[三年屯門ROLLER團]之召喚所有熱血ROLLER人

唔知有冇人有興趣踩ROLLER/一直都有踩 只不過以前屯門區搵唔到人踩而迫不得已去其他地方搵人踩呢?

可能以前係咁 但係而家你絕不孤單
我以前都係成日一個人玩 因為完全搵唔到志同道合既人
但係當我每日無間斷都落去玩既時候 開始識到一班踩ROLLER既人
根住我地自己再開左個ROLLER GROUP
一開始只係得小貓三四隻 但係而家係我們大家既努力之下已經不斷壯大
唔同時段 只要唔落雨都搵到人踩 甚至係凌晨都可以搵到人陪你周圍去
所以如果你係住屯門附近 而因為返工/學業或者其他因素覺得出去周圍踩好麻煩既話 歡迎你加入我地

我地係一班業餘而且對ROLLER有熱誠既人
簡單D黎講即係業餘發燒友
每晚係個埸到傾下計 HEA下 周圍踩吹下風 去食下野
所以我地唔會有架子 唔會SELL你地買野 唔會SELL你地入班
只要你肯學 我地肯教
想跑街跑得型?我地教一教 綽綽有餘
花式剎車我敢講如果我地都教你唔到 我諗你真係要返大陸學

係我地個GROUP到既人好多一開始都係新手 我地睇住佢地不斷進步
由一開始只係兩三條友踩街 到而家最多有十六七個人一齊踩
平花 剎車 極限 凈踩街各有人玩
歡迎各種玩法 各種交流

有興趣既係我地既FACEBOOK PAGE PM留低你既電話+點叫你 我會加你入我地既GROUP
https://www.facebook.com/tmrollerskating?ref=hl
希望係真心玩 而唔係當我地個GROUP係5P交友GROUP 呢類人會直接踢
同埋加完唔出黎玩/係咁賣廣告既煩膠一樣會踢

如果你有朋友係住屯門又或者屯門附近
而又自己玩緊/覺得周圍去好煩
希望你可以比呢個POST佢睇 考慮黎唔黎JOIN我地
因為見到最近有D流浪ROLLER友 如果想既話歡迎黎一齊玩
不過想自己一兩個FD玩都冇所謂 如果想JOIN就直接踩入黎啦
想學野我地會教你

如果唔想PM WTS咁MK既話
可以每逢星期五晚9點之後黎屯門公園ROLLER埸搵我地
又或者係街見到有人踩緊ROLLER叫停佢吹水問野

Q: ROLLER係咪有好多種唔同玩法?

A: 無錯 ROLLER除左就咁勁踩之外仲有好多玩法
https://www.youtube.com/watch?v=FEnOPFQlD9A 呢種係Aggressive
https://www.youtube.com/watch?v=CWor7T9NUOE 呢種係花式過樁(Slalom)

https://www.youtube.com/watch?v=7qDqh-wvElc 呢種係花式剎車 (Slide)
https://www.youtube.com/watch?v=cojSRhxA2-4 踩街都可以踩得好型

Q: 如果我想學花式既話應該去邊到?

A: 基本上上面既片簡單既花式我地都可以教到你(例如簡單既平花 踩街既跳轉180度/360度) 所以如果你不求專業 只係業餘興趣間唔中先會玩下既可以JOIN我地 簡單既平花我地都有幾個人練緊 我自己本身玩開剎車不過練到悶悶地都開始練平花 有興趣可以黎一齊學或者高手黎指教下我地呢班新人

剎車方面因為香港冇咩人玩 而小弟亦都好不幸既鐘意玩呢樣野 所以都好努力學緊 如果搵唔到人教你既話歡迎黎搵我教你 或者另外約個時間出黎一齊交流下 剎車方面如果我地都教你唔到你就要返大陸學了


Q: 玩ROLLER危唔危險架?

A: 其他唔危險 只要你戴足護具( 護手 護膝 護肘) 如果你仲係驚死既可以戴埋頭盔同籃球果種防跌褲 咁樣你想傷都難

Q: 如果有時我想自己玩既話應該如何入手?

A: 呢段鬼佬片有齊哂咁多基本野 https://www.youtube.com/watch?v=L8Gs_eyIPFA 如果你黎問既話我地可以親自示範比你睇同直接教你

Q: ROLLER係咪廢青夜青先會玩?因為比我既印象唔太好

A: 我地有D人會食煙 講粗口 但係人品唔會差得去邊 各行各業既人都有
有裝修佬 文員仔 打政府工既人 炒散 中學生 大學生等等 或者我地唔係返咩專業既工 但係對於一樣業餘既興趣黎講呢樣野我覺得唔太重要

Q: 踩ROLLER係咪冇可能係街到踩既呢?

A: 絕對踩到 正如上面條片一樣 我地有時候都會周圍街 不過有D技巧一定要學 例如T剎 轉彎等等 令到你同埋其他行人可以安全D
雖然香港又窄又多人 但係我地主要係夜晚踩 所以人都唔會多得去邊

Q: 你地會唔會好小圈子?又或者排斥其他人?

A: 如果你係肯踩肯學就一定可以融入到我地 如果少出聲果D我地都會盡量去R下水吹 只不過我自己係真毒向左走向右走 所以有時都唔係好敢去R水吹

如果有興趣既歡迎所有人黎一齊玩 我地每個星期五晚都會有聚會 我通常都會去練SLIDE 都有人練平花 歡迎你黎一齊

當然如果係存心挑機既人 我地亦都會以牙還牙 例如有時我同其他人都會出維園/長沙灣同其他人交流下剎車技術咁 順手指導下佢地D動作應該點做

有其他關於ROLLER方面既問題都可以係到問 我會盡量答你
有興趣一齊既就PM我你既電話
唔想比電話可以直接星期五晚一齊黎玩

Q: 如果我要買鞋應該去邊到?

A: 係淘寶買最平四五百就有交易 鞋碼方面好少會比錯 最多只會錯色
如果你唔放心就可以係pro skate買 因為可以試鞋 岩心水先買
最後都係睇你自己點簡

我地自己既PAGE: https://www.facebook.com/tmrollerskating?ref=hl
第一條宣傳片: https://www.youtube.com/watch?v=6SpoQujOZHg

落手落腳拍比起想像中難好多 所以有好多改善既空間
不過我地會努力 應該係呢年會再拍多一條

自家出品既中級剎車片

https://www.youtube.com/watch?v=t1C_wx1TiTk C級 花式剎車-Savanna

https://www.youtube.com/watch?v=ue18Dcxsjk0 C級 花式剎車-Acid Toe Wheeling

https://www.youtube.com/watch?v=hKNM3J7hy6Q B級 花式剎車-Toe Toe Unity

https://www.youtube.com/watch?v=b9cTI9_2umY A級 花式剎車-Toe Toe Cross Parallel

https://www.youtube.com/watch?v=8TTVgobKYQk B級 花式剎車-Back Slide

https://www.youtube.com/watch?v=MaURt59TmNs A級 花式剎車-變態恩歲

https://www.youtube.com/watch?v=rI69dqKTGWk B級 花式剎車-UFO

https://www.youtube.com/watch?v=mye2IyUoQI8 輕鬆片

都係d剎程普通既花式 之前去左維園roller埸玩興起拍左幾段
之後會再拍多d

有咩問題PM問又得 呢到問又得 係PAGE PM我地都得 (想睇本土出產既剎車片可以留名叫我地試一試 不過有好多都唔得 因為我地唔識 來來去去都係果幾招扮叉燒仔)
CD ROM可以係FB PAGE到PM

最近大家技術進步左 所以籌備緊一條全新既宣傳片
https://youtu.be/atxDOKSQPbM
https://youtu.be/XaDRqTtPGHE
以上係其中幾條試緊既SHOT 不過仲未係拍到最滿意
會再去唔同地方 係唔同時段取景
呢條宣傳片既質素唔係我地第一條果個Seven下Seven下既可以相比
亦都唔係平時上YOUTUBE睇到香港本土出品果種是但係街扭幾下扮專業既踩街片
而係一條集平花 剎車 極限 高速跑街既宣傳片
如果仲有D無家可歸既隱世高手
可以加入我地一齊拍好呢段片 一齊玩下

https://www.facebook.com/tmrollerskating/photos/a.486149951548248.1073741827.485089468320963/741414032688504/?type=3&theater
https://www.facebook.com/tmrollerskating/photos/a.486149951548248.1073741827.485089468320963/739707266192514/?type=3&theater

最近我地亦都同救世軍同某間中學合作搞左D ROLLER DAY做推廣
主要係想搵多D人一齊踩 推廣呢樣運動
希望抱住包容多元既心態係屯門立足 再推廣出去
令香港可以有更多人一齊踩ROLLER 而唔係好似以前咁既小圈子圍威喂

如果你係某D組織既人 又想搵我地搞下D興趣班 訓練班 活動果D 都可以係PAGE到PM我地傾下 如果有人得閒都可以做義教 但唔次數唔會太頻密 始終我地都有正職要做

無論你幾歲都好 係男係女都好 小學畢業定碩士畢業都好
只要有心學
我地就會窮盡心血 張教到既一切教哂比你
This is TM Roller Skating

TM Roller Skating

其實難唔難學

利申 平衡感好差

其實難唔難學

利申 平衡感好差

睇你目標係咩
想鬆踩街跑街 一個月內已經ok
好多人學唔好係因為對鞋太鬆 令到你對腳向內拗所以平衡唔到 出面d溜冰鞋就係咁 但只要有對fit既鞋就可以解決呢個問題 而解決問題既方法就係淘對兩三百蚊既鞋
花式想玩得好就要浸返兩三年

諗番起細個成日踩

諗番起細個成日踩

一齊玩返啦