唔知自己可以點做, 我記番起頭先迪儀問我「你有勇氣知道真相嗎?」, 我拎起手機, 發左個短訊。

「我想知道真相。」 上午01:34 √√

「好, 聽朝九點鐘港珠澳大橋香港口岸見。」 上午01:36

尋晚係床上輾轉反側, 一夜難眠。回想起以前細個, 老豆一直都好放心我自己出街玩, 亦從來無問過我點解咁夜番屋企, 就連我中學拍拖老豆都好快知道, 由細到大我都覺得我既一舉一動, 老豆都莫名地暸如指掌, 今日似乎我開始明白點解。

凌晨時分, 我將由細到大都帶係身既鎖匙扣鎖左入櫃桶, 心情有少少似由雀籠逃出去既雀仔咁。老豆以前成日都將正義掛係口邊, 話自己係銀河唯一保衛地球, 唔通為所欲為將異己剷除就係正義咩?

我拖住好疲累既軀殼黎到香港口岸, 口岸一如以往既繁忙, 住係大灣區唔同城市既同胞, 每日一車一車咁黎到香港市消費, 佢地既每一蚊每一毫都累積起香港市既繁榮穩定, 但到底係繁華購物天堂既背後, 香港發生緊乜野事?

「迪儀我到了, 我在華潤萬家便利店外面。」 上午08:56 √√

十分鐘後, 離遠見到迪儀行緊埋黎, 今日佢扎起左一條馬尾, 一件undersized既白色T恤配上格仔短裙, 雙峰因為T恤既關係凸顯得表露無遺, 造型非常青春。

雖然迪儀距離我重有足足十米, 但我已經感覺到佢身上發出既磁力, 似乎想將我吸埋去, 好彩我老豆算係習武之人, 我既基因成功驅使我既軀殼扎好馬步原地固定好, 迪儀只係成功將我既靈魂吸過去。

「熊主任…你真的準備好知道真相嗎? 如果你真的是一個有良知的人, 知道了後就回不去了。」

「昨天我們在牛頭角見面的事, 武警還是監察到了。但事情暫時被我爸給平息了, 但同時讓我知道了我們的一舉一動, 的而且確是一直都被監控著, 我才發覺我心裡所謂的自由都是虛假的, 我們只是在籠裡自由飛翔的小鳥吧。」

迪儀面有難色, 雙手再次放係胸前, 似乎好擔心被武警追蹤到之後秋後算帳。

「迪儀我們走吧! 但為什麼要去澳門呢? 」

「先走吧! 過關要很長時間的! 到步了再說!」

我跟隨住迪儀行入出入境大堂, 今次係我人生第一次踏出香港市, 聽老豆講佢後生既時候同阿媽去過好多唔同既國家旅行。

但自從由中央新聞裡面知道其他國家出現各種網絡崩潰、經濟崩潰之後, 聽聞外國一直都有戰亂加上政局動盪, 國家為左保障我地既安全, 而家已經全面禁止出國, 所有國際航班都取消晒, 我地已經完全無途徑踏足其他國家。

港珠澳大橋係現時唯一通往澳門既通道, 課本入面提過以前係有高速渡輪往來香港同澳門, 但由於大橋建成初期既使用率偏低, 政府為左提高大橋既使用率, 就強制收回兩間渡輪公司既經營牌照, 港珠澳大橋就變成唯一往來兩地既方法。

聽聞由於大橋建築精美, 被稱為「現化世界七大奇蹟」, 好多人每日都專程黎行幾次大橋, 中華翡翠台上年曾經引述過政府極高層官員透露港珠澳大橋每日既平均車流量高達一億架次, 並指出大橋既知名度排名宇宙第一。

經過了長達五小時既車程、過關、搜身、搜袋、搜電話、度高磅重、照X光、驗血、打指紋、家庭審查、入息審查、信用審查、背景審查呢類最基本既入境程序之後, 我終於踏入澳門市。

咩黎？

傷痕文學？

有料到
用意差唔多但我寫唔出

Lm

推

留名

經過五小時既入境洗禮, 由大橋穿梭巴士落車, 終於都踏足澳門市。澳門比我既第一印象只有兩個字 -「死城」。

由澳門入境口岸門口望出去, 係有一棟棟好高大、建築外型奇怪但明顯已日久失修、了無生氣既大型建築物。而入境大堂外面有一塊好大既空地, 隱約從鋪滿灰塵既指示牌上面見到「賭場巴士專區」幾個大字, 但每個站頭只係掛住一個一個寫上「中止服務」既生鏽鐵牌。

「迪儀…這裡真的是澳門嗎?...真的是那個世界第一大賭城嗎?」

迪儀伸手指住果棟外型似上面一支火把插住下面隻雞蛋既建築物。

「這的確曾經是世界第一大賭城, 不過是二三十年前的事了。你看那棟奇奇怪怪的建築物, 就是以前很有名的新葡京賭場了。」

「迪儀你好像很熟悉這裡, 你經常過來嗎?」

「嗯..我久不久會過來, 因為這裡是我唯一有機會尋找到希望的地方。」

可以係呢度搵到希望? 唔係呱。我地係巴士站等左好耐, 終於都等到一架黨巴載我地去氹仔, 呢架黨巴非常殘舊連空調都無。

沿途經過澳門市中心同友誼大橋, 望到既景象都好似記錄片入面既第三世界國家一樣。街邊大部分商鋪都無營業, 好多市民呆坐係街上面, 絕大部分既大廈同商場都無開燈, 由大門同窗口望入去成棟建築物都係漆黑一片。

「澳門到底發生過什麼事了? 我明明前些日子還看到電視報導說澳門的人均生產總值在黨領導下突破天際了…為什麼會這樣的?」

「熊主任…那些粉飾太平的新聞你還是少看一點吧…你知道二三十年前發生的事嗎? 當時香港政府中斷了所有前往外國的交通, 同時又一下子無法連上外國的互聯網了。澳門也是一樣啊…」

「澳門當時也是突然切斷了所有對外的交通網絡, 同時互聯網也是無法連上任何中國以外的網頁…澳門本來十分依賴亞洲區遊客帶來的博彩收入…一下子就沒有了啊!」

「你應該也知道澳門人大都從事賭業和旅遊業吧? 當時隨之帶來極高的賭場倒閉潮, 導致接近一半的人失業, 當時社會的怨氣導致民間爆發了連場社會衝突…你說得沒錯, 澳門現在的確是第三世界的地區啊!」

「即是一直以來在香港那些關於澳門多麼繁榮的新聞報導…都是假的嗎??」

「熊主任, 你不如猜一下有什麼是真的還比較容易哦!」

黨巴一路駛到湖畔公園就中止服務, 迪儀好似已經習以為常, 一落車已經好有方向咁前進。沿住奧林匹克大馬路一直行, 我地進入左一個住宅區, 區內我地經過一間叫「八佳超市」既鋪頭, 望入去見到店內一片狼藉, 好多貨架都打橫訓係地下, 而貨架入面既商品似乎早已被清空。

迪儀帶我行入屋苑內既一棟住宅大廈, 佢輕輕一推就開左果隻理應有上鎖既大廈閘門, 我見到頭上既門牌寫住「獅子花城二座」。

「迪儀我們正在去哪? 為什麼進來這裡? 這裡好像連電力都沒開通呢!」

「嗯, 電梯已經無法運作了, 我們要走樓梯上去, 你可以吧?」

我們走了六層的樓梯, 我們走到一個住宅單位門前, 我看門號應該是6D室, 但大門上卻貼上了「612」三個數字, 數字下面刻住兩個字「星火」。

lm