為左一千蚊，成班港豬幫建制做PTGF

(以上故事純屬虛構，如有雷同實屬香港不幸)

如果要為香港既未來定一個價錢，你認為值幾錢﹖

對於呢條問題，一千個人都有一千個睇法，但我深信每樣野都有一個價錢，就算係自由、民主、專制、獨裁都係一樣。

只係，我唔敢想像香港只係值一千蚊，但偏偏為數不少既香港人為左呢一千蚊而做PTGF。

講緊既並唔係幫幻彩詠香江、全港運動會或者建制派造勢既PTGF，而係關乎香港未來既示威大會。

如果PTGF因為對法律既不了解而收錢支持政府，就係香港既悲哀，係資訊發達既年代竟然仲有一大班愚民﹔如果PTGF係因為事不關己而為利益出賣香港，就係佢地父母既悲哀。

養不教，父之過。

PART TIME GIRL FRIEND憑自己既肉體去賺錢，極其量係出賣自己，但PART TIME GOVERNMENT FANS係出賣香港人既未來去賺錢，如果道德撚要對PART TIME GIRL FRIEND口誅筆伐，咁就請你地企係高地到屌到PART TIME GOVERNMENT FANS體無完膚。

「我好高興再次見證港人萬眾一心，反惡法齊上街。但遊行過後，你地必須問自己一條問題，當政府對大家既聲音充耳不聞，我地又可以點做﹖」白衣人企係炮台山地鐵站既入口，拎住大聲公叫喊。

「三十年以黎，我地仲停留係上唔上街表達訴求，絕少思考下一步既行動，各位要記住，面對霸王硬上弓既當權者，如果仲停留係制度之內抗爭，勝利既機會微乎其微!」

遊行人士依舊繼續前進，異口同聲叫喊「反送中，保香港!」「柒柒柒落台!」似乎對白衣人的呼籲不感興趣。

「大家試諗下，就好似捉象棋時，對手可以飛象過河，馬可以橫衝直撞，連士兵都可以退後，你點捉﹖唔通你可以用愛與和平感化佢地遵守遊戲規則﹖人地要贏而唔係要公平!」

「各位，請思考下一步要點做，搵一班志同道合既朋友，走一條自己認為岩既路!香港加油，天佑香港!」

白衣人講完後，縱使只有零星群眾拍手叫好，但佢既心思總算冇白費到。 

人，如果怕徒勞無功而唔做，咁社會就永永遠遠唔會被改變，相反，只要改變到一個人，社會已經踏出改變既第一步。

為左了解PTGF既心態，我決定親身加入佢地既行列。

進入佢地既內心世界，遠遠比帶佢地走出去容易。

成為PTGF本質上同成為反動派一樣，大家既作用都係鞏固政權，前者為利益盲目支持政權，後者被前者盲目反對，成為凝聚群眾，鞏固政權既工具。

買張太空卡，按照FACEBOOK既貼文聯絡相關人士，按既定時間穿著指定服飾集合，PTGF既指定服飾係藍色，口號「保公義，要修例」。

基本上記住以上兩點，然後跟住蛇頭行就能夠輕鬆完成任務。

「你知唔知今日搞咩﹖」我走近幾位中學生，壓低聲線問道。中學生以警惕既眼神望住我，然後繼續低頭玩「傳說對決」，視我如透明人一樣。

「一千蚊夠你課幾多次金﹖」我轉換另一句開場白。

「睇你一次課幾多，都唔係一個小數目黎。」學生甲趁住開場前既時間答道。

「但今次課得特別爽，出黎行下街就袋成千蚊，仲包埋飯盒，呢d咁既荀工係邊到搵﹖」

「冇錯，平時番M記得40蚊一粒鐘，仲要係囡囡面前被經理當狗咁呼呼喝喝，難得今日有份荀工，點都要出黎搵番筆。」學生乙摘下耳機，關掉遊戲。

「你地到底知唔知依家做緊咩野﹖」我開始對呢班未來既社會棟樑唔耐煩。

「番工囉!問黎都多餘。唔通你唔係咩﹖」

可悲，全球教育水平名列前茅既地區竟然教育出呢班功利至上既學生，到底係香港過去既教育制度同社會脫節，定係短短二十二年已經令港英既教育制度被蠶食殆盡﹖

一切以功利為先，遲下可能要向老師送禮先有得番學。

「如果有人比十萬你殺人，你會唔會做﹖反正都係一份工作。」錢係重要，但道德更重要。

當生命受到威脅時，道德理應退居其次，但係當生命冇受威脅，道理就永永遠遠要置於首位，所謂人禽之別，正是如此。

幾個學生四目交投，佢地從未思考自己既行為仲嚴重過殺人。

「殺人犯法喎。」

「今日企得出黎支持政權既人，都係斷送緊香港既未來，你地一殺就殺左七百萬人，你覺得嚴唔嚴重﹖」

「我地都冇犯法，新聞都話條例係好野黎，協助社會維持治安，令香港成為全球最安全既城市，避免淪為逃犯天堂。」學生甲將教科書既內容同埋新聞既內容一字不漏地引述。

教育同傳媒兩大機構淪為政權工具，學生又豈能清楚了解真相?

更常見係對真相毫不了解，因為隱藏遠遠比捏造真相容易。

所以政權往往禁止討論六四，多於到處宣揚經國家粉飾後既「真相」。

再配合通識科洗腦教育，對香港以外既地方批判思考，對土生土長既社區只略為提及選舉，泛民，學生難免有種知識同實際生活割裂既感覺。

立法會知黎有咩用?哦，咪為左考試囉。

當學生被洗腦，問題唔再單止停留於利益之上，而係在於佢地既思想，而呢種思想極可以牢牢烙印係佢地身上，影響往後人生。

正如一次錯過會產生更多次既錯過，一次走歪會令人生走上更多條歪路，難以重回正軌。

或者，我應該用有限既時間用最簡單既方法游說佢地。

「你試諗下，屋企人或者老師有冇試過講大話呃你﹖」

「細個既時候，阿媽話幫我草住d利是錢，到最後又冇左回事。」

「老師成日話再嘈就留堂，但佢一次都冇留到。」同學丙沾沾自喜，細細個就識得利用人既善良去搵著數。

「出到黎做野，冇咩人會比機會你。」講完呢句，我腦海不自覺回想起最近既新聞，有位年青人冇啦啦被人向頭部開左槍，情況危殆。

當你離開溫室後，意想不到既危機會從四方八面一擁而至，唔係我地意識不足，而係世界太過險惡。

「老師成日話唔聽話就冇得升班，最尾咪又係合格都升到。」

「就連屋企人同老師講既野都唔係百分之百可信，咁點解你地會盲目相信一個冇同佢親身接觸過既女人﹖佢反悔，你吹得佢漲﹖」

當權者打賭市民既懦弱能戰勝心中既怒火，終究敢怒不敢言。

邊個在意市民內心感受﹖政權所關心乃市民既行為，只要行為好似溫馴既綿羊，就算內心如同兇猛既獅子，都政權都係毫無威脅。

「有錢收咪得，讀咁多書都係想搵錢姐。搵份舒舒服服既工，背後意思咪姐係搵份輕鬆逗人工既工，難得依家有成千蚊飛埋黎，唔要果個就真係傻仔。」中學生結伴離開，始終冇回應過我既問題。

人傾向想聽自己想知道既事，對於自己冇興趣知既，佢地傾向充耳不聞，當無呢回事發生。

我唔怪佢地，要怪就怪現今既教育制度同家長。

雖然，我只係見到佢地幾個人既背影，但佢地討論喜茶、海底撈、傳說對決同埋陳鈺琪既聲線深深刺進我既腦海。

其他遊行人士視佢地如無物，可能係因為佢地所講既說話就好似自己既日常生活一樣平平無奇。

喜茶既意義並唔係一杯茶咁簡單，背後反映香港人已經漸漸被同化，到最後只會失去自己既特點。

外國人講香港就會諗起「點心」、「奶茶」同「蛋撻」﹔我地講日本就會諗起「刺身」、「綠茶」，食物已經成為代表地區的東西。

如果將一切事物與本質及含義割裂，我地就好似動物一樣，食野係為左醫肚餓，完全唔需要思考，實枉為萬物之主。

反惡法既年青人能夠擔起大旗，企係所謂社會中產階級之前為香港人爭取權益，另一邊廂，為數不少既年青人都加入建制陣營，大叫口號鼓動群眾。

五十年前有毛主席既紅衛兵，五十年後有林縣長既藍衛兵，對於一切反動份子既打擊係不遺餘力。

佢地今日企出黎唔係為左一千幾百，背後有更遠大既目標。

看台上既年青人揮灑汗水，聲嘶力竭地帶領遊行人士喊口號。係佢地既眼神之中，我見到一團火，一團渴望得到權力同金錢既慾火。

我深信最後慾火會將呢班人既良心燃燒成灰燼，徹頭徹尾變成一個投機愛國主義者。

「保公義，要修例!」身穿藍色polo既年青人目測20幾歲，但佢既交際手碗完全唔似一個岩岩畢業既大學生，而係似一個已經縱橫社會十幾年既社交老手。

由佢落台到行埋黎我身邊，足足有五個人先後同佢握手互相問候，呢個人係建制派應該有番咁上下地位。

握手既次數最能反映一個人既社交網絡，係現實社會之中，如果冇任何利用價值，冇人會浪費一分鐘時間同你寒暄幾句。

寒暄幾句既目的唔係要一分鐘之內從對方身上得到咩即時好處，而係要向對方展示自己有利用價值，大家有需要時可以互相利用，互惠互利。

當呢位建制年青人行埋黎我身邊果刻，我不斷思考自身有咩地方值得比佢利用。

「你係……阿樂﹖」佢向我揮手，語帶遲疑。

充斥建制既場合竟然遇到認識我既人，就好似政府既神秘之眼原本一直都偷偷監視著我一樣。

冇理由既，我只係區區一個獨立記者，平時都係寫開芝士海膽拉絲或者隱世郊外秘境，雖然算唔上順民但都唔係逆民，點解建制派會識得我?

睇佢笑到四萬咁口，我仲驚。所謂笑騎騎就放毒蛇。

推

push

故事將於林奠撤法後完結

「你認錯人。」

「你把聲化左灰都認得，衰仔!」佢一手拍落我膊頭，呢一個動作令我認出佢係邊個。

陳永信，我既大學同學。

「陳永信?真係估唔到係呢到撞番你，睇黎你撈得唔錯喎。」

「做區議員為街坊服務姐，我地要對選民負責。」阿信虛偽既笑容其實係想我讚下佢咁後生已經做到區議員。

作為建制區議員，又有何值得驕傲?
 
「向老人院負責?」
 
「無論係邊個，我都會盡心盡力為佢地服務。」陳永信嘴角微微上揚，好似電視劇入面做緊衣冠禽獸既郭晉安。

「係呢，以前讀U你都係反政府，估唔到今時今日你會搖身一變加入建制派。」

陳永信以前係大學學生會副主席，我仲好記得佢係校門前派傳單叫口號，大叫香港落實真普選同埋反對國教果股激情。

佢既轉變，令我難以置信。到底佢要經歷過咩事先會有咁大既改變?

定還是佢由一開始已經係投機主義者，只係我地既觀察力太差，又或佢既掩飾力太好。

呢個永遠都係一個謎，因為建制派既人從來唔會同你講真話，只會帶你遊花園。

唯有利益，先至係真心。

「阿樂，以前既我仲後生，根本唔明白何謂政治，何謂民主，當我慢慢成長，我先真正明白特區政府既苦心，國家對一國兩制既重視，我希望有生之年可以減少社會撕裂，令社會明白祖國既強大。」

陳永信冇眨眼，佢已經練成講大話唔眨眼既技倆。

一招年少無知，接著係祖國偉大，先破後立，黎個釜底抽薪，將過去既自己打得體無完膚，睇怕佢應該都係師承三姓家奴。

「嗯。」係呢一刻，我真係唔知比咩反應佢。

「阿樂，我相信你都明白政府既苦心。好多謝你今日黎支持修例。」陳永信拍拍我既膊頭。

佢係大學時期經常咁樣拍我膊頭，但呢一刻就連呢個動作都令我好陌生而且感到心寒。

佢嘴角又再一次不自然咁上揚，可以估計到佢知道我黎遊行既目的係為錢，因為佢加入建制都為為權，大家都係利益至上。

「祝你係建制派平步青雲。」我連掂都唔想掂佢。

「平步青雲唔重要，我既心始終係向著香港市民，最緊要係能夠服務佢地，令社會變得更美好。」

其實冇左你地，香港就會更美好。