唔係我初開的
初開個啲好多都神隱咗了
不過都講吓我自己想法(真係單純自己嘅想法,同其他任何野無關的)
我一開始玩耳機有接觸高登個耳機post, 學咗唔少野,咁當然都係其他forum/地方都學咗唔少野。
我會希望個post盡量俾到啲正面資訊各巴打,除咗每個人分享吓自己嘅聽感
(罵戰)之外,最好可以有啲幫到新手嘅野。
例如基本知識
唔同價位嘅推薦
玩耳機嘅建議(?)
例如電聲轉換係對聲音影響最大,dac/dap/amp相對都係其次,線材通常都唔會係最大嘅短板(特別係入耳式耳機嘅系統),所以最後先換。唔好好啲某啲店咁,一買第一隻耳機就推薦你換咗條線先,而應該將你嘅資金合埋地投放,應洗得洗。
咁當然錄音影響都可以話係最大,不過因為你成個耳機/音響系統嘅目的都係去盡佢地能力去回放返個錄音,所以係呢度我就唔當佢係一個要素先吧。
又例如想玩落去最緊要聽多啲,試多啲,順便搵吓自己嘅喜好同取向。
唔好聽晒店員講,更加唔好聽晒巴絲們講,做多啲自己嘅思考,做多啲功課。
咁當然你話我有舊錢,總之買到野聽就得,咁當然無問題,每人嘅做法唔同,睇吓你嘅目標係乜野。
如果鍾意睇review/分享嘅,學吓點樣睇人地啲review,唔係人地話一句呢隻耳機毒!就心中已經中咗毒。
理解吓平時啲人寫聽感會有咩形容詞,而如果想知啲形容詞實際係咩意思,就要試聽吓佢地聽過嘅耳機/系統,去對比吓你聽到嘅聲,同佢地所用嘅形容詞有咩相似之處。
咁當然寫個個人都唔一定係知道自己聽咗啲乜,寫咗啲乜。所以要睇多啲唔同人寫嘅野。聽音經驗都會好影響。
如果想知一個人寫嘅評測/聽感適唔適合你去參考/可唔可靠(因為每人聽到嘅野可能唔同,喜好又唔同,形容嘅標準/尺度又唔同),最好就係睇吓佢過往寫過嘅評測/聽感(最好係你有聽過/可以試到嘅),對比吓你所聽到嘅聲音嘅差別之處同相似之處。如果差太遠,咁根本就無可參考嘅價值。
亦可以睇吓個個人讚/喜歡嘅器材同你喜歡嘅相唔相近,如果佢明顯係喜歡50歲嘅熟女,咁即使讚到佢係熟女入面嘅頂級都好,如果你係鍾意年輕學生妹嘅話,咁都好難參考佢講嘅野。
好多人嘅喜好會隨住聽音經驗而改變,我自己嘅理念係取向比"質素/等級"重要。
所以會建議先選好自己想要嘅取向,之後再選擇要咩等級/質素嘅耳機/器材。
例如你鍾意重bass啲嘅,咁就算俾隻出名中高頻嘅頂級耳機俾你,你都好可能唔會覺得啱聽。
我會希望巴打們可以善用自己嘅資金,買到喜愛嘅器材,唔好太心急,有機會聽多啲唔同嘅配搭咁。
咁當然,有時候罵戰/大家唔同意對方就實會有,不過我嘅"原意"(可能罵戰到一半變質都唔奇嘅)係想新手巴絲們嘅知識唔好同現實有太大嘅落差咁。
例如固意提高咗中高音嘅器材會令你一耳覺得啲細節好出,但唔代表佢實際嘅訊息量/分析力真係高咁。而因為推出中高,推啲細節去你眼前呢一種方法會好搶耳,所以好容易留意少咗其他地方咁。
暫時諗到嘅係咁多,我自己嘅諗法大約係咁?(不等於呢個post要咁走,個post係屬於大家嘅,不過都希望大家可以尊重前人所留落黎嘅良好
(罵戰)風氣/環境咁
)
單純自己嘅想法,不代表其他人
感謝你睇完咁長嘅廢話