[人在江湖]《伙記唔該落單》《二》

閱語殘片 2019-08-17 19:42:17

第十二章「回憶」

十一點左右，我去到太子警署對住嘅酒吧街，開始搵雪寧嘅位置。

「喺邊到呀你....」

我每經過一間酒吧，就望下裡面，睇下有冇雪寧嘅蹤影。

搵咗五六間，終於喺一間酒吧入面見到佢。

雪寧坐咗係間bar嘅梳化位，一個人飲緊酒。

「雪寧。」我行咗埋去。

「呀杰...？你嚟拿...」

「你見點呀。」我坐喺雪寧隔離扶住佢。

「我..我又被仔飛喇...哈哈...」

雪寧拎起杯酒，一口氣灌曬。

「喂..唔好飲喇...」我搶走佢個杯。

「俾返我呀...」雪寧擒咗落我個身到。

「俾...俾返我...」

「俾返我....」

之後，佢就慢慢瞓著咗。

睇住雪寧呢個樣，我有啲羞愧。

佢搞到咁樣，其實我都要負上一部分責任。

雪寧係我中學嗰陣嘅女朋友，本來佢係一個好乖、讀書又叻嘅女仔。

佢咩都遷就我，咩都俾曬我咁濟。

只係性格有少少奇怪。

嗰陣係雪寧同我表白，我見佢幾靚女，又對我幾好咁，就應承咗。

本來都好哋哋。

但有一次俾佢喺條街度見到我同幾個兄弟賣老翻。

喺佢質問之下，佢就發現咗我其實係一個古惑仔。

自從佢知道我嘅身分，就成日話要跟我去玩、去蒲，甚至連我做嘢都跟埋嚟。

雪寧係一個咩都唔識、咩都淨係say yes嘅女仔，成日話要跟我去尖沙咀、旺角。

我點會放心。

所以有一日，我終於忍唔住。

「不如我哋分手啦。」

出嚟行，最忌就係有女人同細路。

但你點同啲女人解釋？佢哋只會覺得係你變咗心，覺得你有第二個。

再唔係，就覺得係佢自己嘅問題。

「梁嘉杰..點解你要咁對我...」

「我係..係咪有咩做得唔好...我改呀！」

嗰陣雪寧喊曬口咁求我，叫我唔好掉低佢一個，但係我最後都係飛咗佢。

你問我有咩感覺，我可以答你我都好心痛。

但係有咩辦法？

分咗手之後，雪寧就開始自暴自棄，周圍溝仔，過咗冇耐，我就入咗男童院。

直到而加，我先見返雪寧。

「對唔住。」我摸一摸佢個頭。

我幫雪寧埋咗單，之後就扶咗佢出去截的士。

「司機，唔該大埔八號花園。」

我冇送佢返去，因為我知去到大埔，雪寧就會自己醒。

雪寧叫我出嚟，其實只係想見下我。

可能你覺得我真係好仆街，咁樣傷害咗一個女仔。

不過，人在江湖，身不由己。

我都唔想。

見到雪寧安全上咗的士，我喺附近食咗枝煙，就去搭紅van返粉嶺。

返到屋企，見到婆婆已經瞓得好冧。

我笑咗笑，就去咗沖涼。

但係唔知點解呢晚，我完全瞓唔著。

或者係見返雪寧，覺得好對唔住佢。

諗返起以前，一齊著住校服，一齊去街市買雪糕食嘅日子，覺得嗰陣真係好開心。

不過，已經返唔到轉頭，係咪？

閱語殘片 2019-08-17 19:48:17

呢個幾好