瞓唔著又推⋯⋯成日都有巴絲問福岡有乜壽司好食,今次就介紹壽司omakase啦!!!
以下資料有錯請指正。
北九州四縣當中就要數到福岡比較多好食嘅壽司,大致上可以分為兩派:九州前同江戶前。
簡單嚟講九州前就係比較多用唔經熟成嘅魚;江戶前——即係東京食得到嗰類——就相反,例如平時食嘅拖羅(鮪魚腩)多數經過熟成步驟令魚味更突出。
九州前最出名就係
天壽司京町店(即係二代天壽司兩兄弟之中細佬嗰間),跟住就到曾經喺初代天壽司修業然後開舖嘅
もり田同埋森田徒弟
寿司つばさ。
所以呢幾間都有個共通點:魷魚壽司𠝹花𠝹得好靚同上面加啲魚子。
至於味道就見仁見智,上述三間之中個人淨係去過天壽司京町店,評論唔到。
江戶前就多喇,名店出身嘅都唔少,例如一四年就拎到米芝蓮三星嘅
鮨行天,曾經喺東京名店あら輝修行。
福岡高玉壽司都唔弱,出咗三位壽司職人:喺東京名店海味修行,之後獨立返福岡開舖嘅
鮨さかい、留喺東京嘅鮨天本;仲有浸過鹹水嘅菊壽司二代(即係
菊鮨)。菊鮨午市omakase現價印象中未計酒水係六千~七千円,早兩年五千円價位嗰時堪稱全日本最抵𨳒嘅午市omakase,唔知依家仲係咪。
喺きよ田新津年代修行過跟住開舖嘅,分別有唐津
鮨処つく田同博多
安春計。(而我不知點解後者喺食べログ咁低分)
雖然
近松唔係關東名店出身,但傳說係福岡市內最好味嗰幾間之中價錢最相宜嘅。呢間訂位難度好高,可以暫時略過。
仲有好多其他流派嘅,例如
やま中同求其數都數到半打嘅徒弟店,魷魚壽司又係𠝹花咁款,不過用黑醋壽司飯⋯⋯嘴刁又畀得起錢的話考慮上面九州前同江戶前嗰啲就得。另外仲有啲可能係hidden gem,要留待各位有興趣嘅巴絲發掘下。