召喚所有想踩ROLLER既屯門/天水圍/元朗人(2019年仲踩緊)

唔知有冇人有興趣踩ROLLER/一直都有踩 只不過以前屯門區搵唔到人踩而迫不得已去其他地方搵人踩呢?

可能以前係咁 但係而家你絕不孤單
我以前都係成日一個人玩 因為完全搵唔到志同道合既人
但係當我每日無間斷都落去玩既時候 開始識到一班踩ROLLER既人
所以如果你係住屯門附近 而因為返工/學業或者其他因素覺得出去周圍踩好麻煩既話 歡迎你加入我地

有興趣既係我地既FACEBOOK PAGE PM留低你既電話+點叫你 我會加你入我地既GROUP
https://www.facebook.com/tmrollerskating?ref=hl
希望係真心玩 而唔係當我地個GROUP係5P交友GROUP 呢類人會直接踢

如果你有朋友係住屯門又或者屯門附近
而又自己玩緊/覺得周圍去好煩
希望你可以比呢個POST佢睇 考慮黎唔黎JOIN我地
因為見到最近有D流浪ROLLER友 如果想既話歡迎黎一齊玩
不過想自己一兩個FD玩都冇所謂 如果想JOIN就直接踩入黎啦
想學野我地會教你
只要你肯學 我地肯教

如果唔想PM WTS咁MK既話
可以每逢星期五晚9點之後黎屯門公園ROLLER埸搵我地
又或者係街見到有人踩緊ROLLER叫停佢吹水問野

屯門ROLLER埸會係2019年4月30號開返 (如無意外)
到時星期五晚會繼續瘋狂踩ROLLER

Q: ROLLER係咪有好多種唔同玩法?

A: 無錯 ROLLER除左就咁勁踩之外仲有好多玩法

https://www.youtube.com/watch?v=FEnOPFQlD9A 呢種係Aggressive

https://www.youtube.com/watch?v=2NKFROW45Io 呢種係花式過樁(Slalom)

https://www.youtube.com/watch?v=7qDqh-wvElc 呢種係花式剎車 (Slide)

https://www.youtube.com/watch?v=cojSRhxA2-4 踩街都可以踩得好型

Q: 如果我想學花式既話應該去邊到?

A: 基本上上面既片簡單既花式我地都可以教到你(例如簡單既平花同剎車 踩街既跳轉180度/360度)

Q: 玩ROLLER危唔危險架?

A: 唔危險 只要你戴足護具( 護手 護膝 護肘) 如果你仲係驚死既可以戴埋頭盔同籃球果種防跌褲 咁樣你想傷都難

Q: 如果有時我想自己玩既話應該如何入手?

A: 呢段鬼佬片有齊哂咁多基本野
https://www.youtube.com/watch?v=L8Gs_eyIPFA 如果你黎問既話我地可以親自示範比你睇同直接教你

Q: ROLLER係咪廢青夜青先會玩?因為比我既印象唔太好

A: 我地有D人會食煙 講粗口 但係人品唔會差得去邊 各行各業既人都有
有裝修佬 文員仔 打政府工既人 炒散 中學生 大學生等等 或者我地唔係返咩專業既工 但係對於一樣業餘既興趣黎講呢樣野我覺得唔太重要

Q: 踩ROLLER係咪冇可能係街到踩既呢?

A: 絕對踩到 正如上面條片一樣 我地有時候都會周圍街 不過有D技巧一定要學 例如T剎 轉彎等等 令到你同埋其他行人可以安全D
雖然香港又窄又多人 但係我地主要係夜晚踩 所以人都唔會多得去邊

Q: 你地會唔會好小圈子?又或者排斥其他人?

A: 如果你係肯踩肯學就一定可以融入到我地 如果少出聲果D我地都會盡量去R下水吹 只不過我自己係真毒向左走向右走 所以有時都唔係好敢去R水吹

有其他關於ROLLER方面既問題都可以係到問 我會盡量答你
有興趣一齊既就PM我你既電話
唔想比電話可以直接星期五晚一齊黎玩

Q: 如果我要買鞋應該去邊到?

A: 係淘寶買最平四五百就有交易 鞋碼方面好少會比錯 最多只會錯色
如果你唔放心就可以係長沙灣pro skate買 因為可以試鞋 岩心水先買
最後都係睇你自己點簡

配件篇:

希望係呢到可以釋除普遍既疑惑 又或者係常見既配件問題

1: 一開始玩洗唔洗買到好貴好專業?

通常你係香港買相關既配件 D人可能會SELL貴野比你 常見既係幾十蚊 甚至過百蚊既碌 又或者係幾十蚊既BEARING (軸承) 又或者係千幾二千蚊既新手入門鞋等等

但係買呢一系列既配件之前 你首先要分清楚到底你係已經肯定左自己會長玩落去+會係邊方面發展 定係新手入門毫無認知就入去比人SELL

大部份既配件都分成平花(花式繞樁) 剎車(花式剎車) 極限(AGGRESSIVE) 同埋FREESTYLE SKATE 四種 每一種都有佢地專用既配件 平花同極限我認識唔多唔敢講 但剎車黎講 如果你用剎車專用碌 (舊既熊貓眼 斯凱汀 海賊王 青花 新既無解輪 星辰 九輪四化)同普通無牌子既輪或者係平花/踩街碌 已經好大分別 又例如你踩街用普通碌 同好專業既馬達輪 又係完全唔同既感覺 又例如用HV/S4/TRIX呢類TOP MODEL既鞋 同用一對普通平價硬膠鞋又係完全唔同既享受

所以係買野之前 你首先要分清自己係邊類人 但基本上你唔係想玩到代表香港比賽級數 只係想輕鬆踩下/玩下/型下 係唔需要買到好貴既配件 例如踩街用SEBA綠蓋啤零/陶瓷啤零 加對普通TOP MODEL既鞋 例如TRIX 已經可以踩到好快 (屯門公園去兆康西鐵站五分鐘左右) 又例如剎車 用0.5蚊人仔既啤零加一粒8蚊人仔既碌 同一對價值1000人仔左右既12/13年HV係大陸大學/廣埸既石地A/B級剎四五米起跳 (主要係識人以前大陸玩 呢D平價貨式正正就係佢地標準裝備)

之後會介紹返我地自己通常會淘咩碌/啤零 邊間淘 有咩需要注意

2: 買鞋買配件篇簡介

新手黎講 強烈建議你淘一對最平既鞋落黎玩 大約200-600人仔左右 等你試岩左 決定真係玩落去既話 再換其他好小小既鞋 如果你想又平又有牌子穩陣小小 常見既通常都係米高/飛鷹/意大利既ROLLERBLADE等等 通常都係200-500人仔 睇岩之後可以再睇下佢會附送乜野 通常會送一套護具+六角匙+潤滑油+一套樁等等既小配件 所以基本上你淘一對鞋 已經齊哂你前期新手所需 唔洗煩太多 如果唔想淘 正如上面講既 都可以去PRO SKATE買鞋 質素保證

至於啤零 碌 刀架呢類配件新玩既人就唔洗諗太多 因為淘得落黎既野已經可以解決你所有基本需要 但你玩落又未想換鞋 想換下其他配件既話 之後會再同你介紹小小

2.1: 淘寶店

老A輪滑: https://shop33090763.world.taobao.com/shop/view_shop.htm
柚子輪滑: https://yoyoskate.taobao.com/

兩間都係多年老鋪 信心保證 仲有凍魚輪滑等等 不過有時都有甩漏 有次訂左火花碌 老A就寄左普通碌比我 不過咁多年我地大大話話淘過幾十對鞋 只要你肯定自己鞋碼 就唔會中伏

2.2 鞋:

通常新手買鞋我地都會建議買細一個碼 但有時會聽人講買大一個碼
睇到呢到你可能想會問有咩分別

大一個碼可以令你前期非常舒服
因為一對好既ROLLER鞋通常都係好窄 著左落腳就唔會有好多郁動既空間 亦都係咁一開始玩果陣隻腳會好痛 為左避免呢個問題 外面既人會教你買大一個碼 但隨之而黎既係另一個更嚴重既問題 就係會好快著到鬆哂 踩得更加唔舒服

你要知道既係 一個專業小小既ROLLER友 或者玩耐小小既人 通常都會買細1-2個碼既鞋 之後再慢慢撐開佢 的確一開始會好辛苦 例如撐大一隻細一碼既HV 每隔幾個字就痛到要除低休息 但係只要捱過頭1-2星期 你就會發覺對鞋完全貼住你隻腳 FIT到爆 踩都踩得更加爽皮

買大一個碼係會令你一開始好舒服 但亦都代表你好快就要準備換對新鞋 呢到又唔知幾錢了

所以我地一向建議新手先買細一個碼 再慢慢撐 痛一痛 就可以慳多一筆錢 又可以有一對更貼腳舒服既鞋

之後會介紹返有咩鞋值得買

平價新手鞋: https://world.taobao.com/item/19673287115.htm?fromSite=main&spm=a1z10.5-c-s.w4002-16607330167.68.41f58d4cjL6pI6
200蚊人仔係好平既鞋 我地有唔少人試過 新手玩係冇問題 但同樣地你需要考慮既係點解呢種鞋會賣到咁平 平野舒適度/耐玩度唔會高 呢樣係你需要考慮既野

https://world.taobao.com/item/17242235445.htm?fromSite=main&spm=a1z10.5-c-s.w4002-16607330167.51.41f58d4cy0gdUJ
又例如呢對380人仔 多少少顏色選擇 價錢亦都比較合理

https://world.taobao.com/item/522040652827.htm?fromSite=main&spm=a1z10.5-c-s.w4002-16607330167.63.41f58d4cc7zOjA
FR1 比較出名既FSK鞋

但基本上只要平+隻款你OK就足夠

TOP MODEL:

全能鞋HV: https://world.taobao.com/item/44815524299.htm?fromSite=main&spm=a1z10.5-c-s.w4002-16607330167.63.41f58d4cy0gdUJ
HV基本上可以玩哂剎車+平花+踩街 係一款好全能既TOP MODEL 視符新舊由1200-1600左右人仔起跳 但新版定舊版最大分別基本上係顏色唔同 實際上有冇我未試過咁多款唔敢講 我自己就用緊13年HV 但因為對鞋比較重 玩平花其實唔係最適合

平花專用鞋KSJ:
https://world.taobao.com/item/548659653534.htm?fromSite=main&spm=a1z10.5-c-s.w4002-16607330167.41.41f58d4cy0gdUJ
KSJ繼SEBA之後平花玩到癲左既人 所以之後呢款鞋以佢命名 係平花黎講最TOP既其中一款鞋 夠輕 夠型 夠穩陣

平花專用鞋 S4:

https://world.taobao.com/item/5255310399.htm?fromSite=main&spm=a1z10.5-c-s.w4002-16607330167.35.41f58d4cxwGyny
都係咁上下 唔講太多

極限鞋CJ:
https://world.taobao.com/item/521918965626.htm?fromSite=main&spm=a1z10.3-c-s.w4002-16607330111.9.6f79c998okpRXu

自己未著過冇咩評價 但我地有兩個人買過 佢地話幾好著 不過呢款都係好出名既極限鞋

基本上呢D TOP MODEL會愈出愈多 例如有好出名既勁人嬴比賽 好快就會有新既訂造鞋 例如YJS 黃海洋等等 所以只要睇岩心水就OK了

2.3: 碌

睇碌之前需要注意既野係軟/硬之分
每粒碌上面除左寫幾大 例如76MM/80MM
仲另外一組數字 就係83A/85A/87A/90A等等
呢一組數字代表碌既硬度 83A比較軟 90A比較硬
最專業既人會覺得軟硬碌踩街會有分別 但我自己覺得冇分別

另外 碌既大細都有三個組合
1) 76MM 80MM 80MM 76MM 即係「蕉底」
2) 80MM 80MM 80MM 80MM 即係「平底」
3) 80MM 76MM 76MM 80MM 即係「反蕉」
當然你想你既蕉底係80MM 84MM 84MM 80MM 又或者三個大碌100MM 104MM 100MM都得 只要符合返個規律就得
蕉底會比較靈活 踩街/平花通常都係呢個組合
平底就比較穩定 但多數都係新手先會追求呢個組合 因為一踩出街太唔靈活 好危險
反蕉通常都係想著普通ROLLER鞋玩AGGRESSIVE 或者剎車既人用 後者常通只剎單輪/雙輪花式
新手最建議你用蕉底 但通常買鞋都會比平底你 視符你選擇

新手碌既選擇 係冇乜既 用返原裝碌玩已經好夠了 始終都係岩岩玩 仲未摸清自己既方向 無謂再放多一舊錢買配件

之後會介紹返小小特別牌子既碌:

北極光斯凱汀或其他牌子 (發光碌): https://world.taobao.com/item/43080890969.htm?fromSite=main&spm=a1z10.5-c-s.w4002-16607330167.29.41f58d4cfgGvjy

型棍之選 係老A淘落黎基本無伏 我地試過哂咁多種色 最光最靚既係藍 紫 白 綠 相反黃色紅色就比較弱 唔夠型棍

用發光碌需要注意既係唔係好岩新手踩 因為佢啤零同飛碟係特製既磁芯 轉既時候先可以令碌發光 但係亦都係呢個原因所以發光碌轉得比較慢 踩果陣會辛苦好多 所以建議想玩既人可以玩耐小小先轉

火石碌/火花碌:
https://world.taobao.com/item/43193619946.htm?fromSite=main&spm=a1z10.5-c-s.w4002-16607330167.57.41f58d4cfgGvjy

故名思義 係你剎車果陣會爆哂火花出黎既碌 因為碌入面插左好多火石 但需注意既係平滑既地唔夠摩擦力爆火花 通常係街既石地會爆得勁好多

另外由於成粒碌都係火石 所以係ROLLER埸剎車既話會滑好多 難掌握小小

PUYEE漂移剎車碌:
https://world.taobao.com/item/3405086271.htm?fromSite=main&spm=a1z10.5-c-s.w4002-16607330167.45.41f58d4cfgGvjy

以前一款比較出名既剎車碌 但可能因為佢係83A 我地玩幾下就削左 唔太建議拎黎剎車

斯凱汀剎車碌:
https://world.taobao.com/item/9999602337.htm?fromSite=main&spm=a1z10.5-c-s.w4002-16607330167.53.41f58d4cfgGvjy

之前我朋友係大陸玩話好好用 我再買黎試既時候發現係香港大部份埸都好好剎 亦都唔太易削 價錢公道

一代二代三代 最主要係顏色分別
但已經停產左既一代 比起二三代更高質 更好剎 咁岩我地有玩左好耐既人有存貨我先試到真正既一代斯凱汀 係真係好剎好多 可惜已經冇哂

馬達輪 專業平花/踩街碌:
https://world.taobao.com/item/14881473307.htm?fromSite=main&spm=a1z10.5-c-s.w4002-16607330167.47.41f58d4cfgGvjy

睇價錢就知係好高階既碌 踩街/平花一流 絕對冇伏

另外剎車碌仲有幽靈之子 緊箍咒 海賊王等等 我自己唔覺得太好用 貴得黎易削 唔建議買
新小小既有星辰 九輪同癮輪 剎車碌黎講幾好用 我會排癮輪>>>>九輪四代>斯凱汀>星辰

以上係我地通常會買既碌 如果你凈係想是但玩下 就隨便買款最平既碌已經足夠 唔敢講你可以跑到好似速滑咁快 但係絕對足夠你享受高速快感

2.4: 啤零 (BEARING/軸承)

啤零既介紹通常都會有ILQ-9 ILQ-7呢一類既描述
數字愈大 代表轉速愈快 所以買ILQ-9既肯定冇死
不過呢一兩年全部啤零都係ILQ-9 真定假就唔知

總括黎講 輕鬆踩對啤零唔需要有太大要求 基本上你只要SEARCH 軸承 然後是但買一款2蚊左右一粒既就OK了 我自己都係用開2蚊左右既啤零 亦都用過10蚊一粒 整體黎講冇太大分別 所以一開始你唔需要糾結到底要用邊種啤零 只要冇問題就可以了

至於點樣試到粒啤零冇問題 只要你試下令粒碌空轉 最理想既情況係轉到+冇聲而無回轉既情況出現 (但通常玩耐左會轉得好順但多雜音 但只要轉到就OK了)

洗啤零方面 我地基本上唔會洗 因為洗哂16粒講緊可能要個幾鐘 又要成手油立立 但係換過一SET新既都唔洗40港紙

如果你想買貴小小又唔知邊款好 下面會同你介紹我地踩街會用既啤零

陶瓷啤零 黑陶/白陶:
https://world.taobao.com/item/21025776566.htm?fromSite=main&spm=a1z10.5-c-s.w4002-16607330167.18.41f58d4cX8tvVp

比較高級既FSK啤零 有人覺得踩街舒服 但我覺得踩凹凸不平既石屎路會好快打柴 但係ROLLER埸咁平滑既地玩就會好好用

SEBA原裝綠蓋啤零:
https://world.taobao.com/item/19793706421.htm?fromSite=main&spm=a1z10.5-c-s.w4002-16607330167.16.41f58d4cX8tvVp

通常都係6蚊或者6.5蚊人仔 通常係綠色蓋
佢係SEBA鞋既原裝啤零 例如SEBA HV
非常襟用 轉速快 適合任何埸合
所以唔敢用兩蚊啤零 又想買貴小小既牌子 呢個係你不二之選

之前我地同HK01一齊拍片玩下咁
https://www.hk01.com/%E7%A4%BE%E5%8D%80%E5%B0%88%E9%A1%8C/280870/%E6%BA%9C%E5%86%B0%E6%BB%BE%E6%97%8F1-%E7%94%9F%E6%B4%BB%E4%B8%AD%E5%AE%88%E4%BD%8F%E7%86%B1%E6%83%85-%E5%B1%AF%E9%96%80%E8%A1%97%E5%9D%8A%E7%9A%84roller-skating-night


另外有小小自家拍既花式片 再高級既我地已經冇人玩到 玩到果個冇玩
Savannth Heel Heel: https://www.youtube.com/watch?v=3xZbooa1KGM

Fakie Unity Heel Toe: https://www.youtube.com/watch?v=I25cBvxqrP4

Back Slide: https://www.youtube.com/watch?v=8TTVgobKYQk

Cross Parallel Toe Toe: https://www.youtube.com/watch?v=b9cTI9_2umY

有興趣快D PM我地一齊玩
https://www.facebook.com/tmrollerskating?ref=hl

你班人成日小圈子咁玩，點join呀

點解咁講？

通常新人會打下招呼傾兩句 如果唔主動問會覺得你係想自己玩 唔好旨意我地會全程磅實每一個人

我自己會盡力嗲下 其它人都唔係個個咁熱情 如果你係想落黎踩一兩次就到左攬頭攬頸既level係冇可能 返學都冇咁快同同學熟

。