大家今日都扛上左一場硬仗,辛苦晒!但眼見明明今日肯支持既人咁多,都係冇辨法發揮人多既優勢覺得好可惜。我見到今日既佈署同安排都好分散,大家都好迷惘,想幫手但唔知點幫,好想檢討下點解會咁。亦都想召集一班人幫手再組織一下。
1. 計劃混亂
我地好似冇一個好清晰既計劃點樣阻止今次既會議,結果我見到既係好多人今朝真係喺草地開晒墊咁,休閒到好似野餐咁。我諗呢一班人其實係唔知可以去邊,先留係到。
當有人大叫去阻馬路先去阻,但阻邊條先啱,好多人都唔知,懵懵下比人叫去邊就去邊。
你可能話「車,你自己識睇邊到需要人啦?」但真係唔好expect每個都做足功課過黎,其實大家都一直等指令。
2. 物資準備不足
我地輕視左裝備既重要性,中途真係好需要前線既保護裝備,加上警察直接收起物資,只能中間靠大家不斷添購。(希望可以的話唔好幫襯連鎖店,再比大財團賺錢!)頭盔好缺乏,警棍真係會打頭架!仲有眼罩同保鮮紙都可以防下催淚彈。藥物、急救用品(尤其哮喘藥)!大家得閒都幫手運送物資上前線!
3. 冇Leader、指令混亂
大約8點幾既時候,就決定塞添華道、龍和道等等路線,條龍好塞,但前面既人又唔行。喺呢個時候,好多人叫上面既人「落嚟啦!x你,淨係喺上面冇用!xxxx!」我喺側邊心諗,未開戰先內訌?呢個唔係應用既落指令既態度。後來有人開始解釋點解要落黎,因為想塞住議員既車,唔比佢地開會,先多左人落黎。其實我地需要既唔單只係落指令,都要幫手解釋比人聽,點解要咁樣做。
4. 欠清晰指揮
站台既人明明有大聲公,但台下既人根本聽唔明,想指揮既人可唔可以組織得好少少先開咪講。全日就係咁聽到「警犬係我地後面黎緊啦,大家向個邊走!」心諗,邊到叫「後面」,邊到叫「個邊」,唔望都唔知係右邊……
仲有,如果拎大聲公既,唔該一個msg向住唔同方向重覆下,因為淨係向住前面講,後面既人唔會聽得清楚。
5. 目標唔明確
同佔中一樣,冇啦啦會叫林鄭落台。今次我地既目的係反逃犯條例,希望唔好比其他野模糊焦點!今日見到有人好好心咁整左個牌,「送中二人組」仲帶動大家講「x你老母」香港人好得意,有得爆粗就成個小朋友咁咁開心,但係又晒力氣,其實不如叫d有用既字句關於條例既仲好啦。
6. 前線人員嚴重不足
我睇到好心up,因為願意走上前線既人唔多,但願意緊貼前線人員既人都唔多,已經唔係要大家直接面對警察,但想大家貼上去support前線,唔好扔低前線都幾十個係前面同全副武裝既人對抗得唔得……如果一直係好後面既市民,諗清楚,如果你黎到只係係後面參與既話,咁冇乜意義……至少幫手傳物資,support 前線。更加唔知點講死都匿喺中信又唔出黎既人,嘆冷氣好開心?你今日黎係做乜?打卡?知唔知前線既人真係搵命搏,冇冷氣架……
7. 冷靜d,唔好亂咁衝
有d人自以為搞笑係咁傳垃圾桶、大型盆栽去前線,其實用唔著,都唔好係咁破壞公物,比個藉口人地拉你。唔好專登去挑釁警察,警察全副武裝架,幾個人貪得意挑釁完既結果,係幾萬人、幾十萬人係現場一齊承擔。
8.資訊唔流通
前面人群聽完既資訊,成日都唔傳去後方 仲有,知道咗係fake news的話,一係用air drop 一係口傳,同大家講「會議唔係取消,會議係延遲!」唔好比d人以為任務完成就走人。希望大家可以互相講下資訊,邊到要支援,邊到有危險之類!
對唔住大家,我今朝嚟既時候都冇做足功課,一心打算跟大隊,但我今日發現我地好分散,冇人行出黎幫手帶,真心希望有領導能力既人行出黎幫下手!亦都希望各崗位既人注意一下!